Read Termanu 1 TIMOTIUS 5 Bible Online

1 TIMOTIUS 5 - Termanu bible

1 TIMOTIUS 5

¹Boso kokolak balakaik moo toulasi kala, te kokolak koe-koe moos, sama na leo o kokolak moo o amam nde ndia. Tao muli-solu kala da'di o tolanom,

²boema tao ina lasi kala da'di o inam, ma tao ana fe'oana kala, da'di o fa'di inanam. Taos no ha'da tatao matetu-mandaak.

³Fe ha'da-holomata neu inafalu fo te'e-te'e naso'da mesa kana.

⁴Tehu metema inafalu bee maupu-anak soona, manoli-mafa'da upu-anan sila fo ala taoafik matalolole ina-ama bei ba'in sila la so'da na, nana sila muse balas sila ina ama bei ba'in, dale malole na. Tatao-nono'i leondia ka nde nandaa no Manetualain dale na.

⁵Inafalu fo te'e-te'e naso'da mesa-mesa kana, ma ta hapu hataholi mete-nakanae so'da na te namahena neu ka'da Manetualain soona, muse ana hule-haladoi lele'do-le'odaen fo noke tutulu-fafalik neme Manetualain mai.

⁶Tehu inafalu fo ana nau naso'da nai ka'da namahoko-setelee ka dale ka, meten soona, bei naso'da tehu mana mate basak so.

⁷Manoli nanoli-nafa'dak ia la neu salani kala, fo ala boso tao sala-singok.

⁸Tehu metema hapu hataholi ta nau mete-nakanae tolano ka'a fa'di nala, lena-lenak ana ta nau mete-nakanae uma isi nala fa soona, hataholi ndia nalelesi seluk namahehele na; de mangalau na lenaheni hataholi kamahehele ta kala.

⁹Inafalu fo nandaa sulak na'de na leoinafalu la susulan dale neu a nde: inafalu fo teu na ta bole nai nee hulu dae fa, ana saoana ka'da la'iesa,

¹⁰inafalu fo ana tao malole nai basa dede'ak lala'ena dale ka nde: naka boboi ana nala no malole, namahoko sipok hataholi sungu nai uman, nalalau-naoono hataholi kamahehele kala, tulu-fali hataholi mana to'a ta kala, ma ana tao tatao-nono'i malole lupa-lupa kala no te'e-te'ek.

¹¹Boso sulak inafalu bei muli solu kala leo susulak ndia dalek neu. Nana metema dale sasaoana nala lasuu soona, ala nau sao seluk, fo ta lamahele Kristus so'on.

¹²Soona ala tao salak ndia so. Nana lalelesi sila hala-hehelu na.

¹³Nakalenak seluk bai, ala tu'u-tapa heni le'do fain fo leu dakak hinga uma tai kala. Boema mangalau ina na nde, ala kokolak langgenggeo hataholi na'den, ma hataholi dede'an o, leu sese'dok leo dalek leu, boema ala kokolak dede'ak fo tunga ndo na, ta nandaa ala kokola kana fa.

¹⁴Hu ndia de, au nau inafalu muli solu kala sao seluk fo ala hapu anak, ala ito-ato uma loon, fo ela ita musu noo na, boso hapu loak, tao langgenggeo ita na'de na.

¹⁵Nana hapu ina falu nggelok la'o sala de, ala tunga Nitu a so.

¹⁶Tehu metema ina salanik esa, nai tei dale na dalek hapu inafalu soona, muse ana tulu-falina nafalu ndia; boso fe salani kala mete lakanae inafalu ndia. Fo no enok ndia, salani kala hapu tulu-falina nafalu tolano ka'a fa'di ta kala.

¹⁷Mauli-malanga salanik bee metema nakalala'ok bela ba'un no malole soona, nandaa ana hapu ha'da-holomata, diku la'i dua, lena-lenak, hataholi mana manggate tui-benga ma mana manoli-mafa'da ka

¹⁸ Nana nanasulak nai Susula Malalaok dale nae, “Sapi mana aa'i gandu ma, boso pole nggonggolo na,” boema “Hataholi maue-male'di ka, nanuu hak sipo ngga'di na.”

¹⁹ Metema ala kalaak mauli-malanga salanik esa soona, boso sipo kalaak ndia, ta'da fe'e hapu sakasii dua do lena neme dua mai.

²⁰Hataholi mana tao sala-singo ka, muse kena-ka'in nai basa salani kala matan, fo ela salani fe'e kala, ala bii.

²¹Nai Manetualain, Kristus Yesus ma ata nusa so'da nanahele kala matan, au oke fo ela o tunga basa nanoli-nafa'dak ia la no boso neo hataholi esa boen, ma boso metematak.

²²Boso no lai-laik, o lalaa o lima ma neu hataholi esa langan lain, fo so'un da'di Lamatua ka malalau-maoonon. Metema hataholi fe'ek tao sala-singok soona, boso muu sese'dok nai sala-singok ndia dalek. Manea o ao ina ma fo ela malalaok nahele.

²³Boso minu ka'da oe mesa kana; minu angol faa fo matoto'bi o tei dalem, nana nasi'a o mamahe'di.

²⁴Hataholi nggelok sala-singon, nananaketu-nala'di beitaak, te litan no mangale'dok so. Tehu basa soona, besa ka lita hataholi nggelok sala-singon.

²⁵Leondiak boe, tatao-nono'i malole a, litan tutik. Ma hata nananafuni ka, ta hapu lafuni lala fan.