Read Termanu 2 KORINTUS 1 Bible Online

2 KORINTUS 1 - Termanu bible

2 KORINTUS 1

¹ Tolano-tolanook fo Manetualain hataholi kamahehelen manai Korintu sala, ma Manetualain hataholi kamahehelen manai Akhaya la, lala'ena lemin. Au, Paulus fo Kristus Yesus hataholi nadedenun, fo nanaso'uk tunga Manetualain hihii-nanaun, sama-sama no ita tolanoon Timotius,

²ami mamahena, ela leo bee na ita Aman Manetualain ma Lamatuak Yesus Kristus fe baba'e-papalak ma so'da-molek neu emi.

³Koa-kio Manetualain fo ita Lamatuan Yesus Kristus Aman. Ndia Amak fo dale na malole nanseli, ma Ndia Manetualain basa oe mata manakokoe-nanasik lala'ena.

⁴Ana tao natea-nahele ami dale ma, nai lelek fo ami la'ola'di toto'a-tataa ka, fo ela no be'i-balakaik fo ami sipon neme Manetualain mai ndia, ami boeo hapu tao matea-mahele basa hataholi manai toto'a-tataa ka dalek.

⁵Doidosok-doidosok fo Kristus la'ola'di kala, ba'u ka ami la'ola'din so boe. Ma tunga Kristus boe, de ami dale ma nananatetea-nahehelek nanseli.

⁶Metema ami la'ola'di toto'a-tataa ka soona, ndia nde bee na mana matetea-mahehele emi dale ma, hu ka nde emi so'da-mole ma. Metema ami dale ma nananatetea-nahehelek soona, emi boeo nananatetea-nahehelek, nalosa emi da'di mana makatatakak nai toto'a-tataa ka dalek sama leo ami mame'da mita doidoso ka boe.

⁷Ami mamahele tataas esa, ma ami dale ma ta beita la'iesa fo ana falahaa la'eneu emi, nana ami bubuluk basa, emi doidoso mo ami. Ma hu ndia de, emi boeo tunga nananatetea-nahehelek sama-sama mo ami.

⁸ Tolano-tolanoo ngala lemin! Ami nau emi bubuluk la'eneu toto'a-tataak fo ami la'ola'din nai nusa Asia. Doidosok fo ami lu'a-lepak ndia, ana ne'e nambela ami de nalosa ami ta mamahena neukose maso'da so'ok;

⁹nakalenak ami mame'dan sama leo ala huku lisa ami nde ndia so. Tehu dede'ak ndia ana da'di, fo daenga ami boso masalai neu ami be'i-balakai mesa ma, tehu ami masalai neu Manetualain fo manatao naso'da hataholi manamate kala.

¹⁰Ndia nde soi-tefa nala ami neme susa-soe mamates matuaina ndia mai. Ma mahani te neukose Ndia boeo nde neukose soi tefa nala ami nai fai makabuin, nana ami tao ami namahehena ma neu ka'da Ndia mesa kana.

¹¹Ami mamahele, no emi hule-haladoim soaneu ami a de, neukose Manetualain soi-tefa seluk ami neme susa-soe a mai. Manetualain nakaheik ba'e-pala ami da'dileo natataak neu hule-haladoi ba'u soaneu ami. Ma hu ndia de, hataholi ba'u ka neukose loke makasi neu Manetualain.

¹²Ami mamahoko nana ami dale bobongoana ma natetea-nahehele ami nae, ami maso'dam nai daebafak ia, makasososa na ami tututi-nanatom mo emi a, ami makalala'ok basan no dale ndoos ma matetuk so. Ami tao basa sila la ta no hataholi daebafak manatee teno na fa, tehu no be'ibalakaik fo Manetualain fe ka.

¹³Fo ami sulak fen neu emi a nde bee na, ka'da la'eneu dede'a-dede'ak fo emi hapu lees ma malela kana. Besak ia, emi ta malelak ami no matetu na fa, tehu au amahena mahani te neukose te'e-te'e emi malelak ami. No enok ndia, mahani te neu lelek Lamatuak Yesus fai mamai na te, neukose emi dale ma namatua neu ami, sama leo ami boeo dale ma namatua neu emi.

¹⁵Hu ka nde namahehelek ndia de neme makasososan mai a, au tutu'u basa ne'i donge-dama emi, fo ela emi hapu baba'e-papalak diku la'i dua.

¹⁶ Au dudu'a ae donge-dama emi nai au leleo-lala'ong leo Makedonia u, fo au tuli seluk emi nai au leleo-lala'o fafali ma'i nga dalek, fo ela emi tulu-fali au fo au akandoo leo Yudea u.

¹⁷Tehu au dudu'a asafali seluk au dale tutu'ung ndia so. Naa, ade ndia natu'du nae, au dale dudu'ang ndia ta matea-mahelek fa do? Lelek fo au aketu au dale tutu'ung ndia, ade au aketun tunga au hihii-nanau mesa nga, nalosa ba'ihanak soona, au ae, “Hei”, ma ba'ihanak seluk bai soona, au ae, “Ta”?

¹⁸No Manetualain fo hapu nananamahelek ndia, au helu neu emi ta nde, “Hei” ma “Ta”.

¹⁹ Nanahu Yesus Kristus fo Manetualain Anan, fo nananafa'dak neu emi neme Silas, Timotius ma neme au a, ta nde hataholi fo “Hei” ma “Ta.” Nasafali na, Ndia nde bee na natataa “Hei”, neme Manetualain mai.

²⁰Nana tunga Ndia, de Manetualain nafa'da basa nae, “Hei” neu basa hala hehelu na. Hu ndia de, ita tafa'da tae, “Amin” neu Manetualain, hu ka nde Yesus Kristus. Ami tao leondiak, fo ela Manetualain nanakoa-kiok.

²¹Manetualain mesa kana nde tao na ami ma emi tatea-tahele da'di esa to Kristus. Ndia boeo nde hele heheli ita soaneu aoina na.

²²Soaneu ndia de, Manetualain paku basa ita da'di Ndia nuun, ma Ana fe Dula Dale na leo nai ita dalen dale, da'dileo bua pepe'dak esa nae, neukose Ana fe ita basa hata fo Ana helu ka.

²³Manetualain sakasii au, nana Ana bubuluk au dale nga, au ta da'di u leo Korintus u fa nana, au ta nau tao akahehe'dik emi dale ma fa.

²⁴Au ta laka-akaseti emi la'eneu hata fo emi muse mamahelen, nana emi mamahele manseli neu Kristus so. Ka'da au tao-no'i neu esa o emi, fo ela emi boetai maua-manale.