Read Termanu 2 KORINTUS 9 Bible Online

2 KORINTUS 9 - Termanu bible

2 KORINTUS 9

¹Tunga ndo na, ta paluu au sulak seluk fe emi susulak la'eneu tutulu-fafalik fo bei nanahaituak leo Manetualain hataholi kamahehelen manai Yudea la.

²Au bubuluk emi mahiik manseli tulu-fali, de au amatutua-amadedema basa emi neu hataholi manai Makedonia la so. Au afa'das ae, neme teu maneu ka, tolanook fo namahehelek esa fo manaleo nai Korintus nai nusak Akhaya, laheheleaon basa soaneu fe tutulu-fafalik so. Naa, te'e-te'e emi manggatem ndia, nafofo'a sila ba'u ka manggate na boe.

³Besak ia au adenu Titus no tolanoo ka duak sila la le'i, fo ela hata fo ami mamatutua-mamadedeman la'eneu emi ndia, boso nalupa kokola bafalouk mesa kana. Da'di emi muse maheheleaom basa so, nana au afa'das ae, emi maheheleaom basa soaneu dede'ak ndia so.

⁴Tehu au bibii ka'da boso nalosak hapu hataholi Makedonia la tunga sama-sama lo au nai lelek au ne'i. Ma metema ala hapu la emi beita maheheleaom fa soona, weh, mahani te se ami mae manseli, nana ami mafa'da basa mae, ami mamahele manseli neu emi! Ma neukose emi mae boe.

⁵Hu ka nde ndia de, au dodoo nana paluu au adenus le'i lakahuluk soaneu ito-ato tutulu-fafalik fo emi heluk ndia. Au tao leondiak fo ela mahani te, metema au ne'i soona, emi fefeem ndia nanasadiak so. No enok ndia, nananitak nae emi fefeem ndia, emi fen no dale namahokok, te ta hu ka nde laka-nakasetik fa.

⁶Mafandendek leona! Te hataholi manasele-nggali bini-ngges faa ana ka, neukose ana ketu-kolu buna-boak faa anak boe. Tehu hataholi manasele-nggali bini-ngges ba'u ka, neukose ana ketu-kolu buna-boak ba'u ka boe.

⁷Hataholi a esa-esak muse fe tunga dale hihii na. Ana boso fe no dale bibia-seselik, do hu ka nde laka-nakasetik, nana Manetualain sue-lai hataholi fo ana fe no dale namahokok.

⁸Manetualain nanuu koasa fe emi baba'e-papalak manasasi kao-kao ka, fo ela emi manuu hata fo emi paluu ka tataas esa; lena-lenak neukose emi manuu lenak soaneu tao malole ma soaneu tulu-fali hataholi.

⁹ Nai Susula Malalaok dale nanasulak nae leo ia la'eneu Manetualain, “Ana nggenggela-ngganggali fe hataholi nuu ta-hata ta kala; dale malole na manaketu basa tak, losa dodoo na.”

¹⁰ Manetualain nde sadia bini ngges soaneu manasele-nggali, ma nana'a-nininuk soaneu ita. Ndia boeo, neukose Ana sadia ma tao namaba'u hata fo emi sele nggali ka, fo ela emi dale malole ma buna-boan tama seluk.

¹¹No enok ndia, neukose emi hahapu ma dai ma lena nai basa hata lala'ena dalek, nalosa emi hapu fe tataas esa no dale malole. Ma emi fee feem fo ami baba'e ka, nini fe hataholi ba'u ka loke makasi neu Manetualain.

¹²Nanahu tatao-nono'i malole fo emi tao-no'in ndia, ta ka'da tao natetu Manetualain hataholi kamahehele nala toto'a-tataan mesa kana fa, tehu neukose nini fe hataholi ba'u ka loke makasi neu Manetualain.

¹³Ma neme tatao-nono'i malole fo emi matu'dun ndia, hataholi Salanik ba'u ka nai Yudea, neukose ala koa-kio Manetualain, nana lita emi mamahele ma emi lilineka ma ba'u na seli neu Hala Malole la'eneu Kristus. Sila boeo koa-kio Manetualain, nana emi dale ma malole nanseli soaneu baba'e neu sila ma neu basa hataholi fe'e kala, hata fo emi manuun.

¹⁴Soona neukose ala hule-haladoi fe emi no susue-lalaik, nanahu Manetualain dale malole na ba'u na seli neu emi.

¹⁵Ela leo bee na ita toke makasi neu Manetualain, hu ka nde baba'e-babati matuainan ndia!