Read Termanu YOSUA 6 Bible Online

YOSUA 6 - Termanu bible

YOSUA 6

¹Nai kota Yerikho, lanea lahele lelesuinan-nala so, ma ala kena laheheles, fo ela hataholi Israel-la ta hapu masok leo dalek leu fa. Ala ta fe hataholi esa boen, bole masok, do kalua kota ndia fa.

²MANETUALAIN nafa'da Yosua nae, “Besak ia, Au fe o, kota Yerikho no manen-nala, ma solda'du palanin sila-la.

³O ma o solda'dum-mala, muse la'ok makadadalak okofefeo kota ndia, fo faik esa soona la'iesa, nai faik nee dalen-na.

⁴Imam hitu, esa-esak neni pupuuk, fo muse ala la'ok nai Peti Hehelu-balataak-ka uluk. Neu fai ka hitun-na soona, o ma o solda'dum-mala, muse la'ok okofefeo kota ndia la'i hitu, fo ndia te, basa imam-mala puu pupuun-nala.

⁵Basa ndia soona, imam ka hituk sila-la, muse puu pupuun-nala liin-na manalu. Metema, emi mamanene pupuuk-ka lii manalun ndia soona, basa solda'du-la eki lapane'e fo nadodolo, soona neukose ndefa heni, kota ndia papala nanadaman-na. Tu'tik-ka, emi basa-basam-mala, muse meu leo kota ndia dalek meu.”

⁶Boema, Yosua naloo basa imam-mala, de nafa'das nae, “So'u-ma Peti Hehelu-balataak ndia; fo emi hataholim hitu, muse la'ok lai uluk, ma ala ho'u pupuuk.”

⁷Boema, Yosua nadenu solda'dun-nala la'ok lakadadalak okofefeo kota ndia, fo dalak manamanea nai uluk-ka, lakahuluk, fo ala la'ok nai MANETUALAIN Peti Hehelu-balataan-na uluk.

⁸Nandaa no Yosua paletan-na, de dalak manamanea nai uluk-ka, lakahuluk imam-mala manapuu pupuuk-kala, de imam-mala manandolo Peti Hehelu-balataak-ka tunga, basa boema dalak manamanea nai dea, ala la'ok lai dea. Lelek ala la'ok-ka, ala puu pupuuk-ka lakandondoo henin.

¹⁰Basa solda'du-la, nanapaleta basak, fo boso eki ma ta bole lahala fa, metema Yosua beita fe ta'du fa.

¹¹Leondiak, Yosua nadenu solda'dun-nala leni Peti Hehelu-balataak-ka, okofefeok kota ndia la'i esa, basa boema, ala fali leo mamana ofu leu, de ala sungu leme ndia.

¹²Nai fai balahaan-na, bei fafaianak nanseli, te Yosua fo'a, boema soaneu ka la'i dua-na, basa imam-mala, ma solda'du-la la'ok lakadadalak okofefeo kota ndia, tunga dalak huas-sa: makasososan-na, dalak manamanea manai uluk-ka, de basa boema, imam ka hituk manapuu pupuuk-kala, basa soona imam-mala manandolo Peti Hehelu-balataak-ka tunga, ma mate'en-na, dalak manamanea manai dea. Ndia te, pupuuk-ka nalii nakandondoo henin.

¹⁴Nai fai ka dua ndia, ala la'ok okofefeo kota la'i esa, de basa boema, ala fali le'us leo mamana ofu leu. Ala tao leondiak tunga faik, nai faik nee dalen-na.

¹⁵Neu fai ka hitun-na boema, ala fo'a fafaianak, lelek le'do-a besak-ka tii, boema ala la'ok lakadadalak okofefeok kota Yerikho ndia la'i hitu, sama leo fai-fai maneuk-kala. Ka'da nai fai ka hitun-na mesak-kana, ala la'ok okofefeok kota ndia, la'i hitu.

¹⁶Neu ka la'i hitu-ma, manapuu pupuuk-kala, puu pupuun-nala tu'tik-ka, Yosua fe ta'du neu solda'du-la lala'en-na, fo ala eki. Yosua nae, “MANETUALAIN fe emi kota ia so!

¹⁷Basa kota no oe-isin lala'en-na, muse tao nakalulutuk la'iesak-kasa, fo da'di leo tutunu-hohotuk soaneu MANETUALAIN. Ka'da Rahab, fo ina manasosoa-piaok ndia, no teidalen-nala mesak-kasa, bole fes laso'da, nanahu ana tulu-fali ita mata-matan-nala so.

¹⁸Ta bole ho'i hata esa boen, neme basa hata fo muse tao nakalulutuk-kasa mai. Metema emi ho'i soona, neukose soe ma ani-sangu, la'e Israel mamana ofun-na.

¹⁹Muse pe'da hehelik basa bua lilofulak, lilopilas, liti, ma besi, soaneu MANETUALAIN pe'das lai mamana pepe'da MANETUALAIN hata-heton-na dalek.”

²⁰ Boema, basa imam-mala, puu pupuun-nala. Ma hataholi Israel-la lamanene pupuuk-kala liin-na tu'tik-ka, ala eki lapane'e, de ndefa heni kota Yerikho-a, papala nanadaman-na. Basa solda'du Israel-la lala'en-na kae tutik, de leu leo kota ndia dalek leu, fo langatuu-lan.

²¹Basa hata manai kota ndia dalek, lasi-mulik, ina-touk, ala taolisas nenik tafaina. Ala taolisa la'iesak bana-manu sapi, bi'ilopo ma keledei lala'en-na boe.

²²Yosua nafa'da hataholi ka duak manada'di mata-mata la, nae, “Meu leo ina manasosoa-piaok ndia uman meu, fo moon kalua sama-sama no teidalen-nala, sama leo emi helu neun.”

²³Boema, mata-mata ka duak sila-la, leu de loo Rahab kalua sama-sama no ina-aman, tolanoon-nala, ma teidale fe'e-fe'en-nala. Basa Rahab ndia teidalen-nala no atan-nala lala'en-na, loos kalua leo mamana nee-nee lino-linok-ka, deka no Israel mamana ofun-na.

²⁴Basa boema, solda'du Israel-la, hotu heni kota ndia, no basa hata manai dalek-kala lala'en-na, ela ka'da bua-lo'a lilopilas, lilofulak, liti ma besi. Ala ho'i-la bua-lo'as sila-la, de lenis leo mamana pepe'da MANETUALAIN hata-heton neu.

²⁵ Tehu, Yosua fe Rahab fo ina manasosoa-piaok ndia, no basa teidalen lala'en-na, laso'da, nanahu ana tulu-fali Yosua nadenu mata-mata ka duak, fo nadenus leu leo Yerikho leu. (Losa faik ia, bei hapu Rahab tititi-nonosin lai Israel.)

²⁶ Nai lelek ndia, Yosua kalua kena-ka'ik-ka nde ia nae, “Su'di see boe, fo ana sanga enok nafofo'a falik kota Yerikho ia soona, neukose MANETUALAIN soo-supan la'en. Soo-supak-ka nde ia: See kande nafofo'a falik kota Yerikho-a soona, neukose namopo ana ulun-na; ma see kande pasak falik lelesuinan-nala soona, neukose namopo ana mulianan-na.”

²⁷MANETUALAIN nok Yosua, de Yosua na'den-na, nananita-nalelak nai basa nusak ndia lala'en-na.