Read Termanu KOLOSE 4 Bible Online

KOLOSE 4 - Termanu bible

KOLOSE 4

¹ Tolano-tolanook fo mana da'di malanga nala lemin! Ela leo bee na, emi tao emi ata mala no ndoos ma tunga matetu na. Nana mafandendelek te, emi boeo manuu malangan esa nai nusa so'da ka boe.

²Ela leo bee na, emi hule-haladoi no manggatek ma manea matalolole, boema moke makasi neu Manetualain.

³Hule-haladoi fe ami boe, fo ela Manetualain fe ami fai loak malole, soaneu ami tao mamaloloa halak la'eneu Kristus dede'a nafufuni na. Nana hu ka nde dede'ak ndia de, au masok bui.

⁴Hu ndia de, hule-haladoi fo daenga au hapu afa'da mangalele'do dede'a nananafufunik ndia no mangale'dok, tunga eno dala matetu na.

⁵ Nai emi tututi-nanatom mo hataholi kamahehele ta kala dalek, ela leo bee na emi maso'da no dudu'a-aafi matetu-mandaak, ma pake basa fai loak lala'ena no malole.

⁶Ela leo bee na, dede'a-kokolak fo emi kokola kana, muse nini nanahokok fe hataholi, ma hataholi hii namanenen tataas esa. Ela leo bee na emi bubuluk, tao tao leo beek fo, emi muse mataa hataholi a natatane nala.

⁷ Tikhikus, fo ita tolano susue na, neukose nafa'da emi basa hata lala'ena la'eneu au. Ana lilineka nai tatao-nono'i ka dalek sama-sama no au, soaneu Lamatua ka.

⁸Au adenun ne'i leo emi neu, fo daenga emi bubuluk ami so'da ma, fo emi mamahoko.

⁹ Neukose Onisimus ne'i soona, ana sama-sama no Tikhikus; Onisimus ia, emi hataholim ndia, fo hataholi mana lilinekak de ami sue-lain. Neukose Tikhikus ana tui basa hata manda'dik manai au mamanang ia.

¹⁰ Aristarkhus, fo sama-sama no au nai bui dale a, ana haitua fe emi nate'ak boe. Leondiak boe Markus fo no Barnabas ina aman ka'a fa'di kala Au haitua fe emi halak ae, metema Markus ne'i soona, sipo kana no malole.

¹¹Yesus fo na'de Yustus boe. Neme hataholi Yahudi fo lamahele basa neu Lamatuak Yesus a, ka'da sila telu mesa kasa nde besak ia, ala tao-no'i lo au a, fo ami sama-sama makalala'ok Manetualain bela ba'un. Ala tulu-fali au te'e-te'e.

¹² Nate'ak neme Epafras. Emi hataholin ndia boe. Kristus Yesus atan ndia fo ana manggate hule-haladoi tataas esa fe emi. Ana noke te'e-te'e neu Manetualain fo ela emi namahehele ma da'di natea-nahele, ma emi mamahele te'e-te'e, fo daenga emi tunga Manetualain hihii-nanaun lala'ena, no matetu-mandaak.

¹³Au ita matang ana tao-no'i puse laipana soaneu emi, boema soaneu hataholi Laodikia la lo hataholi Hierapoli sala.

¹⁴ Dote Lukas, fo ita sue-lai ka, no Demas ala haitua fe emi, nate'ak boe.

¹⁵Manduku-malosak ami nate'a ma neu tolano kamahehelek manai Laodikia la; boeo neu Nimfa, ma neu tolanoo kamahehelek fo mana hule-haladoi nai uma nala.

¹⁶Emi lees basa susulak ia soona, sanga enok fo, tolanoo kamahehelek manai Laodikia la, ala lees susulak ia boe. Leondiak boeo, emi muse lees matam susulak fo, ala haitua fe emi neme Laodikia mai a.

¹⁷ Ma mafa'da Arkhipus fo, “Ana tao nakababasak ndia bela-ba'un, soaneu nalalau-naoono Lamatua ka.”

¹⁸Nate'ak neme au, Paulus. Au mesa nga nde sulak baba'ek ia. Boso mafandele henin te, besak ia au bei nai bui dale! Ela leo bee na, Lamatua ka fe baba'e-papalak neu emi. Ha'da-holomata neme ami, Paulus