Read Termanu YOSUA 5 Bible Online

YOSUA 5 - Termanu bible

YOSUA 5

¹Basa mane Amori manai Lee Yarden-na boboan muli, ma basa mane Kanaan manai Tasi Tala'dak-ka su'un-na, lamanene lae MANETUALAIN Manakoasa, tao nama'da lee Yarden-na, nai lelek hataholi Israel-la lena lee ndia. Boema ala bii ma ala dele bengge'be, nanahu hataholi Israel-la.

²Nai lelek ndia, MANETUALAIN nafa'da Yosua nae, “Taom-ma dope esa neme batu mai, boema tao seluk feta sunat soaneu hataholi Israel-la.”

³Boema, Yosua tao tunga MANETUALAIN paletan-na, de ana sunat hataholi Israel-la nai mamanak fo ala foin na'de Pupuku Sunat.

⁴ Nai lelek hataholi Israel-la kalua leme Masir mai-a, ala sunat la'iesak toun-nala so. Tehu nai lelek laleu-lalaak nai moo solokaek-ka, teuk haahulu dalen-na, ala ta sunat ana toun-nala esa boeo. Ma nai tepo-lelek teuk haahulu ndia mate'en-na, touk fo lelek ala kalua leme Masir mai, teun-na nandaa teken solda'du, mate la'iesak-kasa so, nanahu ala ta tunga MANETUALAIN paletan-na fa. Boema, nandaa no MANETUALAIN soo-supan, de ta fes loak lita nusak fo tetu-temak ma maisi-maminak fo Ana helu fen neu sila bei-ba'i kain-nala.

⁷Hu ndia de, ala ta sunat ana toun-nala fa. Yosua sunat-tala nde bobongik makabuik ia-la Yosua.

⁸Ala sunat basa la'iesak-kasa boema, lahele leme ofun-nala dalek, losa bisun-ala lea-hai.

⁹MANETUALAIN nafa'da Yosua nae, “Faik ia, lakadadaek emi da'di leo ata nai Masir-ra, Au lose henin so.” Hu ndia de, mamanak ndia nanafoik na'de Gilgal losa hatematak ia.

¹⁰ Lelek ala bei ofu leme Gilgal fo nai masadokek manadeka no Yerikho-a, te ala tao feta Paskah nai fai le'donoson-na, nai bulak ndia fain sanahuluhaa.

¹¹Neu faik balahaan-na boema, soaneu ka la'i makasososan-na, la'a nana'ak fo nusa Kanaan-na buna-boan, fo nde: loti fo ta pake laluteik ma gandum nanadalak.

¹² Nai faik ndia boe, kokis manna ta tu'da neme lalai mai so'on, de hataholi Israel-la hahae la'a kokis manna. Mulai faik ndia, la'a nusa Kanaan-na buna-boan.

¹³Faik esa boema, Yosua nai mamanak esa, deka no Yerikho. Kaiboik, nita touk esa, napaadeik nai matan-na, no tafainan-na nai liman dale. Yosua neu deka no hataholi ndia, de natanen nae, “O ia, tia-laik do musu?”

¹⁴Hataholi ndia nataa nae, “Ta tia-laik, ma ta musu boen. Au mai leo ia mai, da'di leo MANETUALAIN malanga solda'du matuainan.” Yosua namanene dede'ak ndia boema, no lai-laik, nakaluku-nakatele neu hataholi ndia. Yosua nae, “Au ia, Tuan atan. Hata fo au bisa taon soaneu Tuan?”

¹⁵MANETUALAIN Manakoasa, malanga solda'du matuainan ndia, nataa nae, “O'du heni o ta'bueim-ma; te o mapadeik nai mamanak ndia nde ben-na, dae malalao-malalafuk.” Boema, Yosua o'du heni ta'buein-na.