Read Termanu 2 KORINTUS 2 Bible Online

2 KORINTUS 2 - Termanu bible

2 KORINTUS 2

¹Hu ndia de, au ho'i basa nakeketuk fo au ta ne'i seluk leo emi no donge-damak fo ka'da tao na emi dale he'di.

²Nana, metema au tao akahehe'dik emi soona, see ka nde kokoe-nanasi au, metema ta nde emi fo au akahehe'dik basa emi dale ma ndia fa do?

³Hu ndia de au sulak fe emi susulak ia. Au ta nau ne'i donge-dama emi fo emi makahehe'dik au, te see ko na emi nde muse tao mamahoko au. Nana au amahele, metema au amahoko soona, emi basa-basa mala mamahoko boe.

⁴Au sulak fe emi susulak ia no dale he'dik nanseli, nalosa au luu oe nga titihenin. Au ta dodoo ae, au tao akahehe'dik emi dale ma fa, tehu au nau emi bubuluk, au sue-lai emi ba'u na seli.

⁵Makanaema hapu hataholi tao nakahehe'dik emi dale ma soona, ana ta tao dede'ak ndia neu au fa, te neu emi basa-basa mala, do nai dae neu emi nggelok. Au ta kokolak dede'a lenak neu dede'ak ndia fa.

⁶Ba'eneu hataholi matak leondia ka, emi hataholi mala ba'u na ala fen nasanene'dak soona dai so.

⁷Besak ia emi muse fe do'o do ampon neu hataholi ndia, ma fe manggatek neu selu kana, fo ela ana boso dale he'di nanseli, losa ketu namahehena na.

⁸Hu ndia de au oke, fo ela emi matu'du selu kana, mae te'e-te'e emi sue-lain.

⁹Au sulak fe emi susulak ia no dudu'ak soaneu au fola emi, ade emi nau tunga mahele au natutu'du ngala do ta.

¹⁰Metema emi fe do'o do ampon neu hataholi manatao salak basa neu emi a soona, au boeo fe do'o do ampon neu hataholi ndia boe. Nana hata fo au fe do'o do ampon basan, metema memak hapu nggelok paluu nanafe do'o do ampon soona, au fe do'o do ampon neu ndia nai Kristus matan, soaneu emi malole ma.

¹¹Au tao leondiak, fo ela Nitu boso hapu loak soaneu ana koasa ita. Nana ita bubuluk basa nitu dale tutu'u na so.

¹² Nai lelek au losa Troas no dudu'ak soaneu tui-benga Hala Malole la'eneu Kristus te, Lamatua ka soi enok basa fe au fo aue-ale'di nai mamanak ndia so.

¹³Tehu au dale nga ta tesa-tama fa, nana au ta atongo o ita tolanoon Titus nai naa fa. Boema au ate'a hataholi manai mamanak ndia de au u leo Makedonia u.

¹⁴Tehu makasi neu Manetualain! Ana hela-nole ami tataas esa, fo ami la'ok nai Kristus eno sesengi na, hu ka nde ami maso'da da'di esa mon. Manetualain pake ami, fo ela halak la'eneu Kristu sa namaloa sama leo kaboominik fo nabomini leo basa mamanak lala'ena neu.

¹⁵Nana ami nde bee na, sama leo kaboomini ka boo na, fo naboomini fo Kristus nde tunu-hotun soaneu Manetualai na. Ba'eneu hataholi fo nasasale matak no momopo-mamate sa, ami ia sama leo mamate ka'boo ka, fo boo na nanisa. Tehu ba'eneu hataholi fo bei hapu nanasoi-tefak, soona ami sama leo kaboominik fo boo mini na ninis leo maso'da ka neu. Naa, see ka nde tao natetu bela ba'uk ia?

¹⁷Ami ta sama leo hataholi makadotok, fo ala tao halak maneme Manetualain mai a, sama leo bua dangan. Ami dale tutu'u ma nde bee na neuisik, nana Manetualain nde ami. Ma Manetualain mesa kana nde nita ami manduku-malosak halak ndia da'dileo Kristus ata nala.