Read Termanu 2 KORINTUS 8 Bible Online

2 KORINTUS 8 - Termanu bible

2 KORINTUS 8

¹ Tolano-tolanoo ngala lemin! Ami hii emi boeo bubuluk la'eneu tao leo beek de Manetualain malole na seli neu hataholi kamahehelek manai Makedonia la.

²Sila nanafola basak ninik toto'a-tataa mabelaina la so. Tehu nai toto'a-tataak sila la tala'da, ala lamahoko ma dale nala malole lanseli nai fe tutulu-fafali ka dalek soaneu tulu-fali hataholi fe'ek, leomae sila nuu ta-hata tak lanseli.

³Au afa'da no namahehelek ae, ala fe tunga sila hahapu na, nakalenak ala fe lenak bai. Ta no hataholi nadedenun fa,

⁴ala loke lanseli neu ami lae, metema ami nau soona, sila boeo fe tutulu-fafalik neu hataholi kamahehele kala.

⁵Ala fe lena neme ami mamahena ka. Makasososa na ala fe aoina nala neu Lamatua ka, basa boema neu ami boe, dede'ak ndia nandaa no Manetualain hihii-nanaun.

⁶Hu ndia de, ami makaseti Titus — fo ana mulai tatao-nono'ik ia — fo ela nakalala'ok nakandoo tatao-nono'i malole ia, nai emi tala'da boe.

⁷Emi nai uluk nai basa-basan lala'ena: Emi nai uluk nai dede'a namahele ka dalek, nai dede'a nafa'da hahapu ka dalek, nai dede'a malela ka dalek, nai tutulu-fafalik no te'e-te'e ka dalek, ma nai emi susue-lalaim neu ami dalek. Hu ndia de, malole lenak emi nai uluk nai tatao-nono'i malole ia dalek boe.

⁸Au ta paleta emi fo emi tao dede'ak ia fa. Tehu ka nde natu'du nae, hataholi fe'e kala manggate lanseli tulu-fali nonoo hataholi nala de au boeo nau bubuluk, emi susue-lalaim losa nai bee so.

⁹Nana emi bubuluk tete'e ka, Yesus Kristus fo ita Lamatua na sue-lai na ita ba'u na seli. Yesus kamasu'ik, tehu Ana tao aoina na da'di nuu ta-hata tak, soaneu emi paluu ma, fo ela no nuu ta-hata tan ndia, emi da'di kamasu'ik.

¹⁰Tunga au hahapu nga soona, la'e mamana na emi tao makababasak hata fo emi taon ndek teu maneu ka so. Nanahu emi nde makasososa dudu'a-dodoo ma mulai tatao-nono'ik ndia.

¹¹Naa, ela leo bee na besak ia emi makalala'ok makandoon, tunga emi nabebe'i ma. Ela leo bee na, te'e-te'e emi tao makababasak tatao-nono'ik ndia, sama leo makahulu na emi dale tutu'u ma boe.

¹²Metema te'e-te'e emi nau fe soona, neukose Manetualain sipok emi fefeem ndia, tunga hata fo emi manuun, te ta tunga hata fo emi ta manuu fan.

¹³Au ta anuu dudu'ak makandondook soaneu po'ilotak hataholi fe'e kala leme lulu'a-lelepak ia mai, nalosa au tao amabela emi. Te hu ka nde besak ia, emi so'da ma natetu so, de emi muse tao matetu hataholi sila toto'a-tataa nala. Fo ela neu faik esa, metema emi nai toto'a-tataa ka dalek, boema sila nai tetu-tema ka dalek, soona neukose ala tulu-fali emi. No enok ndia de, emi matulu-mafali ao.

¹⁵ Nai Susula Malalaok dale nanasulak nae, “Hataholi fo tutunga-sasangan ba'u ka, ta nakalena fa, ma hataholi fo tutunga-sasangan faa ka, ta kulang fa.”

¹⁶Ami moke makasi ba'u ka neu Manetualain, nana sama leo ami boe, de Ana tao na Titus te'e-te'e tulu-fali emi, de ana tulu-fali emi!

¹⁷Nana Titus ta ka'da te'e-te'e tao natetu ami nonoke ma fa, tehu ndia boeo te'e-te'e sanga tulu-fali emi, de nalosa no hihii-nanau mesa na, de ana naketu soaneu ne'i leo emi neu.

¹⁸Ami madenun no tolanook esa fo tolanook ndia nanafe ha'da-holomata nanseli nai basa hataholi kamahehele kala, nana ue-le'din nde ana tui-benga Manetualain Hala Malole na.

¹⁹Fe'ek neme ndia mai, hataholi ndia nanahele basak so boe, ma Salani kala laketu basan soaneu sama-sama no ami nai ami leleo-lala'o ma dalek. Nana neukose ami tao leleo-lala'ok soaneu manduku-malosak tutulu-fafalik ndia, fo ela Lamatua ka nanakoa-kiok, ma fo ela emi mita ami te'e-te'e nau tulu-fali.

²⁰Ami manea besa-besa fo ela boso hapu hataholi fe salak neu ami nai ami manduku-malosak tutulu-fafalik matuaina ia.

²¹ Ami nau tao tunga ka'da ndo na, ta ka'da nai Lamatua ka matan fa, tehu nai hataholi daebafa ka matan boe.

²²Sama-sama no Titus ma tolanook ndia, ami boeo haitua tolanoo fe'ek esa. Ami soba fali-fali mon so, de nananitak ana nau tulu-fali tataas esa. Ma besak ia, lena-lenak ana nau tulu-fali emi, nanahu ana tao basa namahehenan neu emi.

²³La'eneu Titus ia nde bee soona, au nonoong fo naue-nale'di no au soaneu tulu-fali emi. Ma la'eneu tolanoo kaduak fo leu sama-sama lo na, sila nde bee na hataholi fo nanadenuk neme salani kala mai ma ala da'di namatutua-namadedemak ba'eneu Kristus.

²⁴Ami mamahena emi matu'du emi susue-lalaim neus, fo ela basa salani kala bubuluk lae, emi sue-lais ma lae hata fo ami mamatutua-mamadedeman la'eneu emi nde bee na tete'e ka.