Read Termanu YOSUA 24 Bible Online

YOSUA 24 - Termanu bible

YOSUA 24

¹Yosua naloo nakabubua basa leoina Israel-la leon-nala neme Sikhem, de nadenu basa lasi nggolok-kala, mauli-malangan-nala, manakee-manafula, ma basa malanga solda'du matuaina-la, fo mai lataa. Boema, ala mai lataa Manetualain.

² Boema Yosua nafa'da basa-basas nae, “Mamanene hata fo MANETUALAIN fo Israel Manetualain-na, nafa'dan neu emi, ‘Makahulun eli, emi bei-ba'i kaim-mala leo leme Lee Efrat-ta selik, ma ala sene-do'ok neu lamatua daebafak-kala. Terah, fo Abraham ma Nahor aman nai dalek boe.

³ Boema Au aloo falik Abraham, fo emi ama kaim ndia neme nusak manai Efrat ndia selik, de Au adenun, fo ana la'ok okofefeok nusa Kanaan-na lala'en-na. Au fen tititi-nonosik makadotok. Makasososan-na, Au fen Isak,

⁴ boema Au fe Isak anatouk 2, fo nde Yakob ma Esau. Au fe letelepak Edom-ma neu Esau, fo da'di ndia pusakan, tehu Yakob fo emi ama kaim ndia, no anan-nala sama-sama lali leo Masir neu.

⁵ Basa boema, Au adenu Musa ma Harun, ma Au fe susa-soe matuaina, tuni la'e Masir, boema Au kalua heni emi meme naa mai.

⁶ Au o falik emi bei-ba'i kaim sila-la, kalua leme Masir mai, boema hataholi Masir-rala usis lenik kaleta musu ma solda'du manasa'e ndala-la. Ma lelek emi bei-ba'i kaim sila-la losa Tasi Gelagah,

⁷boema laloo bou-bou neu Au loke tutulu-fafalik. Boema mamanak manai sila loo hataholi Masir-ra tala'da ndia, Au tao-an da'di makahatuk, ma Au akadofu ketu hataholi Masir sila-la nenik tasi oe, losa basa-basas bolo. Emi bubuluk, basa hata fo Au taon soaneu Masir so. Emi leo meme moo solokaek-ka, doon-na seli.

⁸ Boema Au o emi leo nusak, fo hataholi Amori-la leo leme Lee Yarden-na boboan dulu. Hataholi sila latati loo emi, tehu Au fe emi sengis. Emi mangatuu-ma nusan-na, de Au tao amopo-amate hataholi sila.

⁹ Boema Moab manen-na, fo nde Balak, fo Zipor anan-na, la'ban emi. Nadenu hataholi neu leo Bileam, fo Beor anan-na, de noke, fo daenga Bileam soo-supa emi.

¹⁰Tehu, Au ta tunga Bileam hihii-nanaun fa, boema ana ba'e-pala emi. Au soi-tefa ala emi neme Balak mai-a leondiak.

¹¹ Basa boema, emi lena Lee Yarden-na, de emi losa Yerikho. Hataholi Yerikho-la lata'ti loo emi, leondiak boe, hataholi Amori, hataholi Feris, Kanaan, Het, Girgasi, Hewi ma hataholi Yebus-sala. Tehu Au fe emi sengi la'iesak-kasa.

¹² Nai lelek emi tutulumatak fo mata'ti moos boema, Au tao-alas lapangamak ma ala bii, nalosa Amori manen ka duak sila-la, lalai leme emi mai. Emi sengi, ta hu kande emi tafainam-ma, ma boeo ta hu kande emi kokoum-ma fa.

¹³ Dae fo Au fen neu emi ndia, emi sipon ta no toto'a-sosotak fa. Ma kota-kota fo Au fen neu emi ndia, emi ta nde mapadedeik-kasa fa. Tehu besak ia, emi nde leo nai naa, ma emi boeo nde mi'a ai angol-la boan-na, ma ai setun-na boan-na, te se'kona emi ta nde sele ai sila-la fa.’ ”

¹⁴Yosua kokolak nakandoo nae, “Da'di, besak ia, fe ha'da-holomata neu MANETUALAIN. Mamahele neun no dalek-katematuak ma no lilinekak. Si'u heni basa lamatua daebafak, fo makahulun-na, emi bei-ba'i kaim-mala sene-do'ok-kasa neme Mesopotamia ma Masir. Ka'da mamahele neu MANETUALAIN.

¹⁵Leounik-ka, emi ta nau mamahele neu MANETUALAIN fa soona, faik ia boe, ho'i nakeketuk, emi nau mamahele neu see: neu lamatua daebafak, fo makahulun-na emi bei-ba'i kaim-mala sene-do'ok-kasa neme Mesopotamia, do neu hataholi Amori, fo besak ia emi leom-ma nusan-na, lamatua daebafan-nala. Tehu ami — au ma au teidaleng-ngala — neukose mamahele ka'da neu MANETUALAIN.”

¹⁶Boema hataholi Israel sila-la lataa lae, “Neukose ami ta la'oela MANETUALAIN makadondook, fo ami mamahele neu lamatua daebafak-kala fa!

¹⁷MANETUALAIN fo ita Manetualain-na, nde soi-po'i ita bei-ba'i kain-nala, ma ita neme ata nai Masir. Ita tita basa, MANETUALAIN tao manada'di beuk-kala so. MANETUALAIN nasulu-nahapa ita tataas esa, nai ita leleo-lala'on-na dalek, tunga nusa dea-la.

¹⁸Ma lelek ita masok nusak ia, MANETUALAIN usi heni basa hataholi Amori manaleo nai ia-la. Da'di, ami nau makaluku-makatele neu MANETUALAIN nana Ndia nde ita Manetualain-na!”

¹⁹Boema Yosua nafa'da nae, “Tehu fafa'kama, neukose emi ta mapalani makaluku-makatele mahele neu MANETUALAIN fa, nana Ndia Manetualain malalao-malalafuk, Fo Ka'da Kisak. Ana ta nau hataholi nakasusu'dik no fan. Metema, emi la'oelan, fo makaluku-makatele neu lamatua daebafak fe'ek soona, neukose Ana ta fe do'o do ampon neu emi sala-singom fa. Nasafalin-na, neukose Ana la'ban ma Ana huku emi. Neukose, Ana tao namopo-namate emi, leomae makahulun-na, Ana malole no emi.”

²¹Boema hataholi Israel sila-la lataa lae, “Ta! Neukose ami ta makaluku-makatele neu lamatua daebafak fe'ek-kala fa. Neukose, ami mamahele ka'da neu MANETUALAIN!”

²²Boema Yosua nae, “Nah, emi nde da'di sakasii, mae emi maketu basa, soaneu mamahele ka'da neu MANETUALAIN.” Boema lataa lae, “Tete'ek-ka ami nde da'di sakasiin-na.”

²³Yosua nae, “Metema leondiak soona, si'u heni leoina fe'ek-kala lamatua daebafan manai emi dalek-ka, ma maheluk mae neukose emi lilineka neu MANETUALAIN fo Israel Manetualain-na.”

²⁴Boema, hataholi sila-lafa'da Yosua lae, “Neukose ami makaluku-makatele ka'da neu MANETUALAIN, fo ita Manetualain-na. Neukose, ami tunga paletan-nala.”

²⁵Boema nai faik ndia, fo nai Sikhem, Yosua tao hehelu-balataak no hataholi Israel-la; ma nai ndia boe, ana fes hoholo-lalanek ma nakanenetek fo ala muse tungan.

²⁶Ana sulak basa hoholo-lalanek ma nakanenetek sila-la nai Manetualain Susula Hoholo-lalanen dale. Basa boema, ana ho'i-na, batu matua esa, de napadedeik-kana neu ai manituk huun-na, fo nai mamana hehelik soaneu MANETUALAIN.

²⁷Basa ndia boema, Yosua nafa'da basa hataholi sila-la nae, “Batu ia, ana da'di ita sakasiin-na. Basa hala-kokolak fo MANETUALAIN kokolak-kana neu ita, Ana kokolak basan nai batu ia matan-na so. Da'di, neukose batu ia, nde da'di sakasii ba'eneu emi, fo ana fe nafandendelek neu emi, fo ela emi ta la'ban emi Manetualaim-ma fa.”

²⁸Mate'en-na, boema Yosua nadenu hataholi sila fali le'us; boema basa-basas fali le'us leo esa-esak daen-na neu.

²⁹Basa boema Yosua, fo Nun anan-na, fo MANETUALAIN atan ndia maten nai teun natun esa sanahulu.

³⁰ Latoin nai daen dale, fo nai Timnat-Serah, nai letelepak Efraim fo nai Letek Gaas-sa, boboan kii.

³¹Lelek Yosua bei naso'da, hataholi Israel-la lakaluku-lakatele neu MANETUALAIN. Ma lelek mate basan boeo, bei lakaluku-lakatele lahele neu MANETUALAIN lelek nai sila dalek, bei hapu mauli-malangan fo lita matan basa hata lala'en fo MANETUALAIN taon, soaneu hataholi Israel-la.

³² Latoi Yusuf popolan fo hataholi Israel-la lenin neme Masir mai-a, nai Sikhem, nai dae fo Yakob asa-nan nenik doifulak natun esa neme Sikhem anan Hemor, anan-nala mai. Yusuf tititi-nonosin-nala hapu dae ndia.

³³Basa boema, mate Eleazar fo Harun anan-na boe, de latoin nai Gibea, fo nde kota manai letelepak Efraim-ma. Ala fe basa kota ndia neu Pinehas, fo Eleazar anan-na so.