Read Termanu EFESUS 5 Bible Online

EFESUS 5 - Termanu bible

EFESUS 5

¹Emi nde bee na, Manetualai nana susuen. Hu ndia de, emi muse sanga enok fo tunga Manetualain heheo-hihilun.

² Ela leo bee na, susu'e ka koasa emi so'da ma, sama leo Kristus boeo, Ana sue-lai emi. Ana fe heni ao ina na soaneu ita, da'dileo tutunu-hohotu kaboominik esa fo ana tao namahoko Manetualain dale na.

³Emi nde bee na, Manetualain hataholi kamahehelen. Hu ndia de, tatao-nono'i sosoa-piao ka, ma matetu-mandaa ta ka, do tene peta ka, ta nandaa emi tao-no'i fas. Boso nalosak hataholi fe'e kala hapu ne'ek soaneu lafa'da lae, emi tao-no'i tatao-nono'ik leo sila kala.

⁴Emi boeo, ta mandaa kokolak dede'a-kokola manggenggeok, sosoa-piaok, ma hata fo ta kandaak fa. Dede'a nasafali na, ela leo bee na, emi moke makasi neu Manetualain.

⁵Taoafik matalolole hataholi mana sosoa-piao ka, do matetu-mandaa ta ka, do mana tene peta ka ha'da-tatao matak leo sila kala, sama no sosongo-tatango ka, hataholi ndia, ta hapu da'di lima eik hataholi kamahehelek fo Kristus ma Manetualain paleta fan.

⁶Emi boso nanake'di-ndiuk, hu ka nde mana kokola bafa lou kala. Nana dede'ak ia la nde tao lafo'a Manetualain nasa melun, soaneu hataholi fo ta lamahele fan.

⁷Hu ndia de, boso makabubua makandondook mo hataholi matak leo sila kala.

⁸Makahulu na, emi nai makahatu ka dalek. Tehu besak ia, emi da'di Lamatua ka, hataholi kamahehelen so, da'di emi nai mangale'do ka dalek so. Hu ndia de, emi muse maso'da nai mangale'do ka dalek.

⁹Nanahu neme mangale'dok ndia mai de, basa tatao-nono'i malole mata-mata kala, tao tunga ka'da ndo na, ma ndo sa, ala tii mai, fo nandaa no Manetualain mata memete na.

¹⁰Sanga enok fo malelak hata fo nandaa no Lamatua ka dale na.

¹¹Boso tao-no'i tatao-nono'i sosoa-ndandaa tak fo hataholi mana maso'da nai makahatuk dale kala, tao-no'i ka. Dede'a nasafali na, ela leo bee na, emi tu'u-tapa heni basa dede'a matak leo sila kala. (

¹²Nanahu dede'a-dede'ak fo sila taon no nafufunik ndia, ka'da kokola kana boeo, nini mamaek so.)

¹³Basa hata manai mangale'dok dale a, nananitak no mangale'dok.

¹⁴Nana basa hata fo nananitak no mangale'dok, nde bee na mangale'dok. Hu ndia de, nananafa'dak nae, “Fo'a leona, hei o fo mana sungu ka, ma fo'a falik meme mamate sa mai! Neukose Kristus nandela-nasa'a na o.”

¹⁵Hu ndia de, taoafik matalolole, o so'da ma eno-dalan. Boso maso'da sama leo hataholi nggoa kala; te maso'da sama leo hataholi malela kala.

¹⁶ Pake matalolole o fai loam lala'ena, nana le'do-fai besak ia nde bee na, le'do-fai mangalauk.

¹⁷Boso mamanggoa, fo palisak matalolole hata fo Lamatua ka nahii kana.

¹⁸Boso mafuk angol, nana ndia nde tao nalutu emi a. Dede'a nasafali na, ela leo bee na, Manetualain Dula Dale na koasa na emi.

¹⁹ Pake dede'a-kokolak neme mazmu ra mai, nakamee kokoa-kikiok, ma nakamee salanik nai emi hala-kokola ma dalek. Ela leo bee na, no dale namahokok, emi makamee kokoa-kikiok neu Lamatua ka.

²⁰La'eneu hata beek boe, ela leo bee na emi moke makasi tataas esa neu Amak Manetualain, ninik ita Lamatuan Yesus Kristus na'de na.

²¹Soaneu fe ha'da-holomata neu Kristus de, ela leo bee na, emi esa nakatele neu esa.

²² Saoina ka nakatele neu saotou ka, sama leo nakatele neu Lamatua ka.

²³Nanahu saotou ka nde bee na, malangan soaneu saoina ka, sama leo Kristus boeo, Ana da'di malangan neu hataholi kamahehele kala, ma Ndia boeo, nde da'di Mane Mana Fe So'dak neu hataholi kamahehele kala fo ala da'di Kristu sao paa na.

²⁴Sama leo hataholi kamahehele kala boeo lakatele neu Kristus, leondiak boe, nai basa dede'ak lala'ena dalek, saoina ka muse nakatele neu saotou ka.

²⁵ Saotou ka sue-lai saoina na, sama leo Kristus sue-lai hataholi kamahehele kala, boema Ana fe heni ao ina na, soaneu hataholi kamahehelek sila la.

²⁶Kristus tao leondiak fo ela Ana hapu tao balisi hataholi kamahehelek sila la ninik nanoli na, ma tunga oe salani ka, fo daenga makabui na, Ana hapu fen neu Manetualain.

²⁷No enok ndia, Kristus tao na hataholi kamahehelek sila, lapadeik no matua-mademan ma matetu-mandaak nai mata na, fo ta hapu bu'u-ba'ek do bu'u-ba'e esa boen.

²⁸Leondiak boe, saotou ka muse sue-lai saoina na sama leo ana sue-lai ndia ao paa na. Hataholi mana sue-lai saoina na, sosoa na nae, ana sue-lai ao ina na. (

²⁹Beita la'i esa fo, hapu hataholi nakamuu-nakadau seluk ao ina na fa. Dede'a nasafali na, ana nakaboboin ma manean sama leo Kristus boeo, nakaboboi hataholi kamahehele nala.

³⁰Ita bubuluk dede'ak ndia, nanahu ita nde bee na, lima eik neme Kristu sao paa na mai.)

³¹ Nai Susula Malalaok dale nanasulak nae, “Hu ndia de, neukose touk esa, ana la'oela inan no aman fo ana da'di esa no saoina na, fo neukose duas da'di esa.”

³²Lalanek nananafa'dak ndia, sosoa-ndandaan dema na seli. De au akasasamak dede'ak ndia no Kristus tututi-nanaton no hataholi kamahehele kala.

³³Tehu lalanek nananafa'dak ndia boeo, nanauu tututi-nanatok no emi boe: Ela leo bee na, saotou kala esa-esak sue-lai saoina na, sama leo ana sue-lai ao ina na, ma ela leo bee na, saoina kala esa-esak sanga enok fo fe ha'da-holomata neu saotou na.