Read Termanu 2 TIMOTIUS 2 Bible Online

2 TIMOTIUS 2 - Termanu bible

2 TIMOTIUS 2

¹Timotius, fo au ana nga! Ela leo bee na, o matea-mahele neme susue-lalaik fo Ana fen neu ita, nana ita da'di esa too Kristus Yesus.

²Makahulu na, o mamanene au nanoli ngala neme hataholi makadoto kala matan so, de ela leo bee na o manoli nanolik sila la neu hataholi fo, o mamahele, tete'e ka hataholi sila la, lanoli lalelak hataholi fe'ek.

³O boeo muse doidoso, sama leo Kristus Yesus solda'du mana lilineka mahelen.

⁴Solda'du esa, nakalala'ok bela ba'un soona, neukose ana ta paluu ndia tatao-nono'in so'on, nana ana nau ndia tatao-nono'in, nandaa no ndia malanga na dale na.

⁵Hataholi mana makaminak bola esa, ana ta sengi nai nakaminak esa dalek, metema ana ta tunga nakaminak ndia, nakanenete nala fa.

⁶Hataholi mana tao tina osi esa, ana puselaipana no ue-le'din soona, ndia nde nanuu haak, hapu bubu'u-palusan buna boan.

⁷Tai dodoo, au hala-kokolang ia la, nana neukose Lamatua ka fe o dudu'a aafi matane, fo o malelak basa au hala-kokolang ia la, sosoa-ndandaan.

⁸Mafandendelek dede'ak ia: Hala Malole fo au tui-bengak ndia, nde bee na, halak la'eneu Yesus Kristus, fo Dauk tititi-nonosin nde ndia; Ndia nde Kristus fo naso'da falik neme mamate sa mai so.

⁹Nana hu ka nde tui-benga Hala Malole ndia de, au doidoso; nakalenak bai, ala pa'a au ninik namosina, sama leo ala pa'a hataholi mangalauk esa. Tehu ala ta hapu pa'a laa, Manetualain dede'a-kokolan ninik namosina fa.

¹⁰Hu ndia de au akatatakak, fo au lu'a-lepa basa sila la, soaneu Manetualain hele basa hataholi la paluu na, fo ela hataholi sila la boeo, hapu so'dak fo Manetualain fen tunga Kristus Yesus, ma no matua-mademan fo mana ketu basa ta ka.

¹¹Dede'a-kokolak ia la, tete'e ka la'en: “Metema ita mate basa ton soona, neukose ita taso'da ton.

¹² Metema ita tatea-tahele soona, neukose ita paleta sama-sama ton boe, Metema ita talelesin soona, neukose Ndia boeo, nalelesi ita.

¹³Metema ita ta lilineka tahele fa, tehu Ana lilneka nahele, nana lilinekan, ta nasafali nita fa.”

¹⁴Ela leo bee na, o mafa'da hataholi la, fo lafandendelek basa dede'ak ia la. Manoli-mafa'das nai Manetualain matan, fo ela ala boso lale'a la'eneu dede'ak esa sosoa-ndandaan, te ndia sosoa-ndandaan ta, ma ana tao na, hataholi mana mamanene kala, lapangamak.

¹⁵Ela leo bee na, o sanga enok te'e-te'e, fo Manetualain manaku o da'dileo hataholi fo nandaa da'di Ndia malalau-maoonon. Sanga enok, fo o boso bii-mae o tatao-nono'im ndia, fo ela o nanoli ma, nandaa no nanoli ndoos fo maneme Manetualai na mai a.

¹⁶Madook ao ina ma neme hataholi mana kokolak dede'a-kokola sosoa-ndandaa ta kala, ma kokola nakamumulu-nakamamaek Manetualai na mai. Dede'a-kokola matak leo sila kala, ka'da tao na hataholi a, boetai da'di hataholi mangalauk.

¹⁷Hataholi sila nanoli nala lananama sama leo dioha'i mangalau seisala ka. Fo Himeneus no Filetus lai dalek boe.

¹⁸Lafa'da lae, fofo'a falik neme mamate sa mai a, ana da'di so. Tehu nanolik ia la, sala no nanoli ndo sa, de ana tao nalutu hataholi nggelok namahehele na so.

¹⁹ Tehu batu netes fo Manetualain nafofo'a ka, matea-mahelek, ta hapu hataholi nanggenggengok nala fan. Nanasulak nai batu netes ndia lain nae, “Lamatua ka nalelak Ndia hataholi nala,” boema “Hataholi fo nafa'da nae, Lamatua ka hataholin ndia, soona hataholi ndia, muse ana hahae tao-no'i tatao-nono'i masalak.”

²⁰Nai uma matu ina esa dalek, hapu bua lo'a uma lo mata-mata kala. Ala tao buas sila la nggelok leme lilo fulak do lilo pilas a mai, tehu nggelok soona, ala taos leme ai, do dae a mai. Buas sila la nggelok soona, fai malole de'i fo ala pakes, boema nggelok soona, ala pakes mandoo fai a.

²¹Leondiak boe, hataholi fo ana hahae tao-no'i tatao-nono'i managalau ka, neukose hataholi ndia nanapaluuk nanseli. Nana so'da na malalaok, ma nandaa no ndia malanga na, dale na. Hataholi leondia ka, neukose nananamahelek soaneu ana tao basa tatao-nono'i malole lala'ena.

²²Madook ao ina ma neme, hihii-nanau muli-solu kala mai. Sanga enok fo maso'da tunga Manetualain hihii-nanaun, lilineka mahele neu Manetualain nanoli nala, sue-lai nonoo hataholi ka, boema manuu dale mole-dame. Maso'da tao leondiak, sama-sama moo hataholi fo laloo loke tutulu-fafalik neme Lamatua ka mai, no dale matetu-mandaak.

²³Boso matuik moo hataholi nggoak fo ta lalelak hata esa boen. O bubuluk basa sila la, nini ka'da nale'a-napilik.

²⁴Hataholi fo ana tao-no'i soaneu Lamatua ka, ta nandaa nale'a-napilik fa; muse ana tao mangana'uk neu basa hataholi lala'ena, ma nanoli hataholi no malole, ma boso haelai mamanasa.

²⁵Hataholi ndia, muse nanoli hataholi mana lena-la'ba kala no mangana'uk; fo ela leo bee na, Manetualain fe hataholi sila la, fai loak soaneu ala tuka tei-sale dale leme sala-singo nala mai, fo lalelak nanoli ndo sa.

²⁶No enok ndia, besa ka dale nala fali, fo latapo'i leme hihi'i Nitu fo mana pa'a nalas ala, de nakasetis fo ala tunga hihii-nanau na.