Read Termanu 1 KORINTUS 5 Bible Online

1 KORINTUS 5 - Termanu bible

1 KORINTUS 5

¹ Tunga ndo na, au sipo basa halak lae, nai emi dalek sosoa-piao ka su'diselin, de nalosa emi nggelok hohonge seluk inapala na. Hataholi fo ta nalelak Lamatua ka fa boeo, ana ta tao leondiak fa!

²Leomae leondiak boe, emi bei koao-ndaeao bai. Tunga ndo na, emi dale ma muse he'di sa, fo kaluaheni hataholi manatao tatao-nono'ik leondia ka neme emi dalek mai.

³Tunga ao paa ka soona, au doo ka eme emi mai, tehu tunga samane ka soona, au nai emi tala'daheom. Da'di au nau tao nono'kabai de, au nai emi tala'da, “No Lamatuak Yesus Kristus na'de na, au afa'da ae, hataholi manatao tatao-nono'i manggenggeok leondia ka, muse hukus!” Metema emi makabubua soona, bole mafa'da mae, au nai emi tala'da, ma no ita Lamatuan Yesus Kristus koasa na,

⁵emi muse fe hataholi ndia leo Nitu neu, fo ela hataholi ndia ao paa na nakalulutuk, fo no enok ndia, dula dale na hapu so'dak, nai lelek fo Lamatua ka fali ma'in.

⁶ Ta nandaa emi koao-ndaeao fa. Fafa'kama emi malelak basa dede'a lasi ka nae, “Laluteik faa anak tao na ha'de sopu nanakame ka basa-basan sa'e!”

⁷ Tu'u-tapaheni makahuluk lalutei palaak ndia, fo nde lalutei sala-singo ka, fo ela emi dadi ha'de sopu nanakame beuk fo balisi neme lalutei sala-singo palaa ka mai, fo daenga au bubuluk ae, memak emi leondiak. Nana ita feta Paskah na nanasadia basak, hu ka nde Kristus nde da'dileo ita bi'ilopo Paskah na, fo nanatunu-hotu basak so.

⁸ Da'di mai fo ata teu tao ita fetan ndia, ninik loti lalutei ta ka, fo nde loti fo ana dadi ta'du matetu-mandaak esa nae, basa-basan nandaa no Manetualain dale na. Ita boso tao feta Paskah ndia ninik loti fo nanapake laluteipalaak fo nde lalutei sala-singo ka ma tatao-nono'i mangalau ka.

⁹Nai au susula makahulu nga dalek, au afa'da emi, fo ela emi boso leo mapalasa mo hataholi manasosoa-piao kala.

¹⁰Fo au afa'da ka, ta nde hataholi manasosoa-piaok, do tenepetak, do manatipu-daik, do manasongo tangok, fo ta lelak Manetualain makandondook fa. Ta! Au dudu'a ka ta nde hataholi sila la fa; nana metema emi muse madook emi aoina ma neme hataholi sila la mai soona, tao leo bee o paluu emi kalua la'oela daebafak ia.

¹¹Au dudu'a nga nde ia ae, emi boso leo mapalasa mo hataholi fo ana manaku nae, ndia hataholi Salanik, tehu hataholi ndia manasosoa-piaok, do manatene petak, do mana songo-tangok, do ana hii ka'da tao nanggenggeo hataholi fe'ek na'den, do manamafuk, do nakodaa. Mangatuuk mi'a mo hataholi sila la boeo, bosok!

¹² Memak naketu-nala'di hataholi ta Salani ka, au ito-atong ta ndia fa. Neukose Manetualain nde naketu-nala'di hataholi sila la. Tehu la'eneu emi hataholi salani mala soona, ade emi ta nde maketu-mala'di sala fa do? Nai Susula Malalaok dale nanasulak nae, “Usiheni hataholi manatao tatao-nono'i mangalau kala, leme emi tala'da mai.”