Read Termanu HATAHOLI 21 Bible Online

HATAHOLI 21 - Termanu bible

HATAHOLI 21

¹Ami matete'aok basa mo Penatua-penatua maneme Efesu sala boema, ami la'oelas leona. Tutika ami sa'e ofak makandoo leo pulu Ko sa meu, de balahaa boema ami losa pulu Rodo sa. Ami sa'e ofak meme ndia mai, de ami makandoo leo namo see-seek Patara meu

²Ami losa Patara boema ami hapu ofak esa, ana sanga neu leo Fenisia neu. Boema ami sa'e ofak ndia leona de ami la'o

³ami la'o de ami mita pulu Sipru sa nai ami boboa kii ma, tehu ami makandoo leo Siria meu. Ami kona neme Tirus nana ami sa'e ofa ka sanga nakona bua-lo'as nai ndia.

⁴Ami losa ndia boema, ami meu donge-dama hataholi kamahehelek neu Yesu sala de ami leo mos mamasok esa dale na. No natutu'duk neme Manetualain Dula Dale na mai, de ala kokoe Paulus fo boso neu leo Yerusalem neu.

⁵Tehu fai na losa fo ami la'o meme ndia mai so, boema ami la'oelas de ami la'ok makandoo leona. Basa-basas lo saoana nala lafuli lo ami losa kota deak. Ami losa tasi su'u na boema, ami basa-basa mala senek de ami hule-haladoi.

⁶Basa ndia boema, ami matete'aok de ami sa'e leo ofak lain meu, ma sila fali le'us leo uma nala leu.

⁷Ami sa'e ofak makandoo meme Tirus leo Ptolemais meu. Ami losa naa boema, ami meu donge-dama tolanoo kamahehele kala fo ami mate'as, boema ami leo mos faik esa dale na.

⁸ Balahaa boema ami la'o seluk de ami losa Kaisarea. Ami kona ndia boema, ami meu leo tou mana tui-benga esa na'de Felipus boema ami leo meme uman. Ala hele hataholi kahituk manai Yerusalem mala, hataholi esa nde Felipus ia.

⁹Felipus ia anafe'on ha, de Manetualain fes malelak ma be'ibalakaik, fo ala tui-benga halak maneme Manetualain mai.

¹⁰ Ami leo faik de'ubee dale na neme ndia, boema nabi esa na'de Agabus, ana mai neme Yudea mai.

¹¹Ana mai donge ami boema ana ho'i na Paulus kalikee na, de ana pa'an neu ei liman boema nae, “Manetualain Dula Dale na nafa'da nae, neukose hataholi Yahudi la pa'a kalikee ia lamatua na leoiak nai Yerusalem, fo ala fen leo hataholi ta Yahudi la neu.”

¹²Lelek ami mamanene dede'ak ndia boema, ami mo tolanook mana leo nai Kaisarea la moke manseli neu Paulus fo boso neu leo Yerusalem neu.

¹³Tehu Paulus nae, “Sosoak hata tolanoo kala kii leoiak, de nalosa emi tao ma au dale nga nakalulutuk? Au sadia basa, ta ka'da soaneu ala ho'u au nai naa fa, te au sadia basa soaneu au mate hu ka nde Lamatuak Yesus.”

¹⁴Paulus ta nau namanene ami fa, boema ami ta kena-ka'in so'on. Ami bekola mae, “Neme na fo ka'da Lamatua ka hihii-nanaun nde da'di a.”

¹⁵Ami leo meme ndia faik de'ubee dale na boema, ami mafafa'u ami bua-lo'am fo ami sanga meu leo Yerusalem meu.

¹⁶Tolanook de'ubee leme Kaisarea mai boe, de ami basa-basa mala meu leo Manason uman meu, nana ami sanga leo nai uma ndia. Manason ia hataholi Siprus, fo ana tunga Yesus doo ka so.

¹⁷Lelek ami losa Yerusalem boema, tolanook manai sila la sipok ami no namahokok.

¹⁸Balahaa boema, Paulus sama-sama no ami meu donge-dama Yakobis. Ami meu te basa Penatua-penatua la lai ndia so boe.

¹⁹Ami mate'a basas boema, Paulus tuis basa hata fo Manetualain tao-no'in tunga ndia lau-onon nai hataholi ta Yahudi la dalek.

²⁰Lamanene Paulus tutuin ndia boema basa-basas koa-kio Manetualain. Basa boema lafa'da Paulus lae, “Tolanoo Paulus! Tolanoo ka muse bubuluk te, hataholi Yahudi la lifu-lifun lamahele Yesus so. Basa-basas tunga Musa hoholo-lalanen no manggatek.

²¹Ma besak ia lamanene lae, tolanoo ka nanoli hataholi Yahudi fo mana leo nai leoina fe'e kala tala'da, fo daenga ala boso tunga Musa hoholo-lalanen. Boema tolanoo ka mafa'das fo ala boso sunat ana nala, ma ala boso tunga hataholi Yahudi la ha'da na.

²²Besak ia hataholi Yahudi kamahehele basak sila la, tao leo bee o lamanene tolanoo ka mai nai ia so. Da'di besak ia, tao leo bee bai?

²³ Malole lenak tolanoo ka tunga ami nanoli-nafa'dam, te hapu hataholi ha lai ia, laheluk basa lo Lamatua ka so.

²⁴Naa, tolanoo ka mu fo tao balisi ao ma sama-sama mos, sa'di tolanoo ka se'ba fes fo ala nggeuheni langa doo nala. No enok ndia, neukose basa hataholi la ala bubuluk lae, hata fo sila lamanenen la'eneu tolanoo ka ndia ta tete'e ka fa, nana tolanoo ka boeo nakalala'ok Musa hoholo-lalanen boe.

²⁵ Tehu la'eneu hataholi ta Yahudi kamahehele basa kala soona, ami haitua fes susula nakeketu ka nae, ta bole la'a nana'ak fo ala fen neu sosongo-tatangok, ta bole la'a paa daa, ta bole la'a bana nanafule nisak paa na; ma ala ta bole sosoa-piao fa.”

²⁶Boema Paulus no hataholi kahak sila la leu tunga feta tao balisi ao ka. Basa boema leu leo Manetualain Uman leu fo latanes, bei faik de'ubee bai soona, besa ka feta tao balisi aok ndia basan, ma latanes, sila esa-esak fe tutunu-hohotuk tao leo beek.

²⁷Lelek fo fai kahitu kala sanga deka basan boema, hataholi Yahudi de'ubee leme Asia mai de lita Paulus nai Manetualain Uman dale. Boema leu dudungu-papau hataholi makadotok, fo leu ho'u Paulus,

²⁸ma ala eki lae, “Hei hataholi Israe la lemin, mai fo fali ma ami dei! Te hataholi ia nde neu leo basa mamanak lala'ena fo nanoli hataholi la la'ban leoina Israe la fo ala la'ban Musa hoholo-lalanen, ma ala la'ban Manetualain Uman ia. Nakalenak besak ia, ana hela no hataholi ta Yahudi la leo Manetualain Uman dale leu, fo ala tao langgenggeo mamana malalao-malalafuk ia!”

²⁹ Ala kokolak lae leondia nana lita Trofimus fo hataholi Efesus ndia nai kota sama-sama no Paulus, de laedaenga Paulus non leo Manetualain Uman dale neu.

³⁰Boema tasi'bu da'di nai basa kota dale lala'ena, de basa hataholi la lalai mai de lakamomotu lalas. Boema ala ho'u la Paulus de ala lele'a-loloson kalua neme Manetualain Uman dale mai. Besak ndia boe, ala nggoelisa Manetualain Uma na lelesu nala.

³¹Lelek hataholi mana tao tasi'bu sila la bei sanga enok fo taolisa Paulus te hataholi neu nafa'da malanga solda'du Roma nae, tasi'bu da'di nai basa Yerusalem lala'ena,

³²Tutika malanga solda'du ndia no solda'du la malanga matuainan de'ubee lo solda'du ana kala de lalai leo mamana tasi'bu leu. Nai lelek fo hataholi makadotok sila la lita malanga solda'du a no solda'du nala mai boema, ala hahae fepa Paulus.

³³Boema malanga solda'du ndia neu leo Paulus neu de ana ho'u nan, boema nadenu hataholi la pa'a liman duas ninik namosina. Basa boema malanga solda'du ndia natane, see Paulus ndia, ma ana tao sala beek so.

³⁴Hataholi makadotok sila la, nggelok lataa lae leo iak, ma nggelok bai soona lata lae leo nak. Hu ka nde tasi'bu ta naloe fa de malanga solda'du ta bubuluk, tunga ndo na hata da'di so. Hu ndia de ana paleta fo lo Paulus leo solda'du la kota musun dale neu.

³⁵Lelek lo Paulus losa solda'du la kota musu na e'dahuun lain boema, hataholi mana tao tasi'u la tao tasi'bu mangalalau, de nalosa solda'du ana kala muse ko'ok Paulus leo solda'du la kota musun dale neu.

³⁶Hataholi mana tao tasi'bu la tunga dea ma eki lae, “Taomisan!”

³⁷Leondiak ala bei sanga lala kota musu dalek tutika Paulus nafa'da malanga solda'du nae, “Au bole kokolak faanak o Ama do?” Boema malanga solda'du ndia nafa'dan nae, “O kokolak malelak dede'a Yunani boe?

³⁸Meteme leondiak soona, o ta nde hataholi Masir fo faihi'da ka ana tao tasi'bu de nalai no hataholi mana tao tasi'bu mana ho'u tee-tafa lifunha leo mo maloa leu fa hetu?”

³⁹Boema Paulus nataa nae, “Au hataholi Yahudi, fo bongi au neme Tarsus fo kota matua nai Kilikia. Ama sue na fe au loak faa fo au kokolak o hataholi makadotok ia la.”

⁴⁰Malanga solda'du nakaheik boema, Paulus napadeik neu e'dahuuk lain de ana fe ta'du ninik lima na, fo hataholi la bedenge. Basa boema Paulus kokolak nos ninik dede'a Ibrani nae,