Read Termanu YOSUA 17 Bible Online

YOSUA 17 - Termanu bible

YOSUA 17

¹Ala fe dae manai Lee Yarden-na boboan muli, seli leo Manasye tititi-nonosin seli, fo Yusuf ana ulun-na, teidalen-nala neu. Makhir, fo Gilead aman nde been-na, Manasye ana ulun-na nde ndia. Nanahu ndia hataholi palani ta'ti batu esa, boema ala fen Gilead ma Basan daen manai Lee Yarden-na boboan dulu.

²Ala fe dae manai Lee Yarden-na boboan muli, leo Manasye tititi-nonosin, teidale fe'en-nala, fo nde teidalek: Abiezer, Helek, Asriel, Sekhem, Hefer ma Semida; basa sila-la tititi-nonosi touk, neme Manasye fo Yusuf anan-na. Hataholi sila nde been-na, malanga uma loo.

³Zelafehad, nde been-na, Hefer anan, fo Gilead upun-na (Gilead nde been-na Makhir anan fo Manasye upun-na), ana tou tak-kala, te ka'da maana inak-kala, fo nde: Makhla, Noa, Hogla, Milka, Tirza.

⁴ Leu leo Imam Eleazar, Yosua, fo Nun anan-na, boema mauli-malangan-nala, de lafa'da lae, “MANETUALAIN nafa'da Musa, nae ami boeo, muse sama-sama hapu dae, sama leo ami tolanoo toum-mala.” Hu ndia de, nandaa no MANETUALAIN paletan-na, de ala fe Zelafehad ana inan sila-la dae, sama-sama loo sila tolanoo toun-nala.

⁵Da'di, ta ka'da Manasye tititi-nonosi toun-nala hapu dae baba'ek fa, te tititi-nonosi inan-nala boe hapu. Hu ndia de, tao le'e de, fe seluk leo Manasye-a, baba'ek sanahulu bai, te se'kona, ana hapu dae Gilead ma Basan nai Lee Yarden-na boboan dulu so. Ala fe dae Gilead-ta neu Manasye tititi-nonosi fe'en-nala.

⁷Leo Manasye nusan-na, toon-na, mulai neme Asyer leo Mikhmetat neu, fo nai Sikhem boboan dulu. Too ndia, neme ndia mai, de ana kona leo kona neu, losa leo-ingu En-Tapuah nusan-na.

⁸Nusak Tapuah nde been-na, leo Manasye nuun, tehu kota Tapuah, fo nai dae too-a, nde been-na, Efraim tititi-nonosin nuun ndia.

⁹Basa boema, Manasye nusan-na toon ndia, ana kona losa Leeanak Kana neu. Kota-kota manai leeanak ndia boboan kona, nde been-na, Efraim nuun ndia, leomae nai Manasye nusan dale. Basa boema, Manasye nusan-na toon ndia, tunga enok manaleo leeanak ndia boboan kii neu, de nate'e nai Tasi Tala'dak.

¹⁰Too-lane leondiak de, Efraim nai kona, ma Efraim nai kii, de sila toon muli nde Tasi Tala'dak. Nai tasi muli, leo Manasye-a nusan ndia, nakatoo no Asyer nusan-na, ma nai tasi dulu, nakatoo no Isakhar nusan-na.

¹¹Manasye daen fo manai Isakhar ma Asyer nusan-nala dalek-ka, nde: Bet-Sean ma Yibleam no nggolo-nggolok manai boboa-kaisun-nala. Boeo: Dor (kota esa nai tasi su'un-na), En-Dor, Taanakh, Megido, no nggolo-nggolok manai boboa-kaisun-nala.

¹² Tehu leo Manasye-a, ta usi heni kota sila-la laun-na fa; hu ndia de, hataholi Kanaan-nala bei leo lahele lai ndia.

¹³Leomae nai fai makabuin, fo nai lelek hataholi Israel-la da'di hataholi mabe'i-balakaik so, tehu ala ta usi heni basa hataholi Kanaan-nala fa; ka'da lakasetis, fo laue-lale'di fes.

¹⁴Yusuf tititi-nonosin lafa'da Yosua lae, “Tao le'e de, fe ami ka'da dae baba'ek esa mesak-kana, te se'kona ami makadotok nanseli, nanahu MANETUALAIN Ana ba'e-pala basa ami so.”

¹⁵Boema Yosua nataa nae, “Hu kande emi makadotok nanseli, ma Efraim nusa letelepan-na, makabi'aanak, de ta dai emi basa-basam-mala fa, de meu leo hataholi Feris, ma Refaim-ma, nusan-na meu. Fo tao nggolo beuk, nai sila dae manulan-nala.”

¹⁶Yusuf tititi-nonosin lataa lae, “Nusa letelepak ndia, ta maloa soaneu ami fa, nate'ka leoina Kanaan fo manaleo nai masabafak-kala, lanuu kaleta musu besi, nau sila fo manaleo nai Bet-Sean ma nggolo-nggolok manai boboa-kaisun-nala, do sila fo manaleo nai Bafak Yizreel-la boe.”

¹⁷Boema Yosua nafa'da leo Efraim ma Manasye muli sila nae, “Tete'ek-ka, emi makadotok manseli, ma mabe'i-balakaik, de nandaa fe emi dae lena neme duduik esa mai.

¹⁸Emi soa dae letelepan-na, leomae dae ndia bei nula mesan, tehu emi bisa painote dae ndia fo emi soa la'iesak-kana. Ma la'eneu hataholi Kanaan sila-la soona, emi bisa usihenis, leomae sila mabe'i-balakaik-kala, ma lanuu kaleta musu besi.”