Read Termanu 1 TESALONIKA 1 Bible Online

1 TESALONIKA 1 - Termanu bible

1 TESALONIKA 1

¹ Tolano-tolanook fo Amak Manetualain ma Lamatuak Kristus Yesus hataholi kamahehelen, manai Tesalonika la lemin! Ami fo nde: Paulus, Silas ma Timotius ami mamahena ela leo been-na, Manetualain fe baba'e-papalak ma so'da-molek neu emi.

²Ami moke makasi nakandoo neu Manetualain, nanahu emi basa-basa mala. Neu lelek fo ami hule-haladoi neu ita Aman Manetualain soona, ami mafandendelek mahele emi. Ami hule-haladoi fe emi tunga faik. Ami mafandele, tao leo beek de, emi matu'dun nai emi tatao-nono'i ma dalek mae, emi mamahele neu Kristus, tao leo beek de, emi sue-lai hataholi fe'ek, de nalosa emi malalau-maoonos, ma tao leo beek de, emi mamahena no matea-mahelek neu ita Lamatuan Yesus Kristus.

⁴Tolano-tolanoo ngala lemin! Ami bubuluk Manetualain sue-lai emi, ma Ana hele basa emi, da'di Ndia nuu hehelin so.

⁵Nana ami tui-benga Hala Malole neu emi, ta ninik ka'da hala-kokolak mesa kana fa, te ninik koasa, ma Manetualain Dula Dale na. Ma ami mamahele te'e-te'e neu Hala Malole ndia ndo na. Emi bubuluk, tao leo beek de, ami maso'da soaneu emi paluu ma, nai lelek fo ami bei makabubua mo emi a.

⁶ Emi tunga ami heheo-hihilum, ma Lamatua ka heheo-hihilun. Leomae emi doidoso manseli, tehu emi sipok no namahokok, halak fo ami tui-bengan neu emi a. Namahokok ndia, nanafek neme Manetualain Dula Dale na mai.

⁷No enok ndia de, emi da'di natutu'duk esa soaneu basa hataholi kamahehelek fo manai Makedonia ma Akhaya lala'ena.

⁸Nana mulai neme emi mai de, halak la'eneu Lamatua ka, nakapepela losa Makedonia ma Akhaya so. Tehu ta ka'da ndia mesa kana fa; nakalenak hala tutuik la'eneu tao leo bee de emi mamahele Manetualain boeo, ana losa mamanak lala'ena so de, ta paluu ami kokolak hata-hata so'on.

⁹Basa hataholi sila la, ala kokolak la'eneu tao leo beek de, emi sipok ami nai lelek fo makahulu na, ami ne'i ndia. Ala kokolak la'eneu, tao lo beek de, emi tu'u-tapa heni emi sosongo-tatangom de emi mai leo Manetualain fo kisak ma maso'dak ndia, de emi sene-do'ok neun.

¹⁰Boeo ala kokolak la'eneu, tao leo beek de, emi tao emi mamahehena ma neu Manetualain Ana na mamain neme nusa so'da ka mai, fo nde Yesus, fo Manetualain tao naso'da fali kana, neme mamate sa mai so. Yesus ndia boeo, nde soi-tefa nala ita teme Manetualain nasa melun, nai fai mana mai ka.