Read Termanu YOSUA 20 Bible Online

YOSUA 20 - Termanu bible

YOSUA 20

¹ Basa boema, MANETUALAIN, nadenu Yosua

²fo nafa'da hataholi Israel-la nae leo ia, “Au paleta basa Musa so, fo ela nafa'da emi, la'eneu kota-kota mananasulu aok-kala, fo nde kota-kota, nai bee hataholi-a bisa nalai leo ndia neu, fo ana hapu nasulu-nahapak.

³Hataholi fo ta name'da fa, te ana taonisa hataholi soona, bole nalai leo kota ndia neu, fo naso'da neme hataholi fo, ana sanga balas nape'da dalen-na neun.

⁴Ana bole nalai leo kota esa neme kota sila-la mai, fo neu leo mamana naketu-nala'dik-ka nai kota ndia lelesuinan-na, fo nafa'da mangalele'do neu basa mauli-malangan manai sila-la, hata fo ana da'di so. Neukose mauli-malangan sila-la, sipok-kana, masok kota ndia, ma ala fen mamanak fo ana leo.

⁵Metema hataholi fo, ana sanga balas nape'da dalen-na ndia, usin losa ndia soona, kota ndia laun-na, ta bole fe hataholi ndia, leo hataholi manausik-ka neu fa. Sila muse lasulu-lahapan, nana hataholi ndia, ta name'da fa te, ana taonisa hataholi so, ma ta hu kande, nape'da dale nasak hataholi ndia fa.

⁶Ana bole leo nai kota ndia, losa laketu-lala'di hataholi ndia dede'an-na, nai lea matan, ma losa mate, hataholi manada'di Imam Matuaina nai lelek ndia. Basa ndia soona, hataholi ndia, bole fali ne'un leo nggolo-ta'dun, fo nai bee, hataholi ndia nalai.”

⁷Boema hataholi Israel-la, hele kota-kota manai nusak manai Lee Yarden-na boboan muli, da'di kota mananasulu aok. Kota sila nde: Kedes, nai letelepak Naftali, fo nai Galilea, Sikhem, nai letelepak Efraim, ma Hebron, nai letelepak Yehuda,

⁸Ala hele kota-kota manai Lee Yarden-na boboan dulu, nai mook masakakalak manai Yerikho boboan dulu, da'di kota mananasulu aok. Kota sila-la nde ia: kota Bezer, nai Ruben nusan-na, kota Ramot, nai Gilead nusan-na, ma kota Golan, nai Basan, fo nai Manasye nusan-na.

⁹Basa kota-kota nasulu aok-kala nde ndia, fo ala helen soaneu hataholi Israel-la, ma soaneu basa hataholi nusa dea, fo manaleo loo sila. Ba'eneu hataholi, fo ta name'da fa, te ana taonisa hataholi fe'ek soona, ana bole hapu nasulu-nahapak nai kota sila-la, fo naso'da neme hataholi, fo ana usin soaneu balas nape'da dalen-na neun; metema, beita naketu-nala'di dede'an-na, nai lea matan fa soona, ta bole taonisa fa.