Read Termanu IBRANI 10 Bible Online

IBRANI 10 - Termanu bible

IBRANI 10

¹Agama Yahudi hoholo-lalanen ka'da fe dulak keluha'buk la'eneu dede'a malole manamai kala ta dula ndoos neme dede'ak sila la mai fa. Dede'ak sila la huu-huu na, ta nde hoholo-lalanek sila fa. Nana hoholo-lalanek sila la, ala ta hapu tao lalalao-lalafu hataholi manini tutunu-hohotuk neu Manetualai na fa, leomae tunga teuk hataholi ndia nini tutunu-hohotuk matak esa nakandoo.

²Leo uni ka, hataholi manini fe Manetualain tutunu-hohotuk sila sala-singo nala tete'e ka ala hapu do'o do ampon soona, tao leo bee o ala ta tao sala-singok so'on.

³Tehu see ko na tunga teuk ala fe tutunu-hohotuk sila la, ka'da lini nasanene'dak fe hataholi a sala-singo nala,

⁴nanahu memak sapi daa no bi'ihii mane daa, ala ta hapu loseheni sala-singok fa.

⁵ Hu ndia de, nai lelek fo Kristus mai leo daebafa ka mai a, nafa'da Manetualain nae, “O ta mahiik tutunu-hohotuk ma fee feek fa; nasafali na nae, O sadia basa ao paak ba'eneu Au so.

⁶O ta hii tutunu-hohotu nanatunuk, do tutunu-hohotuk soaneu sala-singo ka hapu do'o do ampon fa.

⁷Soona Au afa'da ae ‘Au nde ia, ou Manetualain! Au mai soaneu Au tao-no'i O hihii-nanaum, sama leo nanasulak basak la'eneu Au, nai Susula Malalaok dale so.’ ”

⁸Naa, makasososa na Kristus nafa'da nae, “O ta mahiik tutunu-hohotuk ma fee feek; O ta hii tutunu-hohotuk nanatunuk ma tutunu-hohotuk soaneu sala-singo kala hapu do'o do ampon fa.” Kristus nafa'da nae leondia, leomae ala fe tutunu-hohotuk sila la, tunga agama Yahudi hoholo-lalanen.

⁹Boema Kristus nafa'da seluk nae, “Au nde ia, ou Manetualain! Au mai soaneu Au tao-no'i O hihii-nanaum.” Hu ndia de Manetualain loseheni tutunu-hohotu palaak lala'ena so, de Ana nggatin ninik Kristus tutunu-hohotun.

¹⁰Yesus Kristus tao-no'i Manetualain hii-nanaun, nde Ana fe aoina na da'dileo tutunu-hohotuk so. Ana tunu-hotu aoina na, ka'da la'iesa mesakana, soaneu losa dodoo na. No enok ndia Ana tao nalalao-nalalafu ita basa-basa tala neme sala-singo ka mai.

¹¹ Imam Yahudi la, lakalala'ok bela-ba'un tunga faik, ma ala fe tutunu-hohotuk matak esa nakandondoo henin. Tehu tutunu-hohotuk sila la ta hapu loseheni hataholi a sala-singok makandondook fa.

¹² Nasafali na nae, Kristus fe ka'da tutunu-hohotuk la'iesa, fo nde aoina na mesa kana, sala-singo ka hapu do'o do ampon, ma tutunu-hohotuk ndia nanapakek soaneu losa dodoo na. Kristus fe basa tutunu-hohotuk ndia, boema neu nangatuuk neu Manetualain boboa kona na, de Ana paleta sama-sama no Manetualain.

¹³Neme ndia mai a, Kristus ka'da nahani nahele losa Manetualain fe musu noon nala lakaluku-lakatele leun.

¹⁴Da'di, no tutunu-hohotuk esa, de Kristus tao natetu-nandaa hataholi fo sala-singo nala nanatao balisik.

¹⁵La'eneu dede'ak ndia de, Manetualain Dula Dale na boeo ana fe sakasii neu ita. Manetualain Dula Dale na nafa'da nae,

¹⁶ Manetualain nafa'da nae, “Ia nde hehelu-balataak fo neukose Au taon no hataholi sila la, nai fai-faik fo manamai ka, ‘Neukose Au pe'da Au hoholo-lalaneng leo dale nala dalek neu, ma Au sula kana neu dudu'a-aafi nala dalek.’ ”

¹⁷ Manetualain boeo nafa'da nae, “Neukose Au ta afandele sala-singo nala, ma tatao-nono'i mangalau nala so'ok.”

¹⁸Da'di sala-singo kala, boema tatao-nono'i mangalauk sila la, ala hapu do'o do ampon so, soona ta paluu fe seluk tutunu-hohotuk, fo daenga ala hapu do'o do ampon so'on.

¹⁹Naa, tolano-tolanoo ngala lemin, neme Yesus mamaten ndia mai, de besak ia ita tapalani masok leo Kama Malalao-malalau ka dalek teu.

²⁰Yesus soi basa eno beuk esa soaneu ita, fo nde enok fo mana fe maso'da ka. Enok ndia tunga tema maloa, fo nde Yesus ao paa na mesa kana.

²¹Ma besak ia, ita tanuu imam matua ina esa nde nataa neu Manetualain Uma na.

²² Hu ndia de mai fo ata deka to Manetualain no dale ndoos, ma namahehelek fo matea-mahelek; no dalek fo nanatao nalalao-nalalafu basak neme dale nameme'da masalak, ma no ao paak fo nanabalisik ninik oe fo neu isi ka.

²³Ela leo bee na, ata ho'u tahele neu namahehenak fo ita manakun, nana Manetualain bisa nananamahelek de neukose tao leo bee o Ana tao natetu hala hehelu na.

²⁴Ma ela leo bee na ita esa taoafik neu esa, fo ela ita hapu esa fe manggatek neu esa soaneu sue-lai nonoo hataholi ka, ma tao-no'i dede'a-dede'a malole.

²⁵Ela leo bee na ita takabubua sama-sama tahele, ma boso pela-bale sama leo hataholi fe'e kala. Lena-lenak ita muse lilineka tatetea-tahehele aok, nanahu ita bubuluk tae ta doo ka so'on te, neukose Lamatua ka ana mai so.

²⁶Nana metema halak fo ndoos maneme Manetualain mai a, nanananduku-nalosa basak neu ita, tehu ta'ko ita ka'da tao sala-singok takandoo soona, ta hapu seluk tutunu-hohotuk soaneu loseheni ita sala-singon fa.

²⁷ Ela ka'da esa mesa-mesak-kana soaneu ita, fo nde tasasale matak to Manetualain naketu-nala'din, ma ha'i nasa-melu na, neukose ana hotuheni basa hataholi fo mana la'ba nana!

²⁸ Hataholi fo ana ta tunga hoholo-lalanek fo Musa fe ka fa soona, neukose nanahuku nisak ta no ampon fa, metema no sakasii dua do telu sakasii na tete'e ka hataholi ndia tao salak.

²⁹ Huhuku na bela na seli, nanaketuk neu hataholi fo ana heheta-aa'i Manetualain Anan na. Hu ka nde hataholi ndia nakadadaek Manetualain hehelu-balataa daa na, fo nde Kristus mamate na, fo mana tao balisin neme sala-singon mai. Ndia boeo nakamumulu-nakamamaek Manetualain Dula Dalen fo mana fe do'o do ampon matua ina nanseli a.

³⁰ Ita bubuluk, see Ndia fo nafa'da nae, “Neukose Au balas! Neukose Au huku!” ma mana mafa'dak nae, “Neukose Manetualain naketu-nala'di hataholi kamahehele nala.”

³¹Bibii namata'u matua ina, metema ana tu'da leo Manetualain Fo Maso'da ka liman dale neu!

³²Mafandele emi ha'da-tataom tao leo beek nai fai maneu ka. Nai lelek ndia, Manetualain sa'a na nasalaa basa neu emi soona, emi ba'u ka doidoso. Tehu tunga-sanga mahele no makakaatimi.

³³Hapu fai na emi nananakamumulu-nakamamaek, ma nanataok no ta malole nai lea matan. Boeo hapu fai na emi doidoso mo sila fo nanatao leondia ka.

³⁴Leondiak boeo emi tunga mame'da dale he'dik soaneu hataholi fo nanahuku ka. Ma nai lelek basa hata fo emi manuu kala nanaloso nak, emi sipok ndia no dale namahokok nana emi bubuluk mae emi bei manuu hata esa fo malole na lena, fo neukose nakatatakak losa dodoo na.

³⁵Hu ka nde ndia, de boso ketu namahehena ma, nana metema emi mamahele mahele, soona hapu ngga'di matua ina soaneu ndia!

³⁶Paluu emi boso haelai mamanasa, fo ela emi hapu tao-no'i Manetualain hihii-nanaun, ma no enok ndia, emi sipo hata fo Ana helu ka.

³⁷ Nanahu nai Susula Malalaok dale nanasulak nae, “Ka'da ba'ihanak seluk mesa kana, soona Ndia fo neukose mana maik ndia, neukose no lai-laik ana mai. Neukose, Ana ta nakamama'ak mamai na fa;

³⁸Ma Au hataholi kamaheheleng fo ndo sa, neukose namahele ma naso'da; tehu metema hapu nai sila tala'da ala fali deak, soona neukose Au ta sue fan.”

³⁹Ita ia, ta nde hataholi kamahehelek fo mana fali deak, ma mana la'ok sala enok fa. Nasafali na ita nde bee na, hataholi kamahehelek fo tamahele neu Manetualain, ma nanasoi-tefak.