Read Termanu 1 KORINTUS 15 Bible Online

1 KORINTUS 15 - Termanu bible

1 KORINTUS 15

¹Ma besak ia, tolano-tolanoo ngala lemin, au nau emi mafandendele seluk, Hala Malole maneme Manetualain mai fo au tui-benga akahulu kana neu emi so. Emi sipo man de emi mamahele Kristus, nana Hala Malole ndia.

²Metema emi ho'u mahehele hata fo au tui-bengak ndia soona, Hala Malole ndia soi-tefa na emi, ta'da fe'e metema emi mamahele ta no malelak fa.

³ Hata fo au anduku-alosa kana neu emi ndia, nde bee na hata fo au sipon boe. Fo nanapaluuk nanseli a, sama leo nanasulak nai Susula Malalaok dale, au anduku-alosa kana neu emi ae, hu ka nde ita sala-singon de Kristus mate;

⁴ latoi henin so, tehu basa boema naso'da falik nai fai katelu na. Ndia boeo, nanasulak nai Susula Malalaok dale.

⁵ Au tui-benga neu emi boe, au afa'da ae Kristus fo naso'da falik ndia, natu'du aoina na neu Petrus boe, ma basa boema neu hataholi nadedenu kasanahulu dua nala.

⁶Basa ndia boema, natu'du aoina na seluk neu hataholi manatungan, lenak neme natun lima la'iesa tutik. Hataholi sila la, ba'u na bei laso'da losa besak ia, ka'da sila de'ubee soona mate sos.

⁷Basa ndia boema, Kristus natu'du aoina na neu Yakobis, de basa boema, neu basa hataholi nadedenu kala.

⁸ Natu'du aoina makabui mate'e na neu au boe, au fo sama na leo ni'iana beuana fo nanabongik ta la'e fai na fa!

⁹ Au nde bee na Lamatua ka hataholi nadedenun fo nai daeanak nanseli. Au ta andaa nanaseseik Lamatua ka hataholi nadedenun fa, nana au fepa-li'u basa Manetualain hataholi kamahehele nala so.

¹⁰Tehu, hu ka nde Manetualain susue-lalain, de au da'di sama leo au fo besak ia. Ma ta palsuma, Manetualain fe do'o do ampon neu au fa. Nakalenak bai, au nde puselaipana lenaheni basa Lamatua ka hataholi nadedenu fe'e nala; Tehu tunga ndo na au ue-osang ta ndia fa; te ndia fo Manetualain manasue-lai au ma manatao-no'i sama-sama no au a, ue-osan ndia.

¹¹Da'di, neme emi see mai boe, fo manasipok Hala Malole ndia, ade ndia neme au a mai, do neme Lamatua ka hataholi nadedenu fe'e nala mai, ndia ta da'di hata-hata fa. Fo nanapaluuk nanseli a nde, ami tui-benga Hala Malole ndia, ma emi mamahele.

¹²Metema hata fo ami tui-bengak ndia nde nae, Kristus nanatao naso'da falik neme mamate sa mai soona, tao le'e de hapu nai emi dalek, nggelok lafa'da lae, neukose hataholi manamate kala, ta nanatao naso'da falik fa?

¹³Metema tete'e ka, hataholi manamate kala, neukose ta nanatao naso'da falik fa soona, dede'ak ndia sosoa na nae, Kristus ta nanatao naso'da falik neme mamate sa mai fa.

¹⁴Ma metema leo uni ka, Kristus ta nanatao naso'da falik neme mamate sa mai fa soona, palsuma la'iesa kana ami tui-benga hata-hata, ma palsuma la'iesa kana emi mamahehele boe, nana emi namahehelem ndia ta nanuu netes hata-hata fa.

¹⁵Lenak neme ndia mai a, nananitak nae ami masapepeko la'eneu Manetualain, nana ami tui-benga mae, Manetualain tao naso'da falik Kristus neme mamte sa mai so, te se'kona Manetualain ta tao naso'da fali kana fa, metema memak tete'e ka, hataholi manamate kala ta nanatao naso'da falik fa!

¹⁶Nana metema hataholi manamate kala, ta nanatao naso'da falik neme mamate sa mai fa soona, Kristus boeo ta nanatao naso'da falik neme mamate sa mai fa.

¹⁷Ma metema Kristus ta nanatao naso'da falik neme mamate sa mai fa soona, emi namahehele ma sosoa-ndandaan ta; dede'ak ndia sosoa na nae, emi bei maso'da nai ha'da-tatao masala-masingo ka dalek, ma emi ta manuu namahehenak makandondook fa.

¹⁸Ndia sosoa na boeo nae, hataholi kamahehelek fo manamate basa kala, boeo ta lanuu namahehenak fa.

¹⁹Metema ita namahehenan neu Kristu sa, nate'e ka'da ita maso'dan manai daebafak ia soona, neme basa hataholi daebafak manai daebafak ia lala'ena, ita nde susa-soen ba'una seli!

²⁰Tehu nananitak, Kristus nanatao naso'da falik neme mamate sa mai so. Ia nde da'di bua nape'dak esa nae, hataholi manamate basa kala, neukose nanatao naso'da falik.

²¹Nana, mamate sa masok leo daebafa ka tunga hataholi esa, leondiak boe, naso'da falik neme mamate sa mai, nanafek neu hataholi daebafa ka tunga hataholi esa boe.

²²Sama leo basa hataholi daebafa ka mate, nana nanalekek da'di esa no Adam, leondiak boe, neukose basa-basan nanatao naso'dak, nana nanalekek da'di esa no Kristus.

²³Tehu neukose esa-esak nanatao naso'da falik tunga ndia baba'e na: makasososa na Kristus; basa boema mahani te nai lelek Ana mai selu ka, hataholi-hataholi fo nanalekek Kristus nuu nala, tunga esa-esak baba'en.

²⁴Basa ndia soona, fai mate'e ka losa. Neu faik ndia te, neukose Kristus sengi basa manapaleta lala'ena, basa manakoasa lala'ena, ma basa mabe'i-balakai kala lala'ena; soona Ana fe Ndia koasa paletan leo ita Aman Manetualain neu.

²⁵ Kristus muse paleta nahele, losa Manetualain fe Kristus musu noon nala lakaluku-lakatele leun.

²⁶Musu mate'ek fo neukose Ana sengi nana, nde mamate sa.

²⁷ Nai Susula Malalaok dale, nanasulak nae leo ia, “Manetualain tao na basa hata lala'ena lakatele leun so”. Dede'ak fo nae “basa hata lala'ena”, ndia sosoa-ndandaan nde, ta leke Manetualain fo manatao na basa hata lala'ena ndia, lakatele neu Kristus.

²⁸Tehu basas lala'ena lakatele leu Kristus paleta na dae, soona Ndia mesa kana fo nde Manetualain Ana na, neukose Ana fe aoina na neu Manetualain fo manatao na basa-basan lala'ena lakatele neun so. Soona neukose Manetualain mesa kana nde paleta basa hata lala'ena.

²⁹Metema hataholi manamate kala ta nanatao naso'da falik fa soona, tao le'e de hapu hataholi nanasalanik soaneu hataholi manamate ka? Sosoak hata, ala tao dede'ak ndia? Metema memang hataholi manamate ka ta nanatao naso'da falik makandondook fa soona, sosoak hata, ala tao dede'ak ndia?

³⁰Ma sosoak hata, ami nau masasale matak mo susa-soe tunga-tunga faik?

³¹Tolano-tolanoo ngala lemin! Tunga faik, au akatatakak doidoso ka, au amahoko hu ka nde emi maso'da ma, nana emi mamahele basa neu Kristus Yesus, fo ita Lamatua na so.

³² Metema ndia tunga ka'da hataholi daebafa ka tai-dodoon mesa kana soona, au hapu nananalak hata soaneu sanga enok nono'ka bai de, au la'ban bana makaa kala nai kota Efesus ia? Metema memang hataholi manamate kala ta nanatao naso'da falik fa, naa, malole lenak ita tunga dede'a bini esa ia nae, “Mai fo ata ta'a-tinu, ma hika-setelee, nana balahaa te, neukose ita mate so.”

³³Boso fe hataholi ke'dindiu na emi. Leleo-napalasa ta malole a, tao nalutu ha'da-palii malole a.

³⁴Besak ia, mame'dak leona, fo boso boe tao sala-singok bai. Ndandaa na emi muse bii-mae, nana nai emi dalek, hapu nggelok beita lalelak Manetualain fa.

³⁵Fafa'kama hapu nggelok latane lae, “Tao leo bee fo hataholi manamate kala nanatao naso'da falik? Ao paak fo leo bee ka nde nanafek neus, nai lelek nanatao naso'da falik?”

³⁶Nggoak nanseli! Metema emi sele bini-ngges leo dae dale neu, soona bini-ngges ndia neukose ana ta moli fa, metema bini-ngges ndia beita mate nakahulu kana fa.

³⁷Ma bini-ngges fo emi selen nai dae dale ndia, fafa'kama bini-ngge gandum, do bini-ngge fe'ek, nde bee na bini-ngges ndia de'e na mesa kana, fo mahani te manamolik ndia, neukose ta basa bubu'u-palusa lala'ena fa.

³⁸Neukose Manetualain mesa ka nde fe bini-ngges ndia lupak fo tunga mata memete na malole soaneu bubu'u-palusa ndia. Soaneu basa bini-ngge mata-mata kala, Manetualain fe bubu'u-palusa na, esa-esak nok lupa na.

³⁹Basa hata mahahae kala ao nala ta matak esa fa. Hataholi daebafa ka ao na fe'ek, bana-manu ao paa na fe'ek boe; manupui la ao na fe'ek neme i'a ka ao na.

⁴⁰Leondiak boe, no basa hata manai lalai no daebafa ka. Hata manai lalai la esa-esak nok lole-napun, ma hata manai daebafa kala leondiak boe.

⁴¹Le'do a lole napun fe'ek neme bula ka lole napun. Nduu kala boeo, esa-esak nok lole napun. Lena-lenak nduuk sila la esa-esak nok lole-napun.

⁴²Mahani te dede'a na da'di tao leondiak no hataholi manamatek fo nanatao naso'da fali ka boe. Ao paak fo nananatoik ndia nde bee na, ao paak fo bisa pulu po'on, tehu ao paak fo nanatao naso'da fali ka nde bee na, ao paak fo ta bisa pulu po'o fan.

⁴³Nai lelek fo ao paak ndia nananatoik, ao paak ndia ta malole ma ndole-ndaku, tehu nai lelek fo nanatao naso'da fali ka, ao paak ndia nde bee na ao paak malole ma balakaik.

⁴⁴Nai lelek latoi-latono nana, ao paak ndia ao paak neme daebafa ka mai; tehu nai lelek fo naso'da falik soona, ao paak ndia ao paak fo nanafek neme Manetualain Dula Dale na mai. Hapu ao paak fo neme daebafa ka mai, ma hapu ao paak fo neme Manetualain mai.

⁴⁵ Nanasulak nai Susula Malalok dale nae leo ia, “Hataholi makasososa ka nde Adam, fo ana da'di mahahae maso'dak”, tehu Adam fo makabui ka, nde Dula Dalek fo manafe maso'da ka.

⁴⁶Fo manamai makahulu ka nde bee na ao paa ka, te ta dula dale ka fa. Dula dale ka mai nakabuik.

⁴⁷Adam makasososa ka, da'di neme dae a mai, tehu Adam kadua da'di neme nusa so'da ka mai.

⁴⁸Hataholi daebafak ia nde bee na, sama leo Adam makasososa ka, fo nananakadada'dik neme dae a mai, tehu hataholi nusa so'da ka nde bee na, sama leo Ndia fo manamaik neme nusa so'da ka mai.

⁴⁹Sama na leo ita, besak ia nde bee na sama leo Adam, fo nananakadada'dik neme dae a mai, soona mahani te neukose ita da'di sama leo Ndia, fo manamaik neme nusa so'da ka mai.

⁵⁰Tolano-tolanoo ngala lemin, au dudu'a nga nde bee na: ao paak fo nananakadada'dik neme daak ma paa ia, ana ta hapu masok leo Manetualain Daebafa Beu na fa; ma ao paak fo hapu maten ia, ana ta hapu da'di matea-mahelek fa.

⁵¹ Taoafik neu dede'a bibila-babaak ia: Neukose ita basa-basa tala ta mate fa, tehu ita basa-basa tala neukose nanatao nasafalik.

⁵²Dede'ak ndia neukose ana da'di no kaiboboianak nai hatematak esa dalek, nai lelek fo pupuu ka nanapuuk soaneu mate'e na. Nana nai lelek fo pupuuk ndia lii na nananamanenek soona, neukose hataholi manamate kala nanatao naso'da falik ninik ao paa matea-mahelek, ma ita basa-basa tala neukose nanatao nasafalik.

⁵³Ita ao paan fo hapu maten ia, muse nananggatik ninik ao paak fo ta hapu mate fan, no enok ndia ao paak maneme daebafa ka, muse nananggatik ninik ao paak maneme nusa so'da ka mai.

⁵⁴ Metema ao paak fo manamate basa ka, nananggatik ninik ao paak fo ta hapu mate fan, ma ao paak maneme daebafa ka, nananggati basak ninik ao paak fo maneme nusa so'da ka mai soona, nai lelek ndia besa ka ana da'di hata fo nanasulak nai Susula Malalaok dale nae, “Mamate sa nanatao nakalulutuk so; sesengi ka hapun so!”

⁵⁵ “Hai mamates, o sesengi ma nai bee? Hai mamates, o made'de ma nai bee?”

⁵⁶Mamate sa, madene na nde sala-singo ka, fo sala-singo ka nakalala'ok ue-le'din tunga agama hoholo-lalanen.

⁵⁷Tehu toke makasi neu Manetualain; Ana fe ita sesengik tunga ita Lamatuan Yesus Kristus!

⁵⁸Hu ndia tolano-tolanoo susue-lalai ngala lemin! Ela leo bee na, emi balakaik ma matea-mahele. Maue-male'di makandoo soaneu Lamatua ka no te'e-te'ek, nana emi bubuluk mae, hata fo emi tao-no'in soaneu Lamatua ka, ta palsuma fa.