Read Termanu HATAHOLI 4 Bible Online

HATAHOLI 4 - Termanu bible

HATAHOLI 4

¹Lelek fo Petrus ma Yohanis bei kokolak lo hataholi sila la te, malanga ima mala ma malanga mana manea Manetualain Uma na, boema hataholi Saduki la ala mai leo Petrus no Yohanis mai.

²Hataholi sila la lamanasa nana Petrus no Yohanis lafa'da hataholi la lae, Yesus naso'da falik neme mamate sa mai so. Fo ndia da'di neu buti esa nae, hataholi mana mate kala neukose laso'da falik.

³Boema ala ho'u la Lamatua ka hataholi nadedenu kaduan sila la de ala taos leo bui dale neu. Ma hu ka nde le'odae so de lahele Petrus no Yohanis leme ndia losa balahaa fafaik.

⁴Tehu hataholi mana mamanene Lamatua ka hataholi nadedenu kaduan sila nanoli nala, ba'u ka lamahele. De dede'u nala boetai lamba'u ka. Fafa'ka ma, losa hataholi lifun lima.

⁵Balahaa fafaik boema, lasi Mana Maketu-Mala'di la, mauli-malanga Yahudi la, boema mesa agama la lakabubua nai Yerusalem.

⁶Latongo lo Hanas fo Imam Matua Ina, boema Kayafas, Yohanis, Aleksander ma basa imam matua ina ndia tei dale nala.

⁷Boema lo Petrus no Yohanis leu lataa mauli-malangan sila la de latane duas lae, “Eno na tao leo beek de emi tao mahai hataholi lu'uk ndia? No be'ibalakik do no koasa neme see mai, de emi tao dede'ak ndia?”

⁸Boema Petrus fo Manetualain Dula Dale na koasa nan ndia nataa nae, “Tua nasa mauli-malangan nai leoina la, ma Tua nasa mana maketu-mala'di kala!

⁹Faik ia emi kalaak ami nana ami tao malole soaneu ami tulu-fali hataholi lu'u ka, ma hu ka nde Tua nasa nau bubuluk ami tao malea-mahai hataholi ndia tao leo beek,

¹⁰Naa, Tuan-tuan nasa muse bubuluk ma basa hataholi Israe la boeo muse bubuluk te besak ia, hataholi ia napadeik nai Tuan-tuan nala matan no so'da-molek nana be'ibalakaik ma koasa neme Yesus Kristus fo hataholi Nazaret ndia. Tuan-tuan nala lona-nggange basa Yesus ndia so, tehu Manetualain tao naso'da fali kana.

¹¹ Yesus ndia nde nananafa'dak nai Susula Malalao ka lalanen esa nde ia dalek nae, ‘Batu fo emi ndolu uma mala ta pake fan te see ko na ana da'di batu netes.’

¹²Ka'da tunga Yesus mesa kana de hataholi a hapu so'dak. Hu ndia de nai daebafak ia lala'ena, fo nai basa hataholi daebafa ka tala'da, ta hapu hataholi fe'ek esa boen, ana hapu koasa neme Manetualain mai, fo ana fe so'dak neu ita.”

¹³Mana maketu-mala'dik sila lita Petrus no Yohanis napalani na boema ala dodoo doa kana, lena-lenak ala bubuluk basa, Lamatua ka hataholi nadedenu kaduan sila la nde bee na hataholi biasa, ma mana sakola ta kala. Boema ala bubuluk Lamatua ka hataholi nadedenu ka'duan sila la nde bee na ala tunga Yesus.

¹⁴Tehu ala ta bisa kokolak hata-hata fa nana hataholi fo lakahahai kana ndia napadeik nai ndia, fo nai sila matan sama-sama no Petrus ma Yohanis.

¹⁵Boema ladenu Lamatua ka hataholi nadedenu kaduan sila la fo ala kalua leme mamana sidang dale mai. Basa boema lakokolaaok.

¹⁶Lakokolaaok lae, “Ita muse tao hataholi ia la le'e? Basa hataholi mana leo nai Yerusalem-mala bubuluk basa manda'di beuk matua ina fo hataholi kaduak ia la tao ka so. Ita ta hapu talelesi tala dede'ak ndia fa.

¹⁷Tehu fo ela dede'ak ia ana boso sipela fo namaloa seluk leo hataholi la neu, de malole lenak takabibiik duas tae, emi ta bole kokolak mo hataholi esa boen minik Yesus na'de na makandondook so'on.”

¹⁸Boema lalo falik duas leo dalek leu de lafa'das lae, emi ta bole seseik do manoli minik Yesus na'de na makandondook so'on.

¹⁹Tehu Petrus no Yohanis lataa lae, “Du'a-dodoo matam, bee ka nde malole nai Manetualain mata na: tunga Tua nala paleta na do tunga Manetualain paleta na.

²⁰Nana ami ta bisa hahae kokolak la'eneu hata fo ami mitan ma ami mamanene matam fa.”

²¹Boema mana maketu-mala'dik sila la ta hapu ne'ek faanak boen soaneu ala huku Petrus no Yohanis. Da'di ka'da lakabibiik Lamatua ka hataholi nadedenu kaduan sila la boema ala po'i duas, nana basa hataholi la koa-kio Manetualain, hu ka nde manda'dik ndia.

²²Hataholi fo ana hapu lea-hai ninik manda'di beuk ndia, teun hahulu lenak so.

²³Ala po'i Petrus no Yohanis boema duas fali leo nonoo nala leu, de ala tuis basa hata fo malanga ima mala ma mauli-malanga Yahudi la lafa'da duas.

²⁴ Nonoo nala lamanene basa dede'ak sila la boema basa-basas teikesa-dalekesa de ala hule-haladoi neu Manetualain. Ala hule-haladoi lae, “Manetualain, O nde makadada'dik lalai no daebafa ka ma tasi no basa oe isin lala'ena.

²⁵ O kokolak hai mo ami bei ba'ikai mala ninik O Dula Dale ma. O mafa'da O atam Dauk mae. ‘Tao le'e de hataholi fo ta lalelak Manetualai na lamanasa; tao le'e de nggileoina la, dudu'a-dodoo ka'da dede'ak manda'di ta kala?

²⁶Mane-mane daebafa kala lahehele aon, fo leu latee-latati, ma basa mauli-malanga nala teikesa-dalekesa fo ala la'ban Lamatua ka, ma Mane Mana Fe So'da ka.’

²⁷ Nana memak Herodes no Pontius Pilatus tao nakabubuak lo hataholi fo ta lalelak Lamatua ka ma hataholi Israe la, leme kota ia dalek. Latongo fo ala la'ban O atam Yesus fo malalao-malalafuk ndia, fo O so'u basan da'di Mane Mana Fe So'da ka.

²⁸Basa-basas teikesa-dalekesa fo ala tao basa hata lala'ena, fo O maketu basa makahulu kana mae, neukose dede'ak ndia ana da'di. Boema O maketu dede'ak ndia tunga O koasa ma, ma O hihii-nanau mesa ma.

²⁹Besak ia Lamatuak, mita kasa lakabibiik tao ami le'e ia so. Fe ami fo atam ia la loak soaneu tui-benga O dede'a-kokolam boso no bibii-namata'uk.

³⁰Fe O tutulu-fafalim mai, fo ela hataholi kamahe'dis ala lea-hai, ma manda'di beu kala boema dede'a matua ina la ala da'di tunga O atam Yesus fo malalao-malalafuk ndia na'de na.”

³¹Ala hule-haladoi basa boema lakabubua lai mamana ka, nanggengo. Boema Manetualain Dula Dale na koasa na basa-basas de ala mulai kokolak no napalanik nanseli la'eneu halak maneme Manetualai na mai a.

³² Basa hataholi kamahehelek sila la teikesa-dalekesa ma dudu'a-aafik esa. Ta hapu hataholi esa boen nafa'da nae, ndia hata-heton sila la ndia nuu mesan fa. La'a-pake hata-heto nala leu esa.

³³Lamatua ka hataholi nadedenun sila la tui-benga Yesus fo naso'da falik ndia no koasa matua ina. Hu ndia de, Manetualain fes baba'e-papala matua ina.

³⁴Nalosak ta hapu sila hataholin esa ana to'a-taa hata esa boen. Nana hataholi see nanuu dae do uma soona nase'o fo nini doi nala

³⁵leo Lamatua ka hataholi nadedenu nala leu. Basa soona Lamatua ka hataholi nadedenu nala baba'e fes neu hataholi mana paluu kala.

³⁶Yusuf boeo tao leondiak. Nase'o dae na de nini doi nala leo Lamatua ka hataholi nadedenu nala neu. Yusuf ia nde bee soona, Lewi fo neme Siprus, tititi-nonosin ndia; Lamatua ka hataholi nadedenu nala loken soona lae, Barnabas boe. (Sosoa na nae, Mana kokoe-nanasi).