Read Termanu YOSUA 18 Bible Online

YOSUA 18 - Termanu bible

YOSUA 18

¹Langatuu-la MANETUALAIN helu nusak-ka boema, hataholi Israel-la lala'en-na, lakabubua nai Silo, de lapadedeik Lalaa temak soaneu MANETUALAIN mamain-na.

²Leoina Israel-la leon hitu beita hapu dae baba'ek fa.

³Da'di Yosua nafa'da hataholi Israel-la nae, “Emi nau mahani, losa faihi'da seluk bai, fo besak-ka emi meu mangatuu-ma, MANETUALAIN fo emi bei-ba'i kaim Manetualain fe emi nusak-ka?

⁴Leo esa-na, hele-na hataholi telu. Au sanga adenus leu palisak lutu-lutuk nusak ia lala'en-na, fo ala sulak, sila lahiik lanuu nusak-ka, too-lanen-nala. Basa ndia soona, muse ala fali ma'is leo au mai.

⁵Muse baba'e dae ndia neu baba'ek hitu. Neukose, Yehuda nahele neme ndia nusan-na, nai boboak kona, ma Yusuf nai nusan-na nai boboak kii.

⁶Muse dulak-la, dae baba'e ka hituk sila-la too-lanen, fo fen leo au mai. Mahani te, neukose au tu'u batu, fo au bubuluk, Manetualain nakeketun-na leo beek soaneu emi.

⁷Neukose, ka'da leo Lewi-a, ta sipo dae baba'ek sama-sama no emi fa, nanahu sila baba'en-na nde, sila da'di imam fo lalalau-laoono MANETUALAIN. Ma la'eneu leo Gad, Ruben ma leo Manasye-a soona, memak sila sipo basa sila baba'en-na, nai Lee Yarden-na, boboan dulu so. Musa, fo MANETUALAIN atan-na, fe basa dae ndia neu sila so.”

⁸Boema Yosua fe hataholi sila natutu'duk-ka nde ia nae, “Meu palisak lutu-lutuk nusak ia, fo dulak-ma, too-lanen; basa soona, fali ma'im-ma, leo au mai. Mahani te, neukose au tu'u batu nai ia, fo nai Silo, fo au bubuluk MANETUALAIN nakeketun soaneu emi.” Ala sipo-la, natutu'duk ndia neme Yosua mai boema, leu palisak lutu-lutuk nusak ndia.

⁹Ala la'ok okofefeo nusak ndia lala'en-na, boema ala sulak-la dae baba'e ka hituk sila, too-lanen, ma ala sulak-la, kota-kota manai dalek-kala boe. Basa boema, ala fali ma'is leo Yosua nai ofu manai Silo.

¹⁰Boema Yosua tu'u batu, fo ana bubuluk MANETUALAIN nakeketun soaneus. Basa ndia boema, leoina Israel-la, leon fo ana beita hapu dae baba'ek fa, Musa fe esa-esak dae baba'ek.

¹¹Baba'e makasososak-ka nde, dae soaneu teidalek manai leo Benyamin-na dalek. Sila baba'en ndia, nai leo Yehuda, ma Yusuf tititi-nonosin leon-na, daen-na tala'da.

¹²Sila daen-na too kii, ana mulain neme Lee Yarden-na mai, boema ana kae leo masadokek manai Yarden boboa kiin-na, basa boema ana leo muli neu, de ana tunga nusa letelepak-ka, fo losa nusak manai moo solokaek Bet-Awen-na neu.

¹³Too ndia, nakandoo leo masadokek manai Lus boboa konan-na (fo lalelak-kana na'de Betel), boema ana kona leo Atarot-Adar, nai letek manai Bet-Horon-Hilir boboan kona.

¹⁴Too ndia, ana pilu neme letek ndia boboan muli mai, de ana pilu leo kona neu, fo neu leo Kiryat-Baal, (fo nde Kiryat-Yearim). Leo Yehuda, nuun Kiryat-Baal ndia. Dae ndia toon manai boboan muli, nde ndia.

¹⁵Too manai boboan muli, ana mulain neme Kiryat-Yearim su'un-na mai, de nakandoo leo Me-Neftoah oematan-nala neu,

¹⁶boema, ana kona leo lete huuk fo nasasalematak no Bafak-Hinom-ma, nai Bafak Refaim-ma pe'dan kii. Basa ndia boema, too ndia leo kona neu, fo ana tunga Bafak Hinom-ma lete huun-na, nai nusa Yebus-sa boboan kona, de nakandoo leo En-Rogel neu,

¹⁷boema ana pilu kiik, fo leo En-Semes neu, boema ana leo Gelilot neu, fo nai Ndanda'ek Adunim-ma selik. Basa ndia boema, too ndia kona leo Batu Bohan neu (Bohan nde been-na Ruben anan ndia),

¹⁸boema ana tunga letek-ka huun-na, fo letek ndia nasasalematak no Bafak Yarden-na, boboan kii, de basa boema, ana kona leo bafak ndia,

¹⁹tunga kii, fo lete Bet-Hogla huun-na, de nate'e nai Tasi Mates-sa boboan kii, fo nai Lee Yarden-na pe'dan-na. Too-lane manai nusak ndia boboan kona, nde ndia.

²⁰Lee Yarden-na, nalupa too dulu. Dae fo ala fen neu teidalek manai leo Benyamin-na dalek, fo da'di sila pusakan-na, too-lanen leondiak.

²¹Teidalek manai leo Benyamin-na dalek, hapu kota la, basa-basan, kota sanahulu dua, loo nggolo-nggolok manai titia-tatain-nala, nde: Yerikho, Bet Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni ma Geba.

²⁵Boeo, kota ka sanahulu haak ia-la, loo nggolo-nggolok manai titia-tatain-nala nde: Gibeon Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (fo nde Yerusalem), Gibea ma Kiryat-Yearim. Dae-dae fo ala fen neu teidalek manai leo Benyamin-na dalek, fo da'di sila pusakan-na, nde ndia.