Read Termanu ROMA 3 Bible Online

ROMA 3 - Termanu bible

ROMA 3

¹Metema leondiak soona, ade hapu nanalak hata da'di hataholi Yahudi? Ma sosoak hata tunga suna ta nakanenete na?

²Tao leo beeo, sosoa-ndandaan ba'uk-ka! Makasososa na, hu ka nde Manetualain fe dede'a-kokolan neu hataholi Yahudi la.

³Tehu metema hataholi Yahudi nggelok ta lilineka fa soona, tao leo bee bai? Hu no enok ndia de, ade Manetualain ta lilineka fa do?

⁴ Tao leo bee o ta! Nana dede'a mangale'do na, Manetualain ndos nahele, leomae basa hataholi daebafa ka masapepekok mesa-mesan. Nai Susula Malalaok dale nanasulak nae, “Ela leo bee na, lita O ndos nai O hala-kokola ma dalek, ma O sengi nai lelek fo laketu-lala'di O.”

⁵Tehu metema Manetualain mandoon ndia boetai nananitak, hu ka nde ita tatao-nono'i masala na soona, ade ita bei sanga tae le'e bai? Metema Manetualain huku ita soona, ita tafa'da tae, Manetualain ta naketu tunga ndo na fa hetu do? Tunga hataholi daebafa ka soona, natatanek ia, memak nandaa.

⁶Tehu ta leondiak fa! Nana metema Manetualain ta ndoos fa soona, tao le'e de naketu-nala'di daebafa ka ia?

⁷Tehu metema, hu ka nde tatao-nono'i masala kala, de hata ndoos la'eneu Manetualai na, boetai nananitak, nalosa Manetualain nanakoa-kiok soona, tao le'e de ala bei fe salak neu hataholi mana tao sala kala lae, hataholi masala-masingok bai?

⁸Boema tao le'e de ita ta bole tafa'da tae, “Malole lenak, ata tao tatao-nono'i mangalauk takandoo, fo daenga tatao-nono'i malole a, ana moli-da'di?” Memak hapu hataholi nakadadaek au ninik nafa'da nae, au kokolak basa ae leondia so. Hataholi matak leondia ka, ndandaa na, Manetualain hukun.

⁹Naa, metema ita da'di hataholi Yahudi soona, ita malole na lenaheni leoina fe'e kala do? Ta leondiak fa! Au afa'da basa ae, leomae hataholi Yahudi do leoina fe'e kala boeo, hataholi masala-masingok mesa-mesan.

¹⁰ Sama leo nanasulak nai Susula Malalaok dale nae, “Ta hapu hataholi ndoos esa boen,

¹¹ta hapu hataholi malelak esa boen, ma ta hapu hataholi esa boen, ana sene-do'ok neu Manetualain.

¹²Basa hataholi la ladook aoina nala neme Manetualain so; basa-basas latofa-latalak so. Ta hapu hataholi manatao ndoos esa boen, ta hapu hataholi esa boen!

¹³ Botolii koko'do nala bepoo, sama leo lates manapoo poo ka. Ala kokolak ka'da dede'a-kokola tipu-daik, ma lakamu-lakadau, sama leo menge malaso ka.

¹⁴ Ala hii ka'da soo-supa, ma tao balakaik.

¹⁵ Ala la'ok lai-lai metema ala sanga fepa-li'u ma taolisa hataholi.

¹⁶Tao nakalulutuk ma toto'a-tataa ka ala sele nggalin nai basa mamanak lala'ena.

¹⁷Ta lita eno tetu-tema ka fa,

¹⁸ ma ala ta fe ha'da-holomata neu Manetualain fa.”

¹⁹Besak ia ita bubuluk basa, hoholo-lalanek fo nanasula basak nai agama Yahudi a hoholo-lalanen dale ndia, soaneu hataholi fo laso'da lai hoholo-lalanek ndia paleta na dae. No enok ndia, ta hapu hataholi esa boen, hapu fe ne'ek hata-hata so'on, ma Manetualain kalaak basa daebafa ka lala'ena.

²⁰ Nana ta hapu hataholi esa boen, hapu enok soaneu malole falik no Manetualain, nanahu hataholi ndia tao-no'i dede'ak manai agama hoholo-lalanen dalek. Nasafali na, hoholo-lalanek ndia, ka'da natu'du hataholi daebafa ka nae, hataholi daebafa ka masala-masingok mesa-mesan.

²¹Tehu besak ia, Manetualain natu'du basa fe hataholi daebafa ka, eno na tao leo beek fo ala malole falik lon; tehu enok ndia, ta natutik no agama Yahudi a, hoholo-lalanen fa. Dede'ak ndia nanasulak nai Musa no nabi la susulan dale boe nae,

²² metema hataholi daebafa ka nau malole falik lo Manetualain soona, muse lamahele Yesus Kristus. Manetualain tao leondiak fo hataholi daebafa ka lamahele Yesus Kristus, nana basa-basas matak esa:

²³Basa hataholi la lasala-lasingo, de lalai la'oela Manetualain fo manafes maso'dak ndia so.

²⁴Hu ka nde Manetualain fe hiik susue-lalain neu hataholi daebafa ka, de hataholi daebafa ka tututi-nanaton malole falik lo Manetualain; eno na nde, Kristus Yesus soi po'i hataholi daebafa ka.

²⁵Manetualain feheni Kristus Yesus, fo ela no mamaten ndia, hataholi daebafa ka nanafa'dak natapo'i neme sala-singo ka mai, metema lamahele neun. Manetualain tao leondiak soaneu natu'du ndo matetu na. Nana nai tepo lele makahulu na, Manetualain ta haelai namanasa hataholi daebafa ka sala-singo nala fa, de nalosa Ana ta huku fas.

²⁶Tehu besak ia, Ana ta tao mangana'uk neu sala-singo ka fo natu'du ndo matetu na. No enok ndia, natu'du ndo matetu na; ma hataholi fo namahele neu Yesu sa nananafa'dak da'dileo hataholi fo ana malole falik no Manetualain so.

²⁷Hu ndia de, ita ta hapu seluk ne'ek soaneu tamatutua-tamadedema fa. Taol e'e de, leondiak? Ade hu ka nde, ita tao tatetu hata fo nanasulak nai agama Yahudi hoholo-lalanen dale do? Ta leondiak fa. Te hu ka nde, ita tamahele.

²⁸Nana dede'a ka isi na nae leoia: Hataholi fo nananafa'dak ana malole falik no Manetualain, ta hu ka nde ana tao natetu hata fo nanasulak nai agama Yahudi hoholo-lalanen dale fa, te hu ka nde namahele Yesus Kristus.

²⁹Do ka'da hataholi Yahudi la mesa kasa Manetualain ndia do? Ade leoina fe'e kala Manetualain ta ndia fa do? Hei, memak tete'e ka leoina fe'e kala Manetualain ndia boe!

³⁰ Nana Manetualain ka'da esa mesa kana. Ndia nde fe hataholi Yahudi la malole falik lo Manetualain, hu ka nde lamahele. Ma Ndia boeo nde fe leoina fe'e kala malole falik lon, nana lamahele boe.

³¹Ade dede'ak ia, ta nanuu sosoa-ndandaak nae, hu ka nde ita tamahele Kristus, boema ita tu'u-tapaheni agama Yahudi a hoholo-lalanen do? Ta leondiak fa! Nana hu no ita namahehelen ndia de, ita so'ulaik hoholo-lalanek ndia.