Read Termanu YOSUA 2 Bible Online

YOSUA 2 - Termanu bible

YOSUA 2

¹ Basa boema, Yosua nadenu hataholi manamakuk dua leme Sitim leo Kanaan leu. Hataholi ka duak sila-la hapu paleta, fo leu palisak matalolole nusa Kanaan-na, no nafufunik fo makasososan-na leu leo kota Yerikho leu. Boema leu leo kota ndia leu, de ala sungu leme ina manasosoa-piaok esa na'de Rahab, uman.

²Kota Yerikho manen-na namanene lae, nai le'odaek ndia, hataholi Israel-la mai palisak lutu-lutuk dae Yerikho-a.

³Boema manek-ka nadenu hataholi neu leo Rahab neu, fo nanduku-nalosak paleta nde ia nae, “Kalua heni hataholi manasungu nai o umam ndia. Hataholi sila nde been-na, hataholi manamakuk, de ala mai palisak lutu-lutuk basa dae Yerikho lala'en-na!”

⁴Boema Rahab nataa nae, “Memak, hataholi mai leo au umang mai, tehu au ta bubuluk leme bee mai fa. Na'kasa ala la'o so, nai lelek le'do-a mulai tenak, fo ndia te, beita kena kota lelesuinan-na fa. Ma au ta atanes, ala leo bee leu fa, tehu emi usis no lai-laik soona, fafa'kama bei hapus.” (Te se'kona, Rahab nafuni basa hataholi manamakuk ka duak sila-la, nai uma hunuk lain, nai ha'deaik bubuak esa dalek so.)

⁷Boema manek-ka nadenu hataholi sila-la la'o leona. Lelek laladeak boema, ala kena kota lelesuinan-na neu. Ala sanga hataholi manamakuk ka duak sila-la, losa leo mamana lelenak manai Lee Yarden-na.

⁸Le'odaek ndia, Israel hataholi manamakuk ka duak sila-la beita sungu fa te, Rahab neu leo uma hunuk lain neu,

⁹de nafa'das nae, “Au bubuluk, MANETUALAIN fe basa emi nusak ia so. Basa hataholi manai ia-la, ala bii emi.

¹⁰ Ami mamanene basa halak la'eneu, da'di tao leo beek de, MANETUALAIN tao nama'da Tasi Gelagah nai emi matam, lelek emi la'oela Masir. Ami boeo mamanene basa, tao leo beek de, emi taomisa Sihon ma Og, fo leoina Amori mane ka duan sila-la, neme Lee Yarden-na boboan dulu.

¹¹Ami mamanene tutuik ndia tu'tik-ka ami bii manseli. Ami hataholim-mala, mopo palanin-nala, nanahu emi. MANETUALAINManakoasa, fo emi Manetualaim-ma, tete'ek-ka, Manetualain Fo Manakoasa nai lalai ma daebafak-ka.

¹²Au amahena, emi nau soo-supa menik na'den-na, mae neukose emi ta tao mangalauk, neu au teidaleng-ngala fa, sama leo au ta tao mangalauk neu emi fa. Maheluk mae, neukose emi ta taomisa au ina-amang, au tolanoong-ngala loo sila teidalen-nala lala'en-na, tehu neukose emi masulu-mahapas. Hu ndia de, fe ta'du-tana esa, fo da'di bua pepe'dak nae, au bisa amahele emi!”

¹⁴Boema hataholi ka duak sila-lataa lae, “Ami maheluk mae neu faik bee fo MANETUALAIN fe nusak ia neu ami soona, neukose ami ta tao mangalauk neu emi fa, sa'di o boso tui hataholi esa boen, mae ami nai ia. Metema, ami ta tao matetu hehelu-balataak ndia fa soona, nemen-na fo MANETUALAIN soo-supa ami.”

¹⁵Hu kande ala tao Rahab uman-na nai kota papala nanadaman-na, de Rahab nakona hataholi ka duak sila nenik tali, tunga jendela leo deak neu.

¹⁶Rahab nafa'das nae, “Meu leo nggolo letelepak-ka meu, fo ela manek-ka nadenu hataholi-la, boso ho'u-la emi. Ke'ke meme ndia, faik telu dalen-na, fo ala fali le'us soona, besak-ka la'ok makandoo emi leleo-lala'om.”

¹⁷Hataholi manamakuk ka duak sila-la lafa'da Rahab lae, “Hei, neukose ami tao matetu hala heheluk fo o moken neme ami mai.

¹⁸Ka'da o muse tao dede'ak esa nde ia. Mahani te, metema ami sapu-ma emi nusam-ma soona, ela leo been-na, o pa'a tali pilas ia neu jendela ia, nai mamanak fo o makona ami-a. Ela leo been-na, maloo makabubua o ina-amam, o talonoom-mala, o amam teidalen-nala, mai uma ia.

¹⁹Metema, sila esa kalua neme uma ia dalek mai, fo nanataonisak soona, ndia mamaten-na ndia nde been-na ndia sala mesan ndia; ami ta lu'a-lepa dede'ak ndia fa. Tehu metema nggelok hapu soe nai uma ia dalek soona, ami nde lu'a-lepa soe ndia.

²⁰Nasafalin-na, metema emi mafa'da hataholi esa, mae ami nai ia soona, ami matapo'i neme hehelu-balataak, fo o moken neme ami mai ndia.”

²¹Rahab tunga dede'ak ndia, de ana po'is la'o leona. Basa boema, ana pa'a tali pilas ndia neu jendelan-na.

²²Boema hataholi manamakuk ka duak sila-la leu leo nggolo letelepak-ka leu, de ala ke'ke leme ndia. Manek-ka nadenu hataholi-la sangas su'di leo bee-bee neu, nai nusak ndia lala'en-na, faik telu dalen-na, tehu ala ta hapu fas. Mate'en-na, ala fali le'us leo Yerikho leu.

²³Boema, Israel hataholi manamakuk ka duan sila-la, kona leme letelepak-ka mai, de ala lena leo lee-a selik leu, basa boema, ala fali le'us leo Yosua leu. Ala tui Yosua, basa hata fo sila la'ola'din.

²⁴Basa boema, lafa'da lae, “Tao leo bee-o, MANETUALAIN fe la'iesak nusak ndia leo ita mai; basa hataholi manai naa-la, ala bii ita.”