Read Termanu FILIPI 1 Bible Online

FILIPI 1 - Termanu bible

FILIPI 1

¹ Tolano-tolanook fo Manetualain hataholi kamahehelen fo lamahele neu Yesus Kristu sa, mauli-malangan, ma manatuli-fali hataholi kamahehelek manai Filipi la lemin! Au fo Paulus ma Timotius fo Kristus Yesus ata nala,

²ami dua mamahena ela leo bee na, ita Aman Manetualain ma Lamatuak Yesus Kristus, fe baba'e-papalak ma so'da molek neu emi.

³Tunga faik au afandele emi soona, au oke makasi neu Manetualain.

⁴Boema tunga faik au hule-haladoi fe emi soona, au hule-haladoi no namahokok.

⁵Au oke makasi neu Manetualain, nanahu neme makasososa na losa besak ia, emi bei tulu fali mahele au, de nalosa au tao amaloloa Manetualain Hala Malolen ndia so.

⁶Manetualain nde mulai tatao-nono'i malole ndia, neu emi a, de au amahele, neukose Ana tao-no'i nakandoo tatao-nono'ik ndia, losa nakababasa kana nai Kristus Yesus Fai fafali ma'i na.

⁷Memak la'e mamana na, au anuu dudu'a leondiak soaneu emi, nana emi basa-basa mala nai au daleng dale tataas esa. Boema hu ka nde emi boeo sipo baba'e-babatik fo Manetualain fen neu au a boe; nau besak ia, fo lelek au bei nai bui dale a, do nai lelek au nai bui a deak boe, au asala'e ma au ho'u ahele Hala Malole ndia.

⁸Manetualain bubuluk basa, au ahiik alan seli o emi. Au tao leondiak nana, au sue-lai a emi ba'una seli, sama na leo Kristus Yesus sue-lai emi a.

⁹Au huhule-haladoi nga nde ia, soaneu emi: ela leo bee na, emi boetai sue-lai Manetualain, ma emi nonoo hataholi ma, ma emi malela ma tama nakandoo nai dede'a ndo sa, ma dudu'a-aafi manatee teno ka dalek.

¹⁰No enok ndia, emi hele malelak bee ka nde malole, ma emi so'da ma balisi neme sala-singo ka mai do neme kalaak bee ka mai boe, nai Faik fo Kristus fali ma'i na.

¹¹Neukose emi so'da ma henuk no tatao-nono'ik fo te'e-te'e malole, fo hapun neme ka'da Yesus Kristus mesa kana mai; soona neukose Manetualain nandela-nasaa ma nana koa-kiok.

¹²Au nau emi bubuluk, au doi-dosong sila la, nini fe hataholi ba'u ka boetai lamanene ma lamahele Hala Malole ndia.

¹³ Hu ndia de, basa mane ka hataholi mana manea nala, lo hataholi manai kota ia dalek lala'ena, ala bubuluk beno'u lae, au nanatahan nanahu au alalau-aoono Kristus.

¹⁴Ma no au nanatahan ia de, nini fe hataholi kamahehelek ba'u ka nai kota ia, boetai lamahele Lamatua ka ma boetai lapalani tui benga Manetualain Hala Malole na.

¹⁵Memak tete'e ka nai sila dalek, hapu hataholi nggelok ala nau tui benga Kristus, nana nape'da dale ka, ma nale'a napili ka, tehu hataholi nggelok soona, ala nau tui benga Kristus no dale balisi.

¹⁶Hataholi matak leo ia kala, ala tao leondiak, nanahu ala sue-lai Manetualain ma ala sue-lai au boe, hu ka nde ala bubuluk Manetualain paleta basa au, soaneu au tui-benga ae, Hala Malole ndia, la'en.

¹⁷Tehu hapu hataholi nggelok, ala tui-benga Kristus no dudu'a-aafi mangalauk. Ala tui benga Kristus dede'a-kokolan, soaneu sila paluu na. No enok ndia, sila lamahena, ala boetai tao susa au nai uma tahanan dale.

¹⁸Tehu ta da'di hata fa! Nanahu leomae leo beek ndia boe, leomae ala tao dede'ak ndia no dale balisi do dudu'a-aafi masalak boeo, Kristus nanatui-bengak boe; hu ndia de, au amahoko. Ma neukose au ame'dan leondiak nakandoo,

¹⁹nanahu au bubuluk basan, hu no emi huhule-haladoim, ma no Yesus Kristus Dula Dale na tutulu fafalin de, neukose ala po'i au.

²⁰Fo au ahiik ma au amahena ka nde, fo ela au ue-osang nini buna-boak. Dede'a nasafali na, au amahena fo ela tunga faik, lena-lenak besak ia, au apalani, nalosa no au ao paa samaneng nai lelek fo au aso'da do au mate boeo Kristus nanakoa-kiok.

²¹Hu ndia de, leomae au mate boeo, neukose au hapu nanalak.

²²Tehu metema no au maso'dang nai daebafa ia, au bei hapu tao-no'i tatao-nono'i masosoa-ndandaak lena seluk bai soona, au ta bubuluk hele bee ka fa.

²³Besak ia, au dodoo doa kana so; Au ahiik anseli, au la'oela daebafak ia, fo au u leo o Kristus, nana ndia nde malole nanseli a;

²⁴tehu au dodoo ae, hu ka nde emi paluu ma, de malole na seli, metema au leo ahele nai daebafa ka.

²⁵Au amahele dede'ak ndia. Hu ndia de au bubuluk basan, neukose au leo ahele o emi, fo ela au hapu tulu-fali emi, fo emi boetai balakai ma emi boetai mamahoko nai namahehelek nai Lamatua ka dalek.

²⁶Hu ndia de, metema au fali seluk leo emi ne'i te, emi fo mana da'di esa moo Kristus Yesus a, neukose hapu ne'ek ba'u ka seluk fo emi dale ma namatua soaneu au tatao-nono'ing.

²⁷Na, fo nana paluuk besak ia nde, nae emi so'da ma nandaa no hata fo Hala Malole a nakasetin la'eneu Kristus ndia. No enok ndia, fafa'ka ma au bei atongo o emi do ta, neukose au amanene lae, emi teik esa-dalek esa mahele ma tunga sanga sama-sama soaneu ka'da dudu'a-aafik esa ma hihii-nanauk esa; fo nde soaneu namahehelek fo nandaa no Hala Malole fo maneme Manetualai na mai a.

²⁸Ela leo bee na, emi mapalani tataas esa, boso bii emi musu noo mala. No enok ndia, emi hapu matu'dus mae, neukose sila kala ma emi sengi, nana sesengik ndia, ana mai neme Manetualain mai.

²⁹Nanahu Manetualain fe basa emi baba'e-babatik, fo ta soaneu ka'da mamahele neu Kristus fa, te soaneu emi doidoso, ba'eneu Kristus boe.

³⁰ Makahulu na emi mita au doidoso, de losa besak ia boeo, au bei doidoso ahele, nanahu au amahele Kristus. Besak ia boeo, emi doidoso sama leo au boe, nanahu emi mamahele Kristus.