Read Termanu 1 TIMOTIUS 3 Bible Online

1 TIMOTIUS 3 - Termanu bible

1 TIMOTIUS 3

¹Dede'ak ia, memak tete'e ka la'en. “Hataholi fo ana nau da'di mauli-malanga salani ka, hataholi ndia ana hele tatao-nono'ik esa, beli na seli.”

² Mauli-malanga salanik esa, muse hataholi bu'u-ba'e tak, saon ka'da esa, nakatatakak nala dale na, manatee tenok, ma mana ito-ato malole; ana nau sipok hataholi leo uman neu, ma nanoli nalelak hataholi; boso hataholi mana mafuk ala lalu;

³ana ta hii natutu-nafepa fa. Te hataholi ndia, hala-kokolan mangana'uk, ana hii ka'da mole-dame. Ana ta bole tene peta doik fa.

⁴Muse ana ito-ato nalelak uma loon no malole, ma nanoli ana nala, fo ala tunga paleta na, ma ala fe ha'da-holomata neun.

⁵Nana metema hataholi esa, ta ito-ato nalelak uma loon fa soona, neme bee mai a, ana hapu ito-ato nalelak Manetualain hataholi kamahehele nala?

⁶Hataholi mauli-malanga salanik esa, ta bole hataholi fo, besa ka ana da'di hataholi salanik fa, nana neukose hataholi ndia, ana da'di hataholi mana koaok, fo nanasoo-supak, sama na leo makahulu na Nitu a boe.

⁷Hataholi ndia, na'de na ta nanggenggeo nai lau na dalek fa; nana metema ta leondiak fa soona, neukose hataholi la lakamumulu-lakamamae kana, fo ana tu'da leo Nitu a, hihi'in dale neu.

⁸Mana tulu-fali salani ka boeo, muse hataholi malole, ma ana tao tunga ka'da ndo na; ana ta tene peta doik, ta maninu ala lalu fa.

⁹Muse ala ho'u lahele, hataholi salani ka namahehelen fo Manetualain nanoli kala, no dale matetuk.

¹⁰Ela leo bee na, palisak makahulu kasa, fo metema tete'e ka, bu'u-ba'e ta kala soona, besa ka fes lalalau-laoono nai salani ka dalek.

¹¹Hataholi sila, saoina nala boeo, muse hataholi malole, boso hataholi mana tui dede'a pe'dak. Muse lakatatakak lalelak ao ina nala, ma ala tao tunga ka'da ndo na, nai basa dede'ak lala'ena dalek.

¹²Hataholi mana tulu-fali salani ka, muse saon ka'da esa. Muse ana ito-ato nalelak ana nala ma uma loon no malole.

¹³Hataholi mana tulu-fali, no malole nai salani ka dalek, neukose nanafe ha'da-holomata, ma ana boetai napalani kokolak la'eneu sila namahehele na, neu Kristus.

¹⁴Au amahena, ta doo ka so'on te, neukose au ne'i donge-dama o. Leomae leondiak boe, au sulak fe o susulak ia,

¹⁵fo ela metema, au bei akamama'ak au nene'i nga boeo, o bubuluk basa tao leo beek fo, ita muse taso'da sama leo Manetualain tei dalen, fo nde Manetualain hataholi kamahehelen fo maso'dak. Salanik leondia ka nde, sama na leo dii mana tia-to'bak esa, fo ana tia-to'ba nahele Manetualain nanoli ndo nala.

¹⁶Ta hapu hataholi esa boen, hapu nalelesi nae, basa nanolik fo Manetualain natu'du kala nde bee na, tete'e ka: Natu'du ao ina na, sama leo hataholi daebafa ka. Manetualain Dula Dale na nafa'da nae, ndoos, boema basa ata nusa so'da kala litan. Tutui na, nanatui-bengak nai basa nggileo-bobongi kala tala'da, boema basa daebafa ka lamahelen, ma nanaso'uk leo nusa so'da ka neu.