Read Termanu YOSUA 8 Bible Online

YOSUA 8 - Termanu bible

YOSUA 8

¹MANETUALAIN nafa'da Yosua nae, “Makabubua basa o solda'dum-mala, fo la'ok mos leo Ai meu. Dalem-mala boso ba'ihana ma boso bii! Neukose Au fe emi sengi mane Ai-a. Neukose, o loso-ma laun-na, kotan-na, ma nusan-na.

²O muse tao kota Ai no manen-na, sama leo makahulun-na, o tao Yerikho no manen-na. Tehu oek ia soona, emi bole ho'i-ma hata-heton ma bana-manun-nala, fo emi manuus. Maheheleaom leona, fo meu sapu-ma, kota ndia no kaiboik, neme dea mai.”

³Boema Yosua naheheleaon, fo neu leo Ai neu, sama-sama no la'iesak solda'dun-nala. Ana hele-na, solda'du palani lifun teluhulu boema, nadenus, fo ala la'o le'odaek,

⁴ma ana fes paleta nde ia nae, “Ke'ke meu kota ndia boboan eli, tehu boso nai dook-ka nanseli; ma maheheleaom, fo meu sapu-malas.

⁵Au ma hataholi sama-sama loo au-a, neukose ta dook-ka neme kota ndia mai fa. Metema hataholi Ai-la kalua mai, fo ala la'ban ami soona, neukose ami lepos fali, fo ami malai sama leo makahulun-na.

⁶Neukose, ala usi lahele ami losa dook-ka neme kota ndia mai, de laedaenga ami malai sama leo makahulun-na.

⁷Nai lelek ndia nde, emi muse kalua meme emi mamana nafunim-ma mai, fo mangatuu-ma kota ndia leona emi. MANETUALAIM-ma, neukose fe nusak ndia neu emi.

⁸Mangatuu-man soona, hotu heni kota ndia, nandaa no MANETUALAIN paletan-na. O bela-ba'um nde ndia.”

⁹Basa boema, Yosua nadenus leu ke'ke nai Ai boboan muli, fo nai Ai ma Betel tala'da, de lahani leme ndia. Tehu Yosua sungu nai hataholi Israel-la ofun dale.

¹⁰Fafaianak nanseli boema Yosua paleta hataholi fo sama-sama loon-na, fo daenga lakabubua. Basa boema Yosua no Israel mauli-malangan-nala loo solda'du sila leo Ai leu.

¹¹Solda'du sila-la, ala la'ok sama-sama loo Yosua lasale leo kota Ai lelesuina makasososan-na leu, boema ala ofu leme boboan kii, fo nai bee, hapu bafak esa nai sila ma kota ndia tala'da.

¹²Nadenu, fafa'kama hataholi 5.000 leu ke'ke nai kota ndia boboan muli, fo nai Ai ma Betel tala'da.

¹³Da'di, ana atol solda'du matee-matatik sila-la leo iak: ana pe'da solda'du makasososak-ka nai kota ndia boboan kii, ma solda'du fe'ek-kala nai boboan muli, te Yosua soona, le'odaek ndia, neu leo bafak dale neu.

¹⁴Mane Ai-a nita Yosua hataholin-nala tu'tik-ka, no lai-laik ana ho'i nakeketuk. Ndia no basa hataholin-nala kalua, de ala la'ok lasale leo bafak Yarden-na neu, fo leu sapu-la hataholi Israel-la, nai mamanak makahulun-na. Ana ta bubuluk nae, ba'ihanak seluk fa bai te, neukose ala sapu-lan neme dea mai.

¹⁵Yosua no ana paletan-nala tao nono'kabai, sila lakadedeak; lalai lasale leo moo na'u taak-ka leu.

¹⁶Ala paleta basa touk manai kota Ai-a, fo leu usi Yosua no solda'dun-nala, de ala boetai dook-ka leme sila kotan-na mai.

¹⁷Basa hataholi manai Ai-la, ala kalua, de ala usi hataholi Israel-la, nalosa ta lanea lelesuina fa, de ala po'ilotak-kana poo-poo.

¹⁸Basa boema, MANETUALAIN nafa'da Yosua nae, “So'uk o teem-ma, fo matu'dun leo Ai neu; besak ia, Au fe kota ndia leo o neu.” Yosua tao tunga MANETUALAIN paletan ndia.

¹⁹Yosua bei so'uk liman-na, tu'tik-ka solda'du manake'kek sila-la, no lai-laik ala fo'a, de leu sapu-la kota ndia, de langatuu-lan. Tu'tik-ka ala hotu heni kota ndia.

²⁰Hataholi Ai-la lipa leo dea leu te, lita ha'i masuk-ka masu-masu losa lalai. Yosua no solda'dun-nala boeo, lita ha'i masuk-ka boema, ala bubuluk lae sila solda'du fe'en-nala langatuu-la kota ndia so. Da'di, Yosua no solda'dun-nala lepos fali, fo leu sapu-la hataholi Ai-la, de ala taolisas. Hataholi manai Israel manai kota Ai sila-la boeo ala mai, de basa-basas sapu-lalas, nalosa lakahapi-la hataholi Ai-la, de ala ta hapu lalai so'on. Ta hapu hataholi esa boen, hapu naladeak fa, te hataholi Israel-la taolisa la'iesa kasa so,

²³ela ka'da kota Ai manen-na. Ala ho'u-lan, de loon neu nataa Yosua.

²⁴Solda'du Israel-la taolisa la'iesak solda'du musu, fo manausis leme moo na'u taak-ka boema, ala fali le'us leo Ai leu, de ala taolisa basa hataholi manai naa-la.

²⁵Yosua so'uk nahele teen-na nasale leo Ai neu, te ana ta nakonaheni fan, losa ala taolisa la'iesak hataholi Ai-la. Faik ndia boe, hataholi Ai manamatek-kala, basa-basan lala'en-na, ina touk, hataholi lifun sanahulu dua.

²⁷Hataholi Israel-la, ho'i-la ala kalo leni bana-manu, ma bua-lo'as manai kota ndia, de ala taos da'di sila hata-heton, nandaa hata fo MANETUALAIN nafa'dan neu Yosua.

²⁸Yosua hotu heni Ai, de ana po'ilotak-kana da'di ai-batu madodouk, losa besak ia.

²⁹Ala lona kota ndia manen-nam neu aihuuk esa lain, de ala po'ilotak-kana neme ndia, losa le'donoso. Nai lelek le'do tenak boema, Yosua nadenu hataholi neu ho'i-na popolan-na, de ala tapan neu kota lelesuinan-na matan-na. Basa boema launu batu makadotok nanseli, neu mamanak ndia. Batu sila-la bei lai naa, losa besak ia.

³⁰ Basa boema, Yosua nafofo'a mei tunu-hotuk esa nai Lete Ebal-la soaneu MANETUALAIN fo Israel Manetualain na.

³¹ Ana tao mei tunu-hotuk ndia, nandaa no natutu'du-natutu'duk manai Musa fo MANETUALAIN atan ndia, Susulan dale soaneu hataholi Israel-la nae: “Mei tutunu-hohotuk esa, nanataok neme batu mai, fo beita nanatao nitak nenik besi fa.” Nai mei tunu-hotuk ndia lain, hataholi Israel-la, tunu-hotu fe MANETUALAIN: tutunu-hohotuk nanatunuk, ma sila tutunu-hohotu mole-damen boe.

³²Nai naa, hataholi Israel-la da'di sakasii, Yosua sulak MANETUALAIN hoholo-lalanen manai Musa Susulan dale, neu mei tunu-hotuk ndia batun-nala.

³³ Hataholi Israel-la, loo mauli-malangan-nala, malanga solda'du matuainan-nala, manakee-manafukla-la, ma hataholi nusa dea manaleo nai sila tala'da boeo, lapadeik lai MANETUALAIN Peti Hehelu-balataan-na bekeselik, lasale leo basa imam Lewi fo manandolo Peti Hehelu-balataak ndia. Hataholi sila-la, nggelok lasale leo Lete Gerizim-ma, ma nggelok seluk, lasale leo Lete Ebal-la. Musa, fo MANETUALAIN atan ndia, ana fe basa paleta, fo ela ala tao dede'ak ndia, metema losa fain-na, soaneu ala sipo baba'e-papalak, fo MANETUALAIN heluk-ka.

³⁴Basa boema Yosua lees napane'e, hoholo-lalanek lala'en-na, nandaa no hata fo nanasulak nai Susula Hoholo-lalanek dale, fo nai dalek hapu baba'e-papalak ma soo-supak boe.

³⁵Yosua lees basa Musa paletan-nala neu hataholi Israel fo lakabubua nai ndia, nai dalek hapu inak-kala, ni'iana-la, ma hataholi nusa dea manaleo nai sila tala'da.