Read Termanu FILIPI 2 Bible Online

FILIPI 2 - Termanu bible

FILIPI 2

¹Emi hataholi balakaik, nanahu emi da'di esa mo Kristus. Ma emi mamahoko nanahu Kristus sue-lai emi! Manetualain Dula Dale na hela-nole emi de, emi masue-malai ao ma matulu-mafali ao.

²Na, so'ba te'e-te'e, emi tao ma au daleng-nga namahoko ninik dede'ak ia la: Maso'da teik esa-dalek esa ninik susue-lalaik matak esa, dudu'a-aafik matak esa, ma dale hihiik matak esa.

³Boso tao-no'i hata esa, hu ka nde emi paluu ma mesa kana do soaneu mamatutua-mamadedema ao ma. Dede'a nasafali na, ela leo bee na emi esa-esak, no dale nakaloe aok nafa'da nae, hataholi fe'ek malole lena neme ndia ao ina na mai.

⁴Taoafik neu hataholi fe'ek paluu na; boso paluu ka'da ao ina ma mesa kana.

⁵Ela leo bee na, emi heheo-hihilum ma ha'da-tataom sama na leo Yesus Kristus:

⁶Tunga matetu na soona, Yesus sama leo Manetualain, tehu leomae leondiak boe, Ana ta name'da nae, heheo-hihilun ma ha'da-tataon fo sama leo Manetualain ndia, muse Ana ho'u nahele fan.

⁷Tehu Ana lao ela ndela sa'an de, Ana da'di ata esa, nai lelek fo Ana da'di hataholi daebafak sama leo ita.

⁸Nakaloe-nakadae ao ina na, boema naso'da tunga Manetualain paleta na, losa Ana mate neme ai nggangek lain.

⁹Hu ndia de Manetualain so'u namademan, boema Ana fen koasa matua ina lenaheni basa koasa fe'ek lala'ena.

¹⁰ Soaneu fe ha'da-holomata neu Yesus de, basa hata manai nusa so'da ka, ma manai daebafa ka, ma manai baebafa ka bui na boeo, ala sene-do'ok neun.

¹¹Basa-basas lala'ena, neukose ala manaku lae, Yesus Kristus nde Lamatua ka; no enok ndia Amak Manetualain nanakoa-kiok.

¹²Hu ndia, tolano susue-lalai ngala lemin, sama na leo emi tunga mahele au, nai lelek fo au be'i o emi a, lena-lenak besak ia, nai lelek ita komododoon, ela leo bee na emi tunga mahele au. Manetualain soi-tefa nala emi so, hu ndia de sanga enok makandoo fo ela emi so'da ma, natetu-nandaa. Tao-no'i basa dede'ak sila la no ha'da-holomata, ma tunga neu Manetualain,

¹³nana Manetualain nde tao-no'i dede'ak sila la, nai emi ao inam dale, soaneu emi nau ma emi tao mabe'i Manetualain hihii nanaun.

¹⁴Boso tao-no'i basa sila la, no muum toli-toli do nale'a-napilik.

¹⁵ No enok ndia, emi matu'du mae, emi nde bee na Manetualai nanan, fo sala-singo ta kala, ma emi maso'da tunga ndo na ma emi ndoos nai hataholi mangalauk fo masala-masingo kala tala'da. Ma nai lelek fo emi manduku-malosak halak mana fe so'da ka neu hataholi sila la, ela leo bee na emi mangale'do nai sila tala'da, fo nangale'do na daebafa ka. Metema emi maso'da leondiak soona, neukose au hapu ne'ek soaneu au amatutua-amadedema emi nai lelek fo Yesus Kristus fafali ma'i na. Fo ndia da'di buti nae, au sota-mate te ta louk fa, ma au hapu au tutunga-sasangang buna-boan.

¹⁷Fafa'kama neukose ala taolisa au, fo daenga au daa nga da'di sama leo tutunu-hohotuk fo nanapo'ak neu hata fo emi fen neu Manetualai na, fo ana da'dileo ta'du-tana nae, emi mamahelen. Metema memak muse leondiak soona, au oke makasi neu dede'ak ndia ma au amahoko o emi.

¹⁸Leondiak boe, ela leo bee na emi boeo mamahoko-setelee moo au.

¹⁹Au amahele no Lamatuak Yesus tutulu-fafalin de, no lai-laik au adenu Timotius ne'i, fo ana fe au halak la'eneu emi so'da ma soona, besa ka au dale nga tesa-tama.

²⁰Ka'da Timotius mesa-mesa kana nde hataholi fo heheo-hihilun ma ha'da-tataon sama no au, ma te'e-te'e ana dudu'a-dodoo emi so'da ma.

²¹Te basa fe'ek sila la soona, ala ito-ato ka'da sila paluu nala, te ala ta ito-ato Yesus Kristus paluu na fa.

²²Emi nde mita matam buti na nae, Timotius masosoa-ndandaak. Ana tao-no'i puse laipana no auso, soaneu ami tao mamaloloa Manetualain Hala Malole na. Ana tulu-fali au, sama leo anak esa ana tulu-fali ama na.

²³Hu ndia de, metema laketu basa au dede'a nga, fo au bubuluk ala laketu taon tao leo beek soona, no lai-laik au adenun ne'i donge-dama emi.

²⁴Au amahele no Lamatua ka tutulu-fafalin, fo ta doo ka so'on te, au boeo ne'i donge-dama emi boe.

²⁵La'eneu ita tolanon Epafroditus fo emi mandenun ana tulu fali au a, au dodoo basan ae, paluu au adenun fo ana fali seluk leo emi neu. No au nai au tatao-nono'i nga dalek ma ana sota-mate no au so.

²⁶Dale na nahiik nanseli no emi basa mala. Dale na ta tesa-tama fa nana, emi mamanene basa hala ka nae, namahe'di.

²⁷Memak namahe'di tete'e ka de, nalosa isa ba'i na maten. Tehu Manetualain sue-lain; fo Ana ta sue-lai ka'da ndia mesa kana fa, te au boe, fo ela au dale nga boso boe susa seluk bai.

²⁸Hu ndia de, au ahiik anseli, soaneu au adenun ana fali seluk leo emi neu, fo ela metema emi matongo moon soona, emi mamahoko seluk ma au dale nga boeo, ana tesa-tama.

²⁹Hu ndia de, emi muse sipo kana no dale katema tuak, da'dileo tolanook esa nai namahehele ka dalek. Fe ha'da-holomata neu basa hataholi leondia ka.

³⁰Soaneu Kristus tatao-nono'in paluu na de, isa bai na maten; ana ta sue so'da na fa, te sa'di ana tulu-fali au ninik emi na'de ma.