Read Termanu YOSUA 22 Bible Online

YOSUA 22 - Termanu bible

YOSUA 22

¹Basa boema Yosua naloo hataholi-la leme leo Ruben, Gad ma leo Manasye manai Lee Yarden-na boboan dulu,

² de nafa'das nae, “Emi tao la'iesak MANETUALAIN atan Musa ndia, paletan neu emi so. Ma emi boeo, tunga basa au paletang-ngala so boe.

³Dodoo basa ia, beita la'iesa fo emi po'ilotak emi tolanoom-mala, hataholi Israel fe'ek-kala, latee-lata'ti mesa-mesak-kasa fa. Emi tunga emi MANETUALAIM-ma, paletan-nala no te'e-te'ek so.

⁴Hu ndia de, nandaa no hehelu-balataan, de MANETUALAIN fo emi Manetualaim-ma, fe basa nee-nee lino-linok-ka neu emi tolanoom-mala, ma hataholi Israel fe'ek-kala so. Da'di, besak ia, fali me'um-ma leo makahulun-na Musa fe emi nusak manai Lee Yarden-na boboan dulu ndia meu.

⁵Ma manea leona, fo ela emi tunga Musa fe emi hoholo-lalanek-kala, fo nde: Sue-lai emi MANETUALAIM-ma, tunga hihii-nanaun, tunga paletan-nala, lilineka neun, ma hule-haladoi neun no emi dale katema tuam-ma, ma no basa emi aopaa-samanem lala'en-na.”

⁶Basa boema, Yosua hule-haladoi fes, de ana po'is fali le'us leo sila nusan-na leu, no ana fes hala-heheluk-ka nde ia nae, “Besak ia, emi mamasu'i so, de emi fali no emi meni bana-manu makadotok, lilofulak, lilopilas, liti, besi ma bua papakek. Boeo, baba'e emi kalo meni hata-heto-la, neu emi hataholim fo emi leo esa.” Boema leo Ruben, Gad ma leo Manasye manai Lee Yarden-na boboan dulu ndia, la'oela hataholi Israel fe'e kala, de ala la'o leme Silo nai Kanaan, leo sila daen-na nai nusa Gilead-ta. Ala leo dae ndia, nanahu MANETUALAIN paletan-na tunga Musa. (Leo Manasye seli, sipo basa dae manai Lee Yarden-na selik, neme Musa mai so, ma leo Manasye fe'ek seli, sipo dae manai Lee Yarden-na boboan muli, sama-sama no leo fe'ek-kala, neme Yosua mai.)

¹⁰Lelek leo Ruben, Gad ma leo Manasye manai Lee Yarden-na boboan dulu ndia, losa Gelilot, fo bei nai Lee Yarden-na boboan muli, boema lapadedeik-la mei tunu-hotu matua, manahiik, ma nananita nalelak esa, deka no lee-a.

¹¹Hataholi Israel fe'ek fo sila bei leoina esa, lamanene boema, lafa'da lae, “Leo Ruben, Gad ma leo Manasye manai Lee Yarden-na boboan dulu, hataholin-nala lapadedeik-la mei tunu-hotuk esa nai Gelilot, deka no Lee Yarden-na, nai ita nusan dale ndia!” Boema, basa-basas lakabubua nai Silo, fo sanga leu lata'ti loo Israel leo-leon manai Lee Yarden-na boboan dulu ndia.

¹³Boema hataholi Israel-la ladenu Pinehas, fo Imam Eleazar-ra anan-na, neu leo, leo Ruben, Gad ma leo Manasye manai Gilead fo nai Yarden dulu.

¹⁴Leoina Israel-la, lasi ha'dan sanahulu, sama-sama loo Pinehas, — leo esa soona, hataholi esa neme leo-leo manai lee Yarden-na boboan muli mai. Hataholi sila-la, malanga uma loo nai sila leo-ingu dale.

¹⁵Boema, ala losa leo Ruben, Gad ma leo Manasye manai nusa Gilead-ta, mamanan-na.

¹⁶ Boema no MANETUALAIN, anan-nala lala'en-na na'den-na, lafa'da hataholi maneme leo Ruben, Gad ma leo Manasye sila lae, “Tao le'e de, emi tao dede'a mangalauk ia, soeneu Israel Manetualain-na? Hu kande, emi mesam-ma mafofo'a aom emi mei tunu-hotum-ma, de emi la'ban MANETUALAIN! Emi ta tunga paletan-nala so'on!

¹⁷ Ade, emi ta mafandele ita sala-singon neme Peor fa do? Nai lelek ndia, MANETUALAIN huku ita, nenik he'di-laus esa, leomae Ndia anan ita ia boe! Besak ia, ita bei lu'a-lepa buna-boan. Ade, ndia beita dai boen do?

¹⁸Ma besak ia, emi nau masadea seluk MANETUALAIN do? Metema, faik ia emi la'ban MANETUALAIN soona balahaa te, neukose namanasa hataholi Israel-la lala'en-na.

¹⁹Metema, emi nusam ndia manggenggeok, fo ta nandaa taon da'di mamana makaluku-makatele neu MANETUALAIN fa soona, lali heok-kana leo ia mai, fo leo MANETUALAIN nusan-na mai, fo MANETUALAIN Lalaa Teman-na nai ndia. Ami fe emi ami nusam-ma seli, tehu sa'di boso la'ban MANETUALAIN do la'ban ami nenik popo-tama seluk mei tunu-hotu fe'ek esa, te se'kona MANETUALAIN fo ita Manetualain-na nanuu mei tunu-hotuk so.

²⁰ Mafandele, Akhan fo Zerah anan-na, ana ta nau tunga MANETUALAIN paletan la'eneu bua-lo'as fo muse tao nakalulutuk-kasa, de mate'en-na beek da'di? Hataholi Israel-la lala'en-na nanahukuk. Fo masala-masingok-ka ka'da Akhan dei, tehu manamatek-ka, ta ka'da ndia mesak-kana fa!”

²¹Boema, leo Ruben, Gad ma leo Manasye manai boboak dulu ndia, hataholin-nala lataa lae,

²²“Fo Manakoasa nde MANETUALAIN! Fo Manakoasa nde MANETUALAIN! Ana bubuluk, tao le'e de, ami tao dede'ak ia, ma ami nau, fo ela emi boeo bubuluk-kana! Leounik-ka, ami tao dede'ak ndia, no dudu'ak la'ban MANETUALAIN do hu kande, ami ta mamahele seluk-kana fa soona, nemen-na fo ami mate besak ia boe!

²³MANETUALAIN mesak-kana huku ami, metema ami manuu dudu'a la'ban MANETUALAIN nenik ami mapadedeik ami mei tunu-hotu mesam-ma, fo tunu-hotu tutunu-hohotu nanatunuk, do tutunu-hohotu gandum, do tutunu-hohotu tia-laik-ka neu lain.

²⁴Ade, ami dudu'am-ma, ta nde ndia fa, tolano-tolanoong-ngala lemin! Ami mapadedeik mei tunu-hotuk ndia, nanahu ami bii-bii ka'da, mahani te neu fai makabuin te, neukose emi tititi-nonosim lafa'da ami tititi-nonosim lae, ‘Emi ta manuu tututi-nanatok hata-hata moo MANETUALAIN fo Israel Manetualain-na fa!

²⁵Mitak, Ana tao Lee Yarden ia neu ita tala'da, fo ela ana ba'e ami moo emi, fo Ruben ma Gad hataholin-nala. Te'e-te'e, emi ta manuu tututi-nanatok hata-hata moo MANETUALAIN fa.’ Soona mahani te, neukose hata da'di? Tao leo bee-o, neukose emi tititi-nonosim, tao-la ami tititi-nonosim hahae makaluku-makatele neu MANETUALAIN.

²⁶Da'di, ami mapadedeik mei tunu-hotuk, ta soaneu tutunu-hohotu nanatunuk do ami tunu-hotum-mala fa,

²⁷tehu soaneu da'di ta'du-tana ba'eneu ita hataholi ka duak-kala, ma ba'eneu ita tititi-nonosin nai fai makabuin, lafa'da lae tete'ek-ka, ami ia sene-do'ok neu MANETUALAIN nai Lalaa Teman-na, nenik teni tutunu-hohotu nanatunuk, tunu-hotuk-kala, ma tutunu-hohotu tia-laik-ka. No enok ndia, neukose emi tititi-nonosim, ta lafa'da lae, ami tititi-nonosim ta lanuu tututi-nanatok hata-hata loo MANETUALAIN fa.

²⁸Da'di, ami dudu'am-ma nde ia, leounik-ka, emi tititi-nonosim lafa'da lae leondia soona, ami tititi-nonosim bisa lafa'da lae, ‘Mete mei tunu-hotuk ndia leona! Ami bei-ba'i kaim-mala lapadedeik-la mei tunu-hotuk esa, lupan-na sama no MANETUALAIN mei tunu-hotun-na, ta soaneu tutunu-hohotu nanatunuk, do soaneu tunu-hotuk, tehu soaneu da'di ta'du-tana ba'eneu ita hataholi ka duak-kala.’

²⁹Mamahele leona, te ami ta nau la'ban MANETUALAIN fa, do hahae makaluku-makatele neun, nenik popo-tama seluk mei tunu-hotu fe'ek, soaneu tutunu-hohotu nanatunuk do tutunu-hohotu gandum do soaneu tunu-hotuk, te se'kona, MANETUALAIN fo ita Manetualain-na nanuu mei tunu-hotuk nai MANETUALAIN Lalaa Teman-na, matan-na so.”

³⁰Basa hata fo hataholi maneme leo Ruben, Gad ma leo Manasye manai boboan dulu sila lafa'da mangalele'dok-ka, Imam Pinehas, laun Israel-la, lasi ha'dan ka sanahulun, fo leme Lee Yarden-na boboan muli mai ndia, lamanene. Boema dalen-nala loa-loak mesan, no nafa'da mangalele'dok ndia.

³¹Boema Pinehas, fo Imam Eleazar-ra anan-na, nafa'da leo Ruben Gad ma Manasye Dulu, hataholin-nala nae, “Besak ia, ami bubuluk MANETUALAIN no ita, nanahu emi ta la'ban-nana fa. Emi soi-tefa-ma, hataholi Israel-la neme MANETUALAIN huhukun-na mai so.”

³²Basa ndia boema, Pinehas no Israel lasi ha'dan sila-la la'o leona. Ala la'oela Ruben ma Gad hataholin sila-la, leme Gilead, boema ala fali le'us leo Kanaan leu, de basa boema, lafa'da dede'ak ndia neu hataholi Israel-la.

³³Boema hataholi Israel-la boeo, dalen-nala loa-loak mesan loo dede'ak ndia, nalosa ala koa-kio Manetualain. Ala ta kokolak seluk, la'eneu sila dale tutu'un soaneu lata'ti loo Ruben ma Gad hataholin-nala, ma soaneu tao lakalulutuk nusan-nala so'on.

³⁴Mate'en-na, leo Ruben ma Gad ndia, lafa'da lae, “Mei tutunu-hohotuk ia, ana da'di sakasii soanei ita basa-basa-tala nae MANETUALAIN nde Manetualain-na.” Boema ala foi mei tunu-hotuk ndia na'de, “Sakasii.”