Read Termanu ROMA 4 Bible Online

ROMA 4 - Termanu bible

ROMA 4

¹Metema leondiak soona, hata fo ita hapu tafa'dan la'eneu Abraham fo ita leoina na bei ba'ikai na? Ade so'da na tao leo beek?

²Metema tatao-nono'in nde tao na Manetualain sipo kana da'dileo hataholi fo nandaa no Manetualain dale na soona, ana hapu ne'ek soaneu namatutua-namadedema ao na. Tehu ta namatutua-namadedema ao na nai Manetualain matan fa.

³ Nai Susula Malalaok dale, nanasulak nae, “Abraham namahele Manetualain, de hu ka nde namahehelen ndia de, Manetualain sipo kana da'dileo hataholi fo nandaa no Manetualain dale na.”

⁴Hataholi manamaue-maosa ka, ana sipo ngga'di; tehu ana ta sipo hiik ngga'din ndia fa, nana hataholi ndia hak ndia.

⁵Tehu hapu hataholi nggelok, ta lamahena neu ka'da sila ue-osan ndia mesa kana fa; te ana fe so'da na neu Manetualain fo manafe do'o do ampon neu sala-singo ka. Hu ka nde hataholi ndia namahehele na de, Manetualain sipok hataholi ndia, da'dileo hataholi fo nandaa no Manetualain dale na.

⁶Dauk hahapu na leondiak boe; hu ndia de nae, hataholi fo Manetualain sipo kana da'dileo hataholi fo nandaa no Manetualain dale na ndia, naua-nanale, ma Manetualain kokaheni, hataholi ndia tatao-nono'i masala nala. Dauk nafa'da nae leo ia,

⁷ “Maua-manalek neu hataholi fo Manetualain ta leke sala-singo nala, ma Manetualain fe do'o do ampon neu sala-singo nala!

⁸Maua-manalek neu hataholi fo Lamatua ka ta naketu-nala'di sala-singo nala fa!”

⁹Ade Manetualain fe ua-nalek ia neu ka'da hataholi manatunga suna ta nakanenete nala do? Do Manetualain fen neu hataholi ta manatunga suna ta nakanenete na boe do ta? Ami kokolak basan mae, Manetualain sipok Abraham da'dileo hataholi fo nandaa no dale na, nanahu namahele Manetualain.

¹⁰Naa, Manetualain nafa'da dede'ak ndia ndek faihi'da ka? Ndek beita sunat Abraham fa do sunat basan so? Memak ndek beita suna tana fa, te ta ndek sunat basa nana fa.

¹¹ Neu makabui na besa ka suna tana, tehu sunat ndia ana da'di ka'da ta'du esa nae, hu ka nde namahehele na de, Manetualain sipo kana da'dileo hataholi fo nandaa no dale na. Manetualain sipo kana ndek ana beita tunga suna ta nakanenete na fa. Boema ana da'di ama salanik neu basa hataholi kamahehele kala, ma hu ndia de Manetualain sipo kana da'dileo hataholi fo nandaa no dale na, leomae ana ta tunga suna ta nakanenete na fa.

¹²Abraham da'di ama salanik neu hataholi manatunga suna ta nakanenete na boe. Tehu, ta hu ka nde sila tunga suna ta nakanenete na boema, Abraham da'di sila ama salanin, te hu ka nde sila lamahele Manetualain sama na leo Abraham namahele te, ana beita tunga suna ta nakanenete na boe.

¹³ Manetualain helu Abraham no tititi-nonosi nala nae, daebafak ia neukose ana Abraham nuun. Manetualain helu nae leondia nana, ta hu ka nde Abraham tunga agama Yahudi hoholo-lalanen fa, te hu ka nde namahele Manetualain nalosa Manetualain sipo kana da'dileo hataholi fo nandaa no dale na.

¹⁴ Nana metema ka'da hataholi manatunga agama Yahudi hoholo-lalanen sila mesa kana neukose ana sipo hata fo Manetualain helu ka soona, namahehelek neu Manetualai na sosoa-ndandaan ta makandondook, ma Manetualain hala hehelu na boeo pepekok ndia.

¹⁵Agama Yahudi a hoholo-lalanen nini Manetualain huhuku-dodokin. Tehu metema hoholo-lalanek ta soona, la'olena ko ta boe.

¹⁶ Da'di, Manetualain hala hehelun ndia, tunga ka'da namahehelek neu Manetualai na. Dede'ak ndia ana da'di bua pepe'dak esa soaneu basa Abraham tititi-nonosi nala nae, Manetualain fe hiik hala-hehelun ndia neu sila; ta ka'da neu sila fo manatunga agama Yahudi hoholo-lalanen mesa kana fa, tehu neu sila fo lamahele neu Manetualain sama leo Abraham namahele Manetualain boe. Nana Abraham nde bee na, ita basa-basa tala ama salanin ndia.

¹⁷ Nana Manetualain nafa'da Abraham nae leoia, “Au fe o da'di amak neu basa leoina lala'ena.” Eno na leondiak Manetualain fe hala hehelu na neu Abraham. Boema Abraham namahele neun. Ndia nde Manetualain manatao naso'da falik hataholi manamate kala; Manetualain ndia boeo nde Manetualain fo ka'da Ana kokolak fo hata manada'di beita ka, ana da'di.

¹⁸ Abraham ka'da namahena ma namahele nakandoo, leomae ta hapu namahehenak so'on. Hu ndia de ana da'di amak neu leoina makadotok. Sama na leo nanasulak nai Susula Malalaok dale nae, “Neukose o tititi-nonosim lamade'u-lamaba'u lanseli.”

¹⁹ Nai lelek ndia, Abraham bubuluk basan, tao leo beeo ana ta hapu tititi-nonosik so'on, nana namalasi nanseli, boema teu na hihii nae natun esa so; nakalenak bai, saoinan Sara, manabongi tak. Tehu Abraham namahehele na boetai namatua ka.

²⁰Abraham namahele nahele ma dale na ta naba'e neu Manetualain hala hehelun ndia. Nakalenak namahehele na tao nan boetai balakaik de nalosa ana koa-kio Manetualain.

²¹Abraham namahele nanseli nae, Manetualain hapu tao natetu hata fo Ana helu basa ka.

²²Hu ndia de Manetualain sipok Abraham da'dileo hataholi fo nandaa no dale na.

²³Dede'ak fo nae, “Nanasipok da'dileo hataholi fo nandaa no Manetualain dale na”, nanasulak ta soaneu ka'da Abraham mesa kana fa,

²⁴tehu soaneu ita boe. Neukose ita boeo nanasipok da'dileo hataholi fa nadaa no Manetualain dale na boe, nanahu ita tamahele Manetualain fo manatao naso'da falik Yesus fo ita Lamatua na, neme mamate sa mai.

²⁵ Yesus ndia nanafe henik soaneu nanataonisak nanahu ita sala-singo nala; boema Manetualain tao naso'da fali kana, soaneu Ana soi enok fe ita malole falik to Manetualain.