Read Termanu ROMA 6 Bible Online

ROMA 6 - Termanu bible

ROMA 6

¹Metema leondiak soona, ita tae le'e bai? Ade ata tao sala-singok takandoo fo daenga Manetualain boetai sue-lai ita do?

²Tao leo beeo ta leondiak fa! Nana sala-singo ka, ta koasa ita so'on. Hu ndia de, hapu nai bee, ita bole tao sala-singok takandondoo henin?

³Ade emi ta bubuluk, lelek fo ala salani ita, nai lelek ndia ita da'di esa to Kristus fa do? Dede'ak ia sosoa na nae, ita da'di esa to Kristus nai mamate na dalek.

⁴ No oe salanik ndia de, latoi ita to Kristus fo daenga ita mate sama-sama to Kristus, fo ela no Amak fo mandela-masa'ak ndia koasa na, fo Ana tao naso'da falik Kristus neme mamate na mai, de ita boeo hapu so'da beu ka.

⁵Metema ita da'di esa to Kristus nai mamate na dalek soona, neukose ita da'di esa to Kristus, fo ita boeo nanatao naso'da falik sama na leo Kristus boe.

⁶Ita bubuluk basa, ita ha'da-tatao daebafa na, Kristus mate non neme ai nggangek lain, fo ela Kristus tao nakalulutuk ita ha'da-tatao masala-masingon ndia koasa na; no enok ndia de, sala-singo ka ta paleta ita so'on.

⁷Nana metema hataholi esa maten soona, sala-singo ka ta koasa hataholi ndia so'on.

⁸Metema ita mate to Kristus soona, ita taso'da ton boe.

⁹Nana ita bubuluk basa, Manetualain tao naso'da falik Kristus neme mamate sa mai so, de Ana ta mate so'on; nana mamate sa, ana ta koasan so'on.

¹⁰Kristus mate soaneu sala-singo ka. Kristus mamaten ndia, ana da'di ka'da la'iesa, losa dodoo na. Boema Kristus maso'dan besak ia, nde been-na naso'da soaneu Manetualain.

¹¹Emi muse manaku, emi ta tao sala-singok so'on, te emi da'di esa mo Manetualain, tunga Kristus Yesus.

¹²Boso po'ilotak sala-singo ka koasa seluk emi so'da mana fuu-mopok ia, fo ela emi boso tunga emi hihii-nanau mangalau ma.

¹³Boso fe emi ao paa ma neu sala-singo ka fo ana paken, soaneu tao-no'i tatao-nono'i mangalau ka. Te fe emi so'da ma leo Manetualain neu, sama leo hataholi manalali neme mamate sa leo maso'da ka dalek neu. Fe la'iesak emi so'da ma leo Manetualain neu, fo Ana paken soaneu makalala'ok hihii-nanaun.

¹⁴Boso fe sala-singo ka, koasa emi bai, nana emi ta maso'da nai agama Yahudi hoholo-lalanen dale so'on, te emi maso'da nai Manetualain susue-lalai na dalek so.

¹⁵Besak ia, dede'a ka isi na nae leo bee? Ade ita bole tao sala-singok, nana ita ta nai agama Yahudi hoholo-lalanen koasan dale so'on, te ita nai Manetualain susue-lalain koasa na dalek do? Ta leondiak fa!

¹⁶Emi bubuluk basa, metema hataholi esa paleta emi tunga hataholi ndia dale hihii na soona, emi da'di ata neu hataholi ndia so, ta bubuluk emi da'di sala-singo ka atan fo no emi leo mamate sa dalek meu, do emi da'di ata fo tunga Manetualain, fo no enok ndia, emi malole falik mo Manetualain.

¹⁷Tehu moke makasi neu Manetualain! Nana makahulu na, emi da'di sala-singo ka atan, tehu besak ia emi tunga nanoli ndoos fo lanoli emi no dale katematuak.

¹⁸Lamatua ka soi-tefa nala emi neme sala-singo ka mai, de besak ia emi da'di ata neu Manetualain de tunga hihii-nanaun.

¹⁹Hu ka nde emi malela ma beita dai fa de, au pake dede'a ata ndia, fo ana da'di natutu'duk esa soaneu emi, fo sue kande emi malelak sosoa-ndandaan lai-lai. Makahulu na tatao-nono'i manggenggeok ma tatao-nono'i mangalau kala, ala tao emi da'di ata soaneu tao tatao-nono'i mangalau kala. Leondiak boe besak ia, ela leo been-na emi fe la'iesak emi so'da ma neu Manetualain fo da'di ata soaneu tunga hihii-nanaun.

²⁰Lelek fo emi bei da'di ata neu sala-singo ka, Manetualain hihii-nanaun ta nai emi dalem dale so'on.

²¹Nai lelek ndia, emi hapu nanalak hata neme basa tatao-nono'ik fo besak ia emi tao-no'in no bibii-mamaek ndia? Basa tatao-nono'ik sila la ninini na ka'da mamate sa!

²²Tehu besak ia, Lamatua ka soi-tefa nala emi neme sala-singo ka mai so, de emi da'di Manetualain atan so. Emi hapu nanala'ka nde, emi maso'da soaneu ka'da Manetualain fo tatao-nono'ik ndia buna-boan nde so'da matetu ka ma manaketu basa ta ka.

²³Nana sala-singo ka ngga'di na nde mamate sa; tehu Manetualain baba'e-babatin nde so'da manaketu basa ta ka nai Yesus Kristus dalek.