Read Termanu 2 TESALONIKA 3 Bible Online

2 TESALONIKA 3 - Termanu bible

2 TESALONIKA 3

¹Tolano-tolanoo ngala lemin! Au oke emi hule-haladoi soaneu ami. Hule-haladoi, fo ela Lamatua ka dede'a kokolan nakapepela nakandoo no lai-laik, ma ala sipo kana no malole, sama leo makahulu na emi boe.

²Hule-haladoi boe, fo ela Manetualain po'i ami neme hataholi mangalau kala mai. Nana hataholi ba'u ka lamanene halak ndia, tehu ta basa hataholi sila la, lamahele fan.

³Tehu Lamatua ka, mana lilinekak. Neukose natetea-nahehele emi, ma nasulu-nahapa emi neme Hataholi Mangalauk ndia mai.

⁴Ma ami mamahele te'e-te'e, Lamatua ka nde tao na ami mamahele emi tao-no'i ma neukose emi tao-no'i makandoo, hata fo ami madenun neu emi a.

⁵Ela leo bee na, Lamatua ka hela-nole emi, fo daenga emi boetai malelak Manetualain susue-lalain neu emi a, boema Kristus fe emi be'ibalakaik fo emi hapu makatatakak nai basa dede'ak lala'ena dalek.

⁶Tolano-tolanoo ngala lemin! No Lamatuak Yesus Kristus koasa na, ami moke neu emi, fo madook ao mala neme basa hataholi mana pela-bale kala mai, ma hataholi fo ala ta tunga nanolik fo ami manoli sala fa.

⁷Emi nde bubuluk mae, emi muse maso'da sama leo ami. Nai lelek fo ami bei nai emi tala'da, ami ta pela-bale fa.

⁸Ami ta mi'a-minu hiik hataholi nana'a-nininun fa. Te lele'do-le'odaen, ami puse ma titi no ue-le'di sa, fo daenga ami boso tao susa emi esa boen.

⁹Ami tao leondiak, nana ta hu ka nde ami ta manuu hak soaneu ami makaseti emi fo tulu-fali ami fa te, hu ka nde ami nau da'di natutu'duk esa soaneu emi.

¹⁰Nai lelek fo ami bei nai emi tala'da, ami fe emi nakanenete ka nae, “Hataholi fo, ana ta nau naue-nale'di fa soona, ta bole na'a-ninu fa.”

¹¹Ami kokolak dede'ak ia, nana ami mamanene lae, hapu hataholi la lai emi dalek, ala pela-bale. Ala ta nau tao hata esa boen, te langa nala lakadoto lo ka'da hataholi fe'ek ito-ato nala.

¹²No Lamatuak Yesus koasa na, ami paleta hataholi sila la, ma ami fes nasanene'dak, fo ela laue-lale'di, soaneu ala tunga sanga aon, sila so'da na.

¹³Tehu ba'eneu emi soona, emi boso pela-malua tao-no'i tatao-nono'i malole a.

¹⁴Fafakama neukose hapu hataholi ta nau tunga hata fo ami mafa'dan nai susulak ia dalek fa. Soona, ia'akouk hataholi matak leondia ka, ma boso leo-mapalasa moon, fo daenga ana mae.

¹⁵Tehu boso taon da'di musu; ka'da manoli-mafa'dan sama leo tolanoo ka.

¹⁶Lamatua ka nde bee na, ita oe mata so'da-mole na. Ela leo bee na, Ana fe so'da-molek neu emi, nai basa dede'ak lala'ena dalek. Ela leo bee na, Lamatua ka no emi basa-basa mala.

¹⁷Nate'ak neme au fo Paulus. Au mesa nga nde sulak nate'ak ia. Au sulak ta'du ia, neu basa au susula ngala.

¹⁸Ela leo bee na, ita Lamatuan Yesus Kristus ba'e-pala emi basa-basa mala. Ha'da-holomata neme ami, Paulus