Read Termanu 2 TIMOTIUS 1 Bible Online

2 TIMOTIUS 1 - Termanu bible

2 TIMOTIUS 1

¹ Timotius fo au ana susue nga! Au, fo Paulus, au sulak fe o susulak ia, nana au amahena, ela leo bee na Amak Manetualain ma ita Lamatuan Kristus Yesus, fe baba'e-papalak, susue-lalaik ma mole-dame neu o. No Manetualain hihii-nanaun de, ala so'u au da'di Kristus Yesus hataholi nadedenun, boema nadenu au, fo au u tui-benga la'eneu maso'dak fo Manetualain helu ka. Ita hapu so'dak ndia, nana ita da'di esa to Kristus Yesus.

³Au oke makasi neu Manetualain fo, au alalau-aoonon no dale katema tuak, sama na leo makahulu na, au bei ba'i kai ngala tao-no'i ka. Au oke makasi tataas esa neu Manetualain, nai lelek fo au afandele o nai huhule-haladoi ka dalek, leomae lele'dok do le'odaek ndia boe.

⁴Au afandele o dale he'di ma. Hu ndia de, au ahiik alanseli, au atongo o, fo ela au amahoko te'e-te'e.

⁵ Au afandele o, nana o mamahele te'e-te'e neu Kristus, sama leo o beim Lois ma o inam Eunike, lamahele te'e-te'e boe. De au amahele o namahehele ma boeo, leondiak.

⁶Hu ndia de, au fe o nasanene'dak, fo ela o tao maso'da falik baba'e-babatik hehelik fo, Manetualain fe o, nai lelek fo, au lalaa au lima nga neu o langam lai na.

⁷Nana Manetualain fe ita Dula Dale ka, ana ta tao na ita da'di hataholi mana bii-mamata'uk fa. Te Manetualain Dula Dalen ndia nde, tao na ita tatea-tahele, ana tao na ita dale na henuk no susue-lalai ka, ma ita takatatakak ta ita ao ina na.

⁸Hu ndia de, o boso bii-mae da'di sakasii la'eneu ita Lamatua na neu su'di see a, ma boeo boso bii-mae malelak au fo, hataholi nanahukuk, hu ka nde Lamatua ka. Te ela leo bee na, no Manetualain be'ibalakain de, o doidoso soaneu Hala Malole ndia.

⁹Manetualain soi-tefa nala ita, ma nalo ita, fo ela ita da'di Ndia hataholi kamahehelen. Ana tao leondiak nana, ta hu ka nde, hata fo ita tao-no'in fa, te hu ka nde, tunga dale tutu'u mesa na, ma susue-lalain, de ita tunga Yesus Kristus, te daebafak ia beita nananakada'dik fa.

¹⁰Boema besak ia, Manetualain natu'du susue-lalain ndia neu ita, ninik ita Mane Mana Fe So'da na fo Kristus Yesus mamai na. Yesus sengi mamate sa koasa na, de nini so'da mana ketu basa ta ka, tunga Hala Malole ndia.

¹¹ Soaneu tui-benga Hala Malole ndia de, Manetualain so'u au da'di Lamatua ka hataholi nadedenun ma mesen.

¹²Hu ndia de, au lu'a-lepa basa doidosok ia la, tehu au amahele ahele, nanahu au bubuluk te'e-te'e, see hataholi fo au amahelek ndia. Au amahele, hata fo Ana fe basan neu au ndia, nanea nabe'in, losa Fai Mate'e ka.

¹³Tunga te'e-te'e neu nanoli ndoos fo, au fe basan neu o so. Ma ela leo bee na, o ho'u mahehele namahehelek ma susue-lalaik fo, ana da'di ita nuun, nana ita da'di esa to Kristus Yesus so.

¹⁴No Manetualain Dula Dalen manai ita dalen dale a, tutulu-fafalin de, ela leo bee na, o manea matalolole dede'a kabelik fo, Ana fe basan neu o a so.

¹⁵O bubuluk basa, hataholi manai nusa Asia, ala la'oela au so, fo Figelus no Hermogenes lai dalek boe.

¹⁶Tehu Onesiforus uma isi nala, ala tao la au amahoko la'i de'ubee so. Ela leo bee na, Lamatua ka natu'du susue-lalain neus. Nana leomae au nai bui dale, tehu Onesiforus, ana ta mae au da'di hataholi bui fa.

¹⁷Au losa Roma tutika, ana sanga enok nakandoo fo ana sanga au, losa natongo no au.

¹⁸Boema o bubuluk basa, ana tulu-fali au ba'u ka nanseli neme Efesus so. Ela leo bee na, Lamatua ka natu'du susue-lalain neu Onesiforus, nai faik fo Lamatua ka naketu-nala'di basa hataholi daebafa ka lala'ena.