Read Termanu HATAHOLI 7 Bible Online

HATAHOLI 7 - Termanu bible

HATAHOLI 7

¹Boema Imam Matua Ina natane Stefanus nae, Ade basa hata fo hataholi sila la kokola kana ndia, tete'ek-ka do ta?

² Boema Stefanus nae, “Ina ama tolanoo, ka'a-fa'di ngala lemin! So'ba emi mamanene su'dik au dei! Te ita ba'ikain Abraham beita hukahai leo Haran neu fa, lelek ndia ana bei leo neme Mesopotamia. Boema Manetualain fo Mandela-masa'ak ndia ana mai,

³de nafa'dan nae, ‘La'oela o nusa-namom ma o tolanoo ka'a-fa'di mala, fo mu leo nusak fo neukose Au atu'dun neu o.’

⁴ Boema Abraham la'oela nusa Kasdi ma, de ana hukahai leo Haran neu. Mate basa Abraham aman boema Manetualain nadenu Abraham hukahai leo nusak ia mai, fo beak ia ina ama ngala ma tolanoo kala leo nai dalek nde ia.

⁵ Nai lelek ndia, Manetualain ta fe Abraham dae ia bibianak faa anak boen, fo ana taon da'di ndia dae pusakan boen; tenga esa boeo, Ana ta fe fan. Tehu Manetualain helu nae, neukose Ana fe dae ndia neu Abraham, fo ana da'di Abraham no tititi-nonosi nala pusakan. Ndia te Abraham anan beita.

⁶ Tehu Manetualain nafa'da Abraham dede'ak esa nde ia nae, ‘Neukose o tititi-nonosim ala leo sama leo hataholi manamai nai hataholi fe'ek nusa-namon. Neukose nusak ndia hataholi nala tuni-ndenis, ma ala taos no balakaik, teuk natun ha dale na.

⁷ Tehu hataholi mana taos da'di ata sila la, neukose Au hukus, fo ala kalua leme nusak ndia mai, fo ala sene-do'ok neu Au nai mamanak ia.’

⁸ Manetualain kokolak basa nae leondia boema, ana paku nisa hehelu-balataak ndia ninik suna ta. Hu ndia de, bongi basa Isak faik falu boema, Abraham suna tana. Basa boema Isak boeo, ana sunat Yakob. Yakob boeo ana suna tana kasanahulu dua nala, fo hataholi Yahudi la amakai na.

⁹ Boema ita amakai nala lape'da dalek lo Yusuf, nalosa lase'ohenin de ana da'di ata neme Masir. Tehu Manetualain no kana,

¹⁰ de ana soi nan neme basa toto'a-tatan dalek mai. Manetualain ba'e fen dale malole, ma ndolu malelak nai lelek neu nataa mane Masi ra fo Firon, nalosa ana so'un da'di Gobelnol nai nusa Masi ra, ma ana paleta koasa mane Firo na uma mane na.

¹¹ Basa boema, fai la'a ndoe matuaina nai basa nusa Masi ra ma dae Kana'a na lala'ena, de nalosa basa hataholi lala'ena lamala'a-lamandoe lanseli. Ita bei ba'ikai nala boeo lamala'a lanseli.

¹²Boema lelek fo Yakob namanene hataholi la benga lae, nai Masir bei hapu nana'ak boema, nadenu ana nala fo ita ba'ikai nala leu leo Masir leu. Fo ia soona, besa ka leu makasososa na nde ndia.

¹³ Lelek fo leu kala'i dua na boema besa ka Yusuf nafa'da tolanoo nala nae, Yusuf nde au. Faik ndia besa ka Firon nalelak Yusuf tolanoo ka'a-fa'di nala.

¹⁴ Basa boema Yusuf haitua fe aman Yakob halak, fo noke Yakob no tolanoo ka'a-fa'di nala lala'ena, ala hukahai leo Masir leu basa-basas, hataholi hituhulu lima.

¹⁵ Boema Yakob hukahai leo Masir neu, de Yakob no ita bei ba'ikai nala mates leme nusa Masi ra.

¹⁶ Neu fai makabuin besa ka lini falik dui-kalu nala leo Sikhem leu, de latois leme mamana natoik fo Abraham fe doik de ana asa na mamanak ndia neme leo Hemo ra nai Sikhem.

¹⁷ Lelek Manetualain fai na deka, fo Ana tao natetu hehelu-balataan no Abraham te, ita leoinan manai Masi ra, lamade'u-lamba'u so.

¹⁸Mate'e na boema, mane beuk esa paleta nusa Masi ra, fo manek ndia ta nalelak Yusuf fa.

¹⁹ Manek ndia fepa li'u nakamiminak ita bei ba'ikai nala, ma ka'da ana tao nasa-nasak mesan nos. Ana lakanakaseti hataholi la fo ala tu'uheni ana manapipila ana nala, de lalefu-le'ak basa mo ka de mate la'iesa kasa.

²⁰ Nai lelek ndia nde bongi Musa. Ni'iana ndia mana'a hiik. Ina aman lakaboboi lafufunik ni'iana ndia neme uma, bulak telu dale na,

²¹ neu makabui na boema ala tu'uhenin boe, de mane Firo na anafe'o na hele nan de nakaboboin sama na leondia ana bongi na.

²²Basa leoina Masi ra malela nala lanoli la'iesa kasa neu Musa, de nalosa Musa da'di hataholi mana koasa matuaina nai hala-kokolan ma tatao-nono'i na dalek.

²³ Lelek fo Musa teun hahulu boema, dale na nahiik nanseli neu nita ndia hataholi Israel nala, so'da nala tao leo beek so.

²⁴Neu boema nita hataholi Masir esa, ana tutu-fepa ndia hataholin esa; boema neu nasale'e hataholi nanatutu fepa ka, de ana taonisa hataholi Masir ndia.

²⁵Musa nae uni ka ndia hataholi nala neukose ala bubuluk, Manetualain pake ndia fo neu soi po'is. Te see ko na ala ta bubuluk fa.

²⁶Balahaa boema nita seluk hataholi Israel dua laki'duao, boema ana sanga enok fo ana mole-dame duas. Musa nafa'da duas nae, ‘Emi dua tolanoo kala. Ma tao le'e de emi dua maki'duao?’

²⁷Tehu hataholi fo mana tutu fepa nonoo na ndia, ana tipa Musa leo boboak neu de nafa'dan nae,

²⁸‘See ka nde so'u o da'di ami mauli-malangam, ma mana maketu-mala'di ma? Ade o sanga taomisa au, sama na leo hua sa, o taomisa hataholi Masir ndia bai hetu?’

²⁹ Musa namanene hataholi ndia kokolak nae leondia boema nalai la'oela Masir, de neu leo nai nusa Media na. Neu ndia boema, ana bongi na ni'iana dua.

³⁰Basa teuk hahulu boema, ata nusa so'dak esa natu'du ao na neu Musa neme mo malo a, fo deka no Lete Sinai. Ata nusa so'dak ndia ana mai nai ha'i mana pilak dale, fo ana kalua neme telaanak dale mai.

³¹Musa nita manda'dik ndia boema, ana dodoo doa kana, nalosa neu leo telaanak ndia mata na neu, fo sue ka nde ana bubuluk beek manda'dik ndia. Boema namanene Manetualain nafa'dan nae,

³²‘Au ia, o bei ba'i-kaim Manetualain; Au ia, Abraham, Isak, ma Yakob Manetualain,’ Musa dele ngge'be-ngge'be no bibii ka, de nalosa ana ta napalani mete leo telaanak ndia neu so'on,

³³Basa boema Manetualain nafa'da selu kana nae, ‘Se'iheni ta'bueis fo o pakek ndia, nana mamanak fo o mapadeik nai lain ndia nde bee na, mamana malalao-malalafuk.

³⁴ Au ita ma Au taoafik neu basa Au hataholi kamaheheleng manai Masi ra doidoso nala so. Au amanene hoo-nggu'u nala de Au sanga kona u soaneu Au soi po'is. Besak ia mai dei! Te Au sanga adenu o fali mu'u ma leo Masir mu.’

³⁵ Musa ia nde Musa fo leoina Israe la ta sipo kana fa, ma ala tipahenin ninik dede'a-kokola ka nae, ‘See ka nde so'u o da'di ami mauli-malangam, ma mana maketu-mala'di ma?’ Tehu mate'e na, ndia nde Manetualain nadenun fo ana da'di mauli-malangan, ma mana fe so'dak neu hataholi Israe la, ninik tutulu-fafalik neme ata nusa so'dak fo ana mai natongo non neme telaana mana pilak dale a.

³⁶ Musa ia nde hela-nole leoina Israe la kalua leme Masir mai, ninik ana tao manda'di beuk, ma dede'a matuaina la neme Masir, neme Tasi Pila sa, ma neme mo maloa teuk hahulu dale na.

³⁷ Musa ia boeo, nde Musa fo nafa'da leoina Israe la nae, ‘Neukose Manetualain fe emi nabi esa, fo nanahelek neme emi tala'da mai, sama na leo Ana hele au a.’

³⁸ Musa ia nde nai leoina Israe la tala'da fo neme mo solokae ka, ana da'di lelete soaneu ata nusa so'dak fo mana kokolak non neme Lete Sinai, ma no ita bei ba'ikai nala. Ndia nde mana sipo hala maso'dak maneme Manetualain mai fo nanduku-nalosa kana neu ita.

³⁹Leomae leondiak boe, ita bei ba'ikai nala ta nau tunga paleta na fa. Ala ta nau sipo kana fa, ma ala nau fali seluk leo Masir leu.

⁴⁰ Lafa'da Harun lae, ‘Tao fe ami lamatua daebafak fo ala hela-nole ami. Nana ami ta bubuluk hata da'di tou Musa fo mana no falik ami kalua meme Masir mai!’

⁴¹ Boema nai lelek ndia, ala doki-dulak la sapi ana esa, de basa boema ala tunu-hotu fe sapi ana nanadoki-dulak ndia tutunu-hohotuk, ma ala tao feta fo ala sene-do'ok neu buas fo sila tao lan ndia.

⁴² Boema Manetualain la'oelas de Ana po'ilota kasa, ala sene-do'ok neu nduuk manai lalai la. Dede'ak ndia nandaa no hata fo nanasulak nai nabi la susulan dale. Nae leo ia ‘Hei hataholi Israe la lemin! Ta soaneu Au emi do'do ma emi tunu-hotu bana dodoo na teuk hahulu dale na, nai mo solokae ka.

⁴³Uma Lopo sosongo Molo ka nde emi meu leo bee meu soona, emi ho'i minin sama-sama no bana nanadoki-dulak fo emi sosongo nana, fo nde Refan; ndia dodoki-dudulak fo emi taon fo emi sene-do'o kana. Hu ndia de, neukose Au tu'u-tapaheni emi losa doo ka, losa nusa Babel-la meu.’

⁴⁴ Uma Lopo fo Manetualain mamanan fo Ana mai neu hataholi daebafa ka, hapun nai ita bei ba'ikai nala neme mo maloa. Manetualain paleta Musa fo ana tao Uma Lopo ndia, tunga natutu'duk fo Manetualain natu'dun neu Musa.

⁴⁵ Basa boema ita bei ba'ikai nala lini seluk Uma Lopo ndia, nai lelek lo Yosua leu loso la ita nusan ia neme leoina la koasa na, fo Manetualain usihenis leme mata na mai. Uma Lopo ndia nahele neme ndia losa Dauk tepo na.

⁴⁶ Dauk nandaa no Manetualain dale na, de Dauk noke Manetualain fo ela Ana nau Dauk tao na uma esa soaneu Manetualain fo Yakob sene-do'ok ndia.

⁴⁷ Tehu Salomo nde napadedeik uma soaneu Manetualain.

⁴⁸Tehu Manetualain Fo Madema Ina ndia, Ana ta nau leo nai uma fo hataholi daebafa ka tao ka fa; Nana nai nabi la susulan dale nanasulak nae leo ia:

⁴⁹ ‘Lalai nde bee na Au kandela nga, ma daebafa ka nde bee na Au ei tatabu nga. Uma bee ka nde emi sanga mapadedei kana soaneu Au? Au mamana hahae ao nga nai bee?

⁵⁰Ade Au ta nde akadada'dik basa lala'ena fa do?’ Manetualain nae leondia.

⁵¹ Tolanoo kala langa batu manseli, ma tea na seli soaneu emi tunga Manetualain! Emi di'idoo mala pake nanseli neu Manetualain dede'a-kokolan! Emi mo emi bei ba'ikai mala matak esa! Emi la'ban Manetualain Dula Dale na tataas esa!

⁵²Ade emi bei ba'ikai mala ta fepa-li'u nabi esa boen do? Ala taolisa Manetualain hataholi nadedenun fo makahulun eli ala tui-benga lae, Manetualain Atan fo ndoos ndia, neukose Ana mai. Ma besak ia emi ta mo kana fa, nakalenak bai emi taomisa Manetualain Atan ndia.

⁵³Ata nusa so'da kala landuku-lalosak Manetualain paleta nala neu emi so, tehu emi ta tunga fas!”

⁵⁴Mana maketu-mala'di matua la lamanene basa hata fo Stefanus nafa'da ka boema, dale nala he'di sa ma lamanasa mangalalau.

⁵⁵Tehu Stefanus fo Manetualain Dula Dale na koasa nan ndia, nanganalo leo lalai neu. Nita Manetualain ndela-sa'an ma nita Yesus napadeik nai Manetualain boboa kona na.

⁵⁶Boema Stefanus nae, “Mitak! Au ita nusa so'da ka natahuka de au ita Ana Hataholi ka napadeik nai Manetualain boboa kona na!”

⁵⁷Mana maketu-mala'di matua sila la ko'oketu di'idoo nala ma ala eki, boema basa-basas leu sapu la Stefanus.

⁵⁸Ala lele'a-loloso Stefanus leo kota deak neu, basa boema ala tapan ninik batu. Basa hataholi fo lita matan manda'dik ndia, ala pe'da ba'du manalu nala neu touana muli-soluk esa na'de Saulus ei na.

⁵⁹Ala bei pia-pia lo Stefanus, te Stefanus nalo ma nae, “Lamatuak Yesus, sipok ma au samane nga!”

⁶⁰Boema ana senek ma ana nggasi napane'e nae, “Lamatuak, boso fe hataholi ia la lu'a-lepa sala-singok ia!” Nafa'da basa nae leondia boema maten.