Read Termanu HATAHOLI 15 Bible Online

HATAHOLI 15 - Termanu bible

HATAHOLI 15

¹ Hataholi Yudea de'ubee leme Yudea leo Antiokia leu de lanoli hataholi kamahehelek manai Antiokia la lae, metema ta suna tasa tunga Musa hoholo-lalanen fa soona, ala ta hapu so'da ka fa.

²Tehu Paulus no Barnabas la'ban mangalalau hataholi sila hahapun ndia. Mate'e na boema ala ho'i nakeketuk, fo Paulus no Barnabas lo hataholi de'ubee leme Antiokia leo Yerusalem leu, fo ala kokolak dede'ak ndia lo hataholi nadedenu kala, ma mauli-malangan manai naa la.

³Hataholi salanik Antiokia la los losa kota deak boema, ala la'ok tunga Fenisia ma Samaria. Nai naa ala tuis, tao leo beek de hataholi ta Yahudi la fe so'da nala leo Manetualain neu. Halak ndia tao na hataholi kamahehelek manai sila la, lamahoko lanseli

⁴Lelek ala losa Yerusalem boema, hataholi salani kala ma hataholi nadedenu kala boema Penatua-penatua la sipo kasa no malole. Boema ala tuis basa hata fo Manetualain tao-no'in tunga sila.

⁵Tehu hataholi Farisi kamahehelek basak de'ubee fo'a lapadeik de ala kokolak lae, “Hataholi leoina fe'ek fo kamahehele basak sila la muse suna tasa, ma muse ala tunga Musa hoholo-lalanen.”

⁶Boema hataholi nadedenu kala ma Penatua-penatua la lakabubua fo ala kokolak dede'ak ndia.

⁷ Latukaaafik doo na seli. Neu mate'e na boema, Petrus fo'a napadeik de ana kokolak nae, “Tolano-tolanoo ngala lemin! Emi bubuluk basa, faik de'ubee maneu ka, Manetualain hele au neme emi tala'da mai, fo tui-benga Hala Malole ndia neu hataholi ta Yahudi la fo ela lamanene ma lamahele boe.

⁸ Boema Manetualain fo mana bubuluk basa hataholi daebafa ka dale na, nafa'da basa nae, Ana sipok hataholi sila la. Nafa'da dede'ak ndia ninik Ana fe Dula Dale na neu hataholi sila la sama leo Ana fe basan neu ita so.

⁹Manetualain ta bibinga-baba'e ita to sila fa. Ana tao nalalao-nalalafu hataholi sila la dale nala nana lamahele.

¹⁰Na, tao le'e de besak ia emi nau la'ban Manetualain ninik emi fe hataholi mana tunga Lamatuak sila la, lulu'a-lelepa mabelaina ndia, te se'ko na ita bei ba'ikai nala, ma ita boeo, ta takalala'ok tabe'i fas?

¹¹Dede'a nasafali na, ita tamahele de ita hapu maso'da ka, hu ka nde Lamatuak Yesus susue-lalain; hataholi sila la leondiak boe.”

¹²Boema basa hataholi mana makabubuak manai sila la, basa-basas bedenge. Basa boema, ala nenene Paulus no Barnabas tui seluk basa manda'di beuk ma dede'a matuaina, fo Manetualain taon tunga sila, nai leoina fe'ek fo hataholi ta Yahudi la tala'da.

¹³Ala kokolak late'e boema Yakobis nae, “Tolano-tolanoo ngala lemin! So'ba mamanene su'dik au dei.

¹⁴Besa ka Simon nafa'da mangalele'do, tao leo beek de nai makasososa na, Manetualain mete-nakanae hataholi ta Yahudi la fo Ana sanga hele nai sila dalek, hataholi fo ana da'di Ndia hataholi kamahehelen.

¹⁵Dede'ak ndia nandaa no nabi la lafa'da ela ka. Nana nanasulak nae leo ia,

¹⁶ Lamatua ka nae, ‘Basa ndia soona, neukose Au fali seluk.’ ‘Neukose Au afofo'a falik Dauk uman fo mana tu'u basa ka, ma Au tao ahii nalutu na, boema Au tao atetu fali kana;

¹⁷fo daenga beiela hataholi sila la, ala sanga Amak Manetualain, sama-sama lo leoina fe'ek fo ta hataholi Yahudi la fo Au alos soaneu ala da'di Au nuu ngala.’ Amak Manetualain nae leondia,

¹⁸fo nafa'da basa dede'ak ndia, neme makahulun eli mai so.”

¹⁹Boema Yakobis nae, “Da'di tunga au hahapu nga soona, ata boso tao susa hataholi ta Yahudi kamahehelek sila la.

²⁰ Tehu ita muse sulak fes susulak ma tanoli-tafa'das, fo daenga boso la'a nana'a sosongo-tatango manggenggeok sila la, do la'a bana nanafule nisak paa na, do la'a paa daa. Boema, fo ela ladook ao nala leme sosoa-piao ka mai.

²¹Nana neme makahulun eli mai a, ala lees Musa hoholo-lalanen tunga-tunga fai Saba ta nai uma mamaso kala dalek, ma nanatui-bengak nai basa kota lala'ena so.”

²²Boema hataholi nadedenu kala ma Penatua-penatua la lo basa hataholi salani kala, ala ho'i nakeketuk fo ala hele la sila hataholin de'ubee fo ladenus sama-sama lo Paulus ma Barnabas leo Antiokia leu. Boema ala hele Silas no Yudas fo loken soona lae, Barsabas boe. Hataholi kaduak ia la nde bee soona, hataholi nananita-nalelak nai hataholi kamahehelek manai Yerusalem ma dalek.

²³Ala fe hataholi fo ladenuk sila la, lini susulak esa boe. Susulak ndia lii na nae leo ia, “Neu basa tolano-tolanook maneme leoina fe'ek fo ta hataholi Yahudi mana leo nai Antiokia, Siria, ma Kilikia. So'da-molek neme ami, fo Lamatua ka hataholi nadedenu nala, ma Penatua-penatua fo emi tolanoo mala.

²⁴Ami mamanene, ami hataholim de'ubee le'i de ala tao tasi'bu, ma ala tao la emi mapangamak ninik sila nanoli nala. Te se'ko na, ami ta madenu hataholi sila la tao tataos ndia fa.

²⁵Hu ndia de ami makokolaok, de basa-basas lakaheik boema, ami hele ma hataholi de'ubee fo ami madenus le'i. Sama-sama lo ita tolanoon Barnabas ma Paulus fo ami sue-lai ka.

²⁶Hataholi kaduak ia la lapalani mate, nana ita Lamatuan Yesus Kristus.

²⁷Da'di, ami madenu Yudas no Silas le'i fo lafa'da matan emi, halak fo nanasulak nai susulak ndia dale ka.

²⁸Manetualain Dula Dale na nakaheik, ma ami boeo makaheik so, fo ela emi boso lu'a-lepa lulu'a-lelepa mabela, lenaheni bela-ba'uk fo emi paluu ka fo nde:

²⁹boso mi'a nana'ak fo ala fen neu sosongo-tatangok; boso mi'a paa daa, boso mi'a bana nanafule nisak paa na, ma madook ao ma neme sosoa-piao ka mai. Metema emi madook ao ma neme basa dede'ak sila la mai soona, emi tao-no'i tatao-nono'im malole ndia so. Ba'u ka'da ndia. So'da-molek ba'eneu emi!”

³⁰Latete'aok basa boema hataholi fo ladenuk sila la, ala la'o leo Antiokia leu. Ala losa boema, lalo lakabubua basa hataholi salani kala de ala fe susula ka neu.

³¹Lelek hataholi salani kala lees basa susulak ndia boema, lamahoko lanseli nana susulak ndia isi-liin nini kokoe-nanasik neus.

³²Yudas no Silas nde bee na nabi boe. Ala kokolak doo na seli lo tolanoo kamahehelek manai Antiokia sila la, fo latetea-laheheles, ma ala fes napalanik.

³³Yudas no Silas leo los basa faik de'ubee dale na, boema hataholi kamahehelek manai Antiokia sila la, ladenu fali kasa, ma lafa'das fo landuku-lalosak sila nate'a na neu hataholi mana madenu sila. [

³⁴Tehu Silas naketu basa, ana leo nahele neme Antiokia.]

³⁵Paulus no Barnabas boeo, ala leo faik de'ubee dale na leme Antiokia. Duas lo hataholi fe'ek makadotok, lanoli ma ala tui-benga Manetualain dede'a-kokolan nai Antiokia.

³⁶Beita doo bee boen te, Paulus nafa'da Barnabas nae, “Mai fo ata fali fo teu donge-dama basa tolanoo kamahehele kala nai basa kota-kota fo ita tui-benga Lamatua ka dede'a-kokolan, fo daenga ita bubuluk so'da nala tao leo beek so.”

³⁷Barnabas hii no Yohanis Markus,

³⁸ tehu tunga Paulus dale nameme'da na, metema lo Markus soona, ta malole fa, nana Markus ta nau nalalau-naoono sama-sama no sila fa, ma ana la'oelas leme Pamfilia.

³⁹Boema Paulus no Barnabas lale'a matua ina de nalosa neu mate'e na boema, duas lasi'da-laba'e. Boema Barnabas nalo na Markus de duas sa'e ofak leo Siprus leu.

⁴⁰Ma Paulus nalo na Silas de tolanook manai Antiokia la hule-haladoi basa fe duas boema, duas la'o leona.

⁴¹Ala la'ok okofeo Siria ma Kilikia de latetea-lahehele hataholi salanik manai naa la.