Read Termanu GALATIA 4 Bible Online

GALATIA 4 - Termanu bible

GALATIA 4

¹Tehu paluu au afa'da emi no balakaik te: hataholi esa nanuu haak, sipo pusaka, tehu teu na bei nai dae soona, hataholi fe'ek nanea pusaka nala, ma ana ito-ato hataholi ndia paluu nala, losa hataholi ndia aman naketu nae, hataholi mana sipo puasaka ndia, teu na dai. Ala taon sama leo ata esa, leomae tunga ndo na, hataholi ndia hata-heton basa sila lala'ena.

³Ita boeo leondiak: Lelek fo ita teu na bei nai dae, dula dalek fo mana koasa daebafak ia la, ala tao ita da'di ata.

⁴Tehu losa fai na nandaa te, Manetualain nadenu Ana na mai leo daebafa ka mai. Inak esa naso'da nai agama hoholo-lalanen dalek, nde bongi ni'iana ndia.

⁵ No enok ndia, Ana se'i po'i hataholi fo laso'da nai agama hoholo-lalanen koasa na dae; fo daenga ita da'di Manetualai nana nala.

⁶Hu ka nde emi ia Manetualai nana nala, de Manetualain nadenu Ana na Dula Dale na masok leo emi dalem dale ma au daleng dale, fo nde Dula Dalek fo nalo bou-bou nae, “Ama, ou au Amang.”

⁷Da'di besak ia, emi ta da'di ata so'on, te emi da'di anak so. Ma hu ka nde Manetualai nanan emi, de neukose Ana fe emi, basa hata lala'en fo Ana sadia basan, soaneu ana nala.

⁸Makahulu na, emi ta malelak Manetualain fa, hu ndia de emi da'di ata neme koasa fo lafa'da lae lamatuak, tehu tunga ndo na, Manetualain ta nde ndia fa.

⁹Tehu besak ia, emi malelak Manetualain so, do la'e selu kana bai soona, Manetualain nalelak emi so. Naa, tao le'e de emi nau fali seluk leo dula dale daebafak ia la, fo tapandoes ma nuu taa-hata tak sila meu? Tao le'e de emi nau da'di ata seluk neu dula dalek sila la bai?

¹⁰Fo emi sene do'ok neu fai malole, bula malole, ma teu malole.

¹¹Au bibii ka'da, boso nalosak au sosota-mamangung soaneu emi a, manda'di tak.

¹²Tolano-tolanoo ngala lemin! Au dokodoe anseli, fo sa'di leo bee na, emi da'di sama leo au. Nana au da'di sama leo emi so boe. Emi ta tao salak hata esa boen, la'eneu au fa.

¹³Tao leo bee o emi bei mafandendelek, hu beek de, neme makasososan mai a, au tui-benga Hala Malole ndia, neu emi. Dede'a ka huu na nde, hu ka nde au tu'u he'dis.

¹⁴Lelek ndia, emi ta malua au fa, leomae au ao paa nga nalupa soso'ba-susu'di matua ina esa, ba'eneu emi. Tehu emi sipok au, sama leo emi sipok Manetualai nata nusa so'da na, do sama leo emi sipok Yesus Kristus.

¹⁵Emi maua-manale manseli, nai lelek ndia. Tehu besak ia, ua-nalek ndia nai bee so? Au bubuluk basa, lelek ndia emi sue ma au ba'u na seli.

¹⁶Ade besak ia, emi tao au da'di musu nook, nana au afa'da dede'a ndo sa neu emi do?

¹⁷Hataholi fe'e kala, ala manggate lanseli sanga emi, tehu hataholi sila la dudu'a-aafin ta malole la fa. Ala hii ka'da, tao laketu emi tututi-nanatom mo ami a, fo daenga emi tunga sila no manggatek.

¹⁸Memak malole soaneu emi manggate nai tatao-nono'i malole dalek, sa'di leondiak tataas esa, fo boso ka'da nai lelek au sama-sama o emi a.

¹⁹Au ana susue-lalai ngala lemin! Besak ia, au doidoso seluk, nanahu emi. Au doidoso sama leoinak esa doidoso, nai lelek ana bongi ana na. Neukose au doidoso akandoo, metema Kristus ha'da-tataon, beita nanaselek nai emi ao inam dale fa!

²⁰Au ahiik anseli, besak ia au nai emi tala'da, fo daenga au hapu kokolak o emi, ninik hala fe'ek, nanahu au ta bubuluk tao emi tao leo bee ka so'on!

²¹Tolano-tolanook fo ala nau laso'da nai agama hoholo-lalanen koasa na dae, so'ba mamanene su'dik au dei! Au sanga afa'da emi, hata fo tunga ndo na, nanasulak nai Musa Susula Hoholo-Lalanen dale.

²² Nanasulak nai ndia nae, Abraham manan dua: esa inan ata, boema esa inan, ta da'di ata fa.

²³Ni'iana fo nanabongik neme inak mana da'di ata, nanabongi biasa, nana hataholi daebafa ka hihii-nanaun ndia. Tehu ni'iana fo nanabongik neme inak fo ta manda'di ata, nanabongik hu ka nde, Manetualain hehelu-balataan.

²⁴Dede'ak ia, taon da'di nakasasamak esa. Ina kaduak sila la, nde bee na, sama na leo hehelu-balataak dua: fo esa da'di neme Lete Sinai mai fo nde Hagar; ana nala nanabongik da'dileo ata.

²⁵Da'di, Hagar nde Lete Sinai, fo nai nusa Ara ba. Ana da'di salaok neme kota Yerusalem ma no basa lau nala lala'e na, besak ia, ala da'di ata so.

²⁶Tehu Yerusalem manai nusa so'dak ndia nde, Yerusalem beu ka, fo ita inan nde ndia.

²⁷ Nanahu nai Susula Malalaok dale nanasulak nae, “Mamahoko setelee leon, hei ina kalte'di sala lemin, inak fo beita bongi nita la'i esa boen! Mamahoko-setelee ma hika-matadale leon, hei emi fo beita mame'da mita he'di bobongi ka la'i esa boen! Nanahu inak fo saotou na nalai la'oela nana, neukose ana bongi seluk anak ba'u ka, neme inak fo bei naso'da no saotou na.”

²⁸Tolano-tolanoo ngala lemin! Em nde bee na, Manetualai nanan fo nana bongik hu ka nde Manetualain hehelu-balataan; emi sama na leo Isak.

²⁹ Lelek ndia, ni'iana fo nanabongik tunga hataholi daebafa ka hihii-nanaun ndia, ana fepa-li'u ni'iana fo nanabongik hu ka nde Manetualain Dula Dale na hihii-nanaun. Besak ia, leondiak boe.

³⁰ Tehu ala sulak beek nai Susula Malalaok dale? Nanasulak nai ndia nae leo ia: “Usiheni ata inak ndia no anan, nana neukose inak fo manda'di ata ndia ana na, ana ta hapu hak pusaka sama-sama no inak fo ta manda'di ata, ana na fa.”

³¹Hu ndia tolano-tolanoo ngala lemin, ita ia, inak manda'di ata, ana nala ta nde ita ia fa; te ita nde bee na, inak fo ta manda'di ata, ana nala nde ita.