Read Termanu YOSUA 11 Bible Online

YOSUA 11 - Termanu bible

YOSUA 11

¹Lelek Mane Yabin fo neme Hazor mai, namanene la'eneu Israel sesengin-nala, boema nadenu hataholi neu leo Mane Yobab, fo neme kota Madon-na mai, ma neu kota Simron ma Akhsab mane-manen-nala,

²neu mane-manek manai letelepak-kala nai boboak kii, nai Bafak Yarden-na, nai Galilea boboan kona, nai nggolo letelepak-kala huun-na, ma nai nggolo tasi su'uk-ka deka no Dor.

³Boeo, nadenu hataholi neu leo hataholi Kanaan-nala, nai boboak muli ma Yarden boboan dulu, neu hataholi Amori, Het, Feris, ma hataholi Yebus-sala, lai nggolo letelepak-kala, boema hataholi Hewi-la lai Lete Hermon-na huun-na, nai nusa Mizpa.

⁴Boema manek sila-la mai loo basa solda'dun-nala, makadotok nanseli sama leo solokaek manai tasi su'un-na. Ndala ma kaleta musun-nala boeo, makadotok nanseli.

⁵Basa manek sila lakabubua, de basa-basas mai ofu deka loo Lee anak Merom-ma, fo ala sapu-la Israel.

⁶MANETUALAIN nafa'da Yosua nae, “Boso bii hataholi sila. Balahaa, nai fain-na sama leo iak soona, o taomisa la'iesa kasa, hu kande Israel. Muse o tao la'di ndalan-nala ein-na, ma muse o hotu heni, kaleta musun-nala.”

⁷Boema Yosua no solda'dun-nala, sapu-la musu sila no kaiboik, deka no Lee anak Merom-ma.

⁸De MANETUALAIN tao-na hataholi Israel-la sengis. Hataholi Israel-la sapu-lalas, de ala usis losa Misrefot-Maim ma Sihon nai boboak kii, ma losa Bafak Mizpa nai boboak dulu. Natee-nata'tik-ka nakadedelek losa ta ela musu-a, hataholin esa boen — mate la'iesa kasa.

⁹Yosua tao hataholi sila-la, nandaa no MANETUALAIN paletan-na so; ana tao la'di ndalan-nala ein-na, ma ana hotu heni kaleta musun-nala.

¹⁰Basa de, Yosua fali ma'in boema, nangatuun-na Hazor, fo nai lelek ndia, Hazor ndia nde balakain-na ba'ulena, neme basa nusak manai ndia. Ana hotu heni kota ndia, boema ana taonisa manen-na, ma basa laun-na lala'en-na; ana ta po'ilotak hataholi esa boen, naso'da fa.

¹²Yosua nangatuun-na la'iesak kota sila-la, ma ana ho'un-na manen-na, de ana taonisan, nandaa no Musa fo MANETUALAIN atan ndia, paletan-na.

¹³Tehu, kota-kota manai pupuku tokotik-kala lain-na, hataholi Israel-la ta hotu heni esa boen, te ka'da Yosua hotu heni Hazor.

¹⁴Ala taolisa la'iesak kota sila-la laun-nala; ala ta po'ilotak hataholi esa boen, naso'da fa. Tehu, basa bua-lo'a kabelin-nala ma bana-manun-nala, hataholi Israel-la ho'i-lalas da'di sila nuun.

¹⁵Basa hata fo MANETUALAIN paletan neu Musa fo atan-na, Musa nanduku-nalosak basan neu Yosua, de Yosua nakalala'ok la'iesak-kasa so.

¹⁶Yosua nangatuun-na la'iesak nusak ndia — nusa letelepan-na, nusak manai letek-kala huun-na, nau manai kii-la, do manai kona-la; boeo basa nusa Gosyen lala'en-na, ma mook tokotik manai Gosyen boboan kona, boema Bafak Yarden-na.

¹⁷Nusak ndia loan-na, mulai neme Letelepak Na'u tak-ka, nai boboak kona, deka no Edom, losa leo kii neu, fo Baal-Gad nai Bafak Libanon-na nai Lete Hermon-na boboan kona. Yosua natee-nata'ti no nusak sila manen-nala, doon-na seli, tehu mate'en-na boema, ana ho'un-nalas de ana taonisa la'iesa kasa.

¹⁹Neme basa kota-kota manai nusak ndia lala'en-na, ta hapu kota esa boen, ana tao hehelu-balataa tia-laik no Israel fa, te ka'da Gibeon, fo leoina Hewi kotan-na. Ana sengi basa kota fe'ek-kala, nai natee-natatik dale.

²⁰ MANETUALAIN tao-na dalen-nala latea soaneu latee-lata'ti loo hataholi Israel-la, fo ela tao lamopo-lamates, ma taolisa la'iesak-kasa, ta no do'o do ampon fa, fo nandaa no MANETUALAIN paletan neu Musa.

²¹Nai tepo-lelek ia boe, Yosua neu tao namopo-namate leoina Enak-kala, fo nde leoina ao matua-ei madema-la, ala leo nai nggolo letelepak-kala, nai Hebron, Debir, Anab, ma nai basa nggolo letelepak manai Yehuda, ma Israel. Yosua taonisa la'iesa kasa, ma ana tao nakalulutuk kotan-nala.

²²Ta ela leoina Enak ndia, hataholin esa boen, nai nusa Israel-la, ka'da bei hapus lai Gaza, Gat, ma Asdod.

²³Yosua nangatuun-na nusak ndia lala'en-na, nandaa no MANETUALAIN paletan neu Musa, boema Ana fen neu leoina Israel-la, fo da'di sila pusakan. Ala baba'e nusak ndia, de leo esa-na, ana hapu baba'ek esa. Leoina Israel-la hahae natee-natatik-ka, boema nusan-na nee-nee lino-lino ma so'da-molek.