Read Termanu 1 TESALONIKA 3 Bible Online

1 TESALONIKA 3 - Termanu bible

1 TESALONIKA 3

¹ Mate'e na, ami ta makatatakak ma ami dale ma so'on. Hu ndia de, ami dodoo mae, malole lenak ami leo mesa ma meme Atena ma,

²ami madenu ita tolanon Timotius ne'i. Timotius ia, Manetualain malalau-maoonon esa, fo nalalau-naoono sama-sama no ami, soaneu ami tui-benga Hala Malole la'eneu Kristus. Ami madenu Timotius ne'i fo natetea-nahehele emi, fo ela emi boetai mamahele seluk neu Kristus.

³No enok ndia, ta hapu hataholi esa boen neme emi mai a, nakadedeak hu ka nde ita doi-doson ia la. Emi bubuluk, doidosok sila la, nanalekek nai Manetualain dale tutu'u na dalek, soaneu ita.

⁴Nai lelek fo ami bei mo emi a, nakahuluk, ami mafa'da basa emi mae, neukose ita doidoso. Dede'ak ndia, memak tete'e ka ana da'di, de emi nde bubulu kana.

⁵Hu ndia de tolano-tolanoo ngala lemin, au adenu Timotius ne'i nana, au ahiik anseli bubuluk emi namahehelem neu Kristu sa, losa bee so. Au bibii ka'da, nitu a ana hapu enok, soaneu ana dudungu-papau nala emi, fo ami sosota-mamangum, manda'di tak.

⁶ Besak ia Timotius fali ma'in so de, nafa'da basa ami hala namahokok la'eneu, tao leo beek de emi mamahele Kristus, ma emi masue-malai ao. Nafa'da ami nae, emi mafandele ami tataas esa. Ma emi mahiik matongo mo ami, sama leo ami boeo, mahiik matongo moo emi.

⁷Hu ndia, tolano-tolanoo ngala lemin! Nai basa ami toto'a-tataam ma ami doidoso ma dalek, ami hapu namahokok neme halak la'eneu emi a. Emi namahehelem neu Kristu sa, ana tao namatutua ami dale ma,

⁸nalosa besak ia, ami mame'da, te'e-te'e ami maso'da, sa'di emi matea-mahele makandoo, ma da'di esa mo Lamatua ka.

⁹Ami moke makasi ba'u ka nanseli neu Manetualain, neu basa namahokok fo ami mame'dan, hu ka nde emi.

¹⁰Lele'do le'odaen, ami hule-haladoi neu Manetualain no dale katema tuak, fo ela ami hapu matongo matam mo emi, fo ami tao matetu hata fo emi paluu ka, soaneu emi mamahele neu Kristus tunga matetu na.

¹¹Ela leo bee na, ita Aman Manetualain, ma ita Lamatuan Yesus, soi enok fe ami, fo ela ami hapu matongo mo emi!

¹²Ela leo been-na Lamatua ka, tao na emi, boetai masue-malai ao, ma boetai sue-lai basa hataholi lala'ena, nalosa emi susue-lalaim ndia boetai tama nakandoo, sama leo ami susue-lalaim neu emi a.

¹³No enok ndia, neukose Lamatua ka natetea-nahehele emi dale ma, fo emi da'di malalaok, ma emi ta masala-masingo nai ita Aman Manetualain matan, nai lelek fo ita Lamatuan Yesus, Ana mai no basa hata fo ana da'di Ndia nuu nala.