Read Termanu 2 KORINTUS 12 Bible Online

2 KORINTUS 12 - Termanu bible

2 KORINTUS 12

¹Memak ta hapu nanalak hata esa boen soaneu namatutua-namadedema ka fa. Tehu au boeo nau amatutua-amadedema dede'ak fo Manetualain natu'dun neu au nai ninitak dale.

²Au alelak hataholi kamahehelek esa fo teuk sanahulu haa maneu ka, nanaso'uk leo mamanak fo madema nai nusa so'da ka. (Au ta bubuluk, ade ao paa na te'e-te'e nanaso'uk do ka'da ninitak esa mesa kana ndia, ka'da Manetualain nde bubulu ka.)

³Au kokolak la'iesa selu kana: Au bubuluk ae hataholi ndia nanaso'uk leo Firdaus dalek neu. Au ta bubuluk, ade ao paa na te'e-te'e nanaso'uk do fafa'ka ma ka'da ninitak esa mesa kana ndia. Ka'da Manetualain nde bubulu ka. Nai naa, hataholi ndia namanene basa dede'ak fo hataholi daebafa ka ta hapu nakasasama kana ninik dede'a-kokolak do tea na seli ba'eneu hataholi daebafa ka kokola kana.

⁵La'eneu hataholi ndia nde au nau amatutua-amadedeman, te ta la'eneu au aoina nga mesa kana fa. Nanahu metema au amatutua-amadedema aoina nga, lena-lenak dede'ak fo natu'du au tapandoe ngala nde neukose au amatutua-amadedema nana. La'eneu au aoina nga soona, ka'da basa dede'ak fo natu'du ao tapandoe nga, ndia nde au nau amatutua-amadedema nana.

⁶Leo uni ka au boeo hii amatutua-amadedema hata esa soona, au ta nau da'di hataholi manakokolak bafalouk fa, nanahu neukose au afa'da hata fo ndo sa. Tehu au akatatakak au aoina nga, fo ela ta hapu hataholi nafa'da nae, au lena neme hata fo sila lita au tao-no'in, do hata fo namanene au afa'da ka basa ka so.

⁷Tehu fo ela au boso koao-ndaeao anseli hu ka nde ninitak matuaina sila la, de au hapu he'dis matak esa nai au ao paa nga. Da'dileo Nitu nadedenu na, he'dis ndia nanahaituak soaneu ana tao na au doidoso fo ela au boso koao-ndaeao.

⁸La'i telu au hule-haladoi neu Lamatua ka, fo ela he'dis ndia nanaso'uk neme au mai.

⁹Tehu Lamatua ka nataa nae, “Au sue-lai o, de ndia dai o so, nana Au koasa nga balakai na lena, metema o nai tapandoe sa dalek.” Da'di au amahoko metema au tapandoe soona, nai lelek ndia nde au ame'da ita Kristus nasulu-nahapa au ninik be'i-balakain.

¹⁰Da'di au amahoko unik au tapandoe ngala. Au boeo amahoko, metema hu ka nde Kristus de au nakamumulu-nakamamaek, au la'ola'di toto'a-sosotak, nanausi-puuk, ma la'ola'di toto'a-tataak. Nana metema au tapandoe soona, nai lelek ndia nde au balakaik.

¹¹Tete'e ka, au tao nono'ka bai sama leo hataholi nggoak so — tehu emi nde tao ma au da'di tao leondiak. Tunga ndo na, emi nde muse koa-kio au. Nana leomae au ta soa-ndaa hata esa boen, te au ta kala makandondook la'eneu hataholi nadedenuk fo nananita-nalelak sila la fa!

¹²Manda'di beu kala, ma dede'a matuaina la, boema tatao-nono'i matua la nananatu'duk no au ta haelai amanasa emi fa, fo ela ana da'di buti esa nae, au ia hataholi nadedenuk esa.

¹³Nai dede'a bee ka dalek, nde emi ta nanataoafik fa, metema nakasasama kana no salani fe'e kala? Bole-bole ka'da nai dede'ak ia dalek: nae au ta tao susa emi soaneu sebabae au. Fe ampon neu au salang ndia!

¹⁴Besak ia soaneu kala'i telu na, au aheheleao fo au ne'i donge-dama emi. Tehu au ta nau tao susa emi fa, nana au ahii ka ta nde hata fo emi manuu ka fa, te au ahii ka nde emi aoina ma dei. Nana ni'iana la ta nde muse leu tunga sanga soaneu ina-aman so'da nala fa, tehu ina amak nde muse leu tunga sanga soaneu ana nala so'da na.

¹⁵Hu ndia de no dale namahokok, au ahiik tunu-hotu basa hata lala'ena soaneu emi, leomae au aoina nga mesa kana boe. Metema au sue-lai emi leondiak soona, ade nandaa emi ta sue-lai fa do?

¹⁶Naa, emi makaheik mae, au beita tao susa hai emi fa. Leomae leondiak boe, hapu nggelok lafa'da lae, au ia manaputa-paik. Lae au hapu nanalak neme emi mai, nanahu au tipu-dai nga.

¹⁷Hapu nai bee? Ade tunga hataholi fo au adenus leo emi leu ndia, au la'u nanalak neme emi mai do?

¹⁸Au adenu basa Titus ne'i donge-dama emi so, ma au adenu tolanoo kamahehelek fe'ek esa sama-sama non. Ade Titus ho'i nanalak neme emi mai do? Tehu ami dua maue-male'di no dudu'ak fo sama, ma mapalani minik enok fo sama!

¹⁹Bole da'di emi maedaenga dodoo basa ia, ami sanga enok masala'e ami aoina ma, la'eneu emi do? Emi dudu'a sala manseli! Manetualain bubuluk nae, basa hata fo ami mafa'dak ndia, nde bee na tunga Kristus hihii-nanaun. Ma basa hata fo ami tao-no'i ka nde bee na soaneu mafofo'a emi maso'da samane ma.

²⁰Au bibii ka'da mahani te nai lelek au ne'i donge-dama emi te, au hapu a emi ta sama leo hata fo au amahena ka, ma emi boeo hapu ma au ta sama leo hata fo mamahena ka. Boso nalosak neukose hapu nggelok lahote, lape'da dalek, dale nala lamahana beloo, paluu ka'da aoina na mesa kana, esa nakamumulu-nakamamaek esa, esa dudungu-papau esa, koao-ndaeaok, ma tao tasibu.

²¹Au bibii ka'da boso nalosak mahani te nai lelek au ne'i, te Manetualain nakadadaek au nai emi matam fo au kii-makaleleu nana sila ba'u ka nai emi dalek, makahulu na lasala-lasingo, ta lasafali dale nala, ma ala ta hahae tao sila tatao-nono'i manasosoa-piao na, manggenggeok ma ta kandaa ka fa.