Read Termanu YOSUA 19 Bible Online

YOSUA 19 - Termanu bible

YOSUA 19

¹Baba'e ka dua nde, dae soaneu teidalek manai leo Simeon-na dalek. Sila daen-na, too-lanen masok losa leo Yehuda dae toon dale neu.

² Ala fes kota sanahulu telu, loo nggolo-nggolok manai titia-tatain-nala nde ia: Bersyeba, Syeba, Molada, Hazar-Suar, Bala, Ezem, Eltolad, Betul, Horma, Ziklag, Bet-Hamarkabot, Hazar-Susa, Bet-Lebaot, ma Saruhen.

⁴

⁵

⁶

⁷Boeo, kota haa, loo nggolo-nggolok manai titia-tatain-nala nde ia: Ain, Rimon, Eter ma Asan.

⁸Nai dalek boeo, hapu basa nggolok manaokofefeo-la kota-sila-la, losa leo Baalat-Beer (fo nde Rama), nai dae fo manai boboak kona. Dae ndia, nde ala fen neu teidalek manai leo Simeon-na dalek, fo da'di sila pusakan.

⁹Hu kande, Yehuda daen-na loan-na seli, boema ala fe dae ndia seli leo, leo Simeon-na neu.

¹⁰Baba'e ka telu nde, dae soaneu teidalek manai leo Zebulon-na dalek. Ala fe sila dae-a, too-lanen losa Sarid.

¹¹Neme Sarid mai, too muli leo Marala neu, boema ana koila'e Dabeset ma leeanak manai Yokneam boboan dulu.

¹²Too dulu, mulain neme Sarid leo Khislot-Tabor dae too na neu, de nakandoo leo Dobrat neu, boema ana kae leo Yafia neu.

¹³Neme naa mai, de too ndia nakandoo leo dulu neu, fo leo Gat-Hefer ma Et-Kazin neu, boema ana pilu leo Nea neu, de nakandoo leo Rimon neu.

¹⁴Nai boboan kii, too ndia pilu leo Hanaton neu, de nate'e nai Bafak Yiftah-El.

¹⁵Nai leo Zebulon-na nusan ndia dalek boeo, hapu Katat, Nahalal, Simron, Yidala ma Betlehem. Sila nusan-na neni kota sanahulu dua, loo nggolo-nggolok manai titia-tatain-nala.

¹⁶Kota-kota-la, loo nggolo-nggolon sila-la, lai nusak fo ala fen neu teidalek manai leo Zebulon-na dalek, fo da'di sila pusakan.

¹⁷Baba'e ka haa nde, dae soaneu teidalek manai leo Isakhar-ra dalek.

¹⁸Nai sila nusan dale, hapu Yizreel, Khesulot, Sunem,

¹⁹Hafaraim, Sion, Anaharat,

²⁰Rabit, Kisyon, Ebed,

²¹Remet, En-Ganim, En-Hada, ma Bet-Pazes.

²²Sila dae toon-na, ana honan neu Tabor, Sahazima, Bet-Semes, boema nate'e nai Lee Yarden-na. Sila kotan-na neni kota sanahulu nee loo nggolo-nggolok manai titia-tatain-nala.

²³Kota-kota ma nggolo-nggolok sila-la, lai nusak fo ala fen neu teidalek manai leo Isakhar-ra dalek, fo da'di sila pusakan.

²⁴Baba'e ka lima nde, dae soaneu teidalek manai leo Asyer-ra dalek.

²⁵Sila nusan-na neni: Helkat, Hali, Beten, Akhsaf,

²⁶Alamelekh, Amat, ma Misal. Sila daen-na toon muli, ana honan neu Lete Kamel-la ma Lee Libnat-ta.

²⁷Sila toon ndia, neme ndia mai de, ana pilu leo dulu neu, fo leo Bet-Dagon neu, boema ana honan neu Zebulon ma Bafak Yiftah-El toon-na, de ana leo kii neu, fo leo Bet-Emek ma Nehiel neu. Boema too ndia, nakandoo seluk leo kii neu fo leo Kabul,

²⁸Ebron, Rehob, Hamon ma Kana, de ana losa Sidon.

²⁹Neme ndia mai de, too ndia ana pilu leo Rama neu, boema nakandoo, de ana losa kota Tirus, fo nde kota esa makota musu; basa boema, too ndia, pilu seluk leo Hosa neu, boema nate'e nai Tasi Tala'dak. Nai too sila-la dalek, hapu Mahalab, Akhzib,

³⁰Uma, Afek ma Rehob. Sila nusan-na lala'en-na, neni kota duahulu dua, loo nggolo-nggolok manai titia-tatain-nala.

³¹Kota-kota ma nggolo-nggolok sila, lai nusak fo ala fen neu teidalek manai leo Asyer-ra dalek, fo da'di sila pusakan.

³²Baba'e ka nee nde, dae soaneu teidalek manai leo Naftali-a dalek.

³³Sila dae toon-na, ana mulain neme Helef, losa ai ek-ka nai Zaananim, de nakandoo leo Adami-Nekeb neu, boema ana leo Yabneel neu, de ana losa Lakum boema, nate'e nai Lee Yarden-na.

³⁴Too ndia, neme ndia mai de, ana pilu leo muli neu, fo leo Aznot-Tabor neu, boema neme naa mai, de ana leo Hukok neu. Nusak ia boboan kona, nakatoo no Zebulon nusan-na, nai boboak muli, no Asyer, ma nai boboak dulu, no Lee Yarden-na

³⁵Kota-kota makota musuk-kala nde: Zidim, Zer, Hamat, Rakat, Kineret,

³⁶Adama, Rama, Hazor,

³⁷Kedes, Edrei, En-Hazor,

³⁸Yiron, Migdal-El, Horem, Bet-Anat, ma Bet-Semes. Sila nusan-na lalaena, neni kota sanahulu sio, loo nggolo-nggolok manai titia-tatain-nala.

³⁹Kota-kota-la loo nggolo-nggolon sila-la, lai nusak fo ala fen neu teidalek manai leo Naftali dalek, fo da'di sila pusakan.

⁴⁰Baba'e ka hitu nde, dae soaneu teidalek manai leo Dan-na dalek.

⁴¹Sila nusan-na, neni Zora, Esytaol, Ir-Semes,

⁴²Saalabin, Ayalon, Yitla,

⁴³Elon, Timna, Ekron,

⁴⁴Elteke, Gibeton, Baalat,

⁴⁵Yehud, Beneberak, Gat-Rimon,

⁴⁶Me-Yarkon, Rakon, ma nusak manai Yope titia-tatain-nala boe.

⁴⁷ Leo Dan-na, hataholin-nala lamopo sila nusan-na seli so, da'di, leu leo Lesem leu, de ala sapu-la kota ndia. Boema ala leo leme kota ndia, de ala nggati heni kota Lesem ndia na'den-na, na'de kota Dan, fo tunga sila bei-ba'in na'den-na.

⁴⁸Kota-kota-nala loo nggolo-nggolon sila, lai nusak fo ala fen neu teidalek manai leo Dan-na dalek, fo da'di sila pusakan.

⁴⁹Lelek hataholi Israel-la baba'e basa dae manai nusak ndia boema, ala fe Yosua fo Nun anan-na, dae duduik esa, fo da'di ndia pusakan.

⁵⁰Sama leo MANETUALAIN paleta basan so, de ala fen, noke kota nde: Timnat-Serah nai letelepak Efraim-ma. Yosua nafofo'a falik kota ndia, de ana leo neme ndia.

⁵¹Leondiak, Imam Eleazar, Yosua, fo Nun anan-na, ma basa malanga umaloo manai leoina Israel-la leon-nala dalek, baba'e dae manai nusak ndia, nenik ala tu'u batu, fo loke natutu'duk neme MANETUALAIN mai. Ala taon neme Silo, fo nai lelesu manai MANETUALAIN Lalaa Teman-na, lelesun-na, matan-na. Dae ndia baba'en-na, nate'e ndia.