Read Termanu IBRANI 12 Bible Online

IBRANI 12 - Termanu bible

IBRANI 12

¹Naa, la'eneu ita mesa tala soona, nai ita boboa-kaisun hapu sakasii makadotok nanseli! Hu ndia de, mai fo ata tu'u-tapaheni basa hata fo ana tao nambela ita, ma basa sala-singok fo lakadita lahele ita. Ma mai fo no te'e-te'ek teu tunga nakasusu'di ka nde ita mata na.

²Ela leo bee na ita mata memete na nasale leo Yesus neu, nana Ndia nde nafofo'a ita namahehele na, ma nakaboboin neme makasososa na losa mete'e na. Yesus nakatatakak doidoso ka neme ai nggangek lain! Ana ta nafaduli nae, mate nai ai nggangek lain ndia nde bee na, hata esa fo nini mamaek. Ka'da nafandele neu namahokok fo neukose name'da nitan nai fai makabuin. Besak ia, nangatuuk nai Manetualain kandela mane na boboa kona na, ma Ana paleta sama-sama non.

³So'ba dodoo su'dik, Yesus doidoso na leo beek nai lelek nasasale matak no hataholi masala-masingok fo ala la'ba no lakakaa timi! Hu ndia de dale mala boso ba'ihana, ma boso ketu namahehena mala.

⁴Nana, nai ulepo'de soaneu la'ban sala-singo ka, emi beita la'iesa fo ulepo'de losa emi daa ma muse titihenin fa.

⁵ Ma boso mafandele heni Manetualain nanoli-nafa'dan ia, fo nanafek neu emi da'dileo Ndia ana nala Nae leo'na: “Au ana ngonei, taoafik matalolole Lamatua ka nanoli nala, ma dale ma boso ba'ihana, metema Ana namanasa emi.

⁶Nana Lamatua ka nanoli basa hataholi fo Ana sue-lain, ma Ana filuk basa hataholi fo nakahei kana da'dileo Ndia Anan.”

⁷Ela leo bee na, emi sipok Manetualain fefepan ndia, da'dileo nanolik esa neme amak esa mai. Nana ade anak esa, aman beita huku nita fan do?

⁸Metema emi ta nanahukuk sama leo basa ana fe'en ia la fa soona, sosoa na nae, emi ta moli-da'di neme Ndia mai fa.

⁹Ita tanuu amak nai daebafa ka. Ana nanoli ita, ma ita fe ha'da-holomata neun. Naa, muda hata no ita Ama samanen manai nusa so'da ka bai, tao leo bee o ita muse takatele neun, fo ela ita taso'da.

¹⁰Ita ina aman fo manai daebafa ka, lanoli ita ka'da nai faik fo nanuu too-lane. Tehu Manetualain nanoli ita soaneu ita malole na, fo ela ita da'di malalaok sama-sama ton.

¹¹Memak nai lelek fo ita nanananoli ka, huhukuk ndia ta nandaa no ita dale na fa, tehu nini ka'da dale he'dik mesa kana. Tehu basa ndia soona, ba'eneu ita fo nanananoli basa ka, huhukuk ndia tao na ita taso'da tunga Manetualain hihii-nanaun, ma nini buna-boa so'da-molek neu ita.

¹² Hu ndia de, tao balakai emi limam mana ndole-ndaku mala, ma emi lungulanga mana delem ndia!

¹³ La'ok tataas esa leona neu eno matetu ka, fo ela emi ei helam ndia boso kosik, te lena-lenak ana lea-hai.

¹⁴Sanga enok soaneu maso'da mole-dame mo basa hataholi lala'ena. Sanga enok boe, soaneu maso'da no malalao-malalafuk, ka'da soaneu Lamatua ka. Nana ta hapu hataholi esa boen, fo hapu nita Lamatua ka, metema ana ta naso'da sama leondiak fa.

¹⁵ Manea leona, fo boso nalosak hapu hataholi esa boen, ana kalua neme Manetualain dale malole na mai, fo ela boso hapu nggelok da'di sama leo bubu'u-palusa malasok nai emi tala'da heom, nalosa nini toto'a-tatak ma ana tao nalutu hataholi ba'u ninik ndia laso na.

¹⁶ Manea leona, fo ela boso hapu nggelok laso'da sosoa-piao, do ala ta so'ulaik dede'a samane kala, sama leo hata fo Esau tao-no'i ka. Ana nase'oheni ndia ha ka da'dileo ana uluk ka'da soaneu nana'ak mango esa.

¹⁷ Emi bubuluk mae makabui na, Esau nahiik hapu baba'e-papalak ndia neme aman mai, tehu ana tipahenin. Nana leomae no kikii-makaleleuk, ana sanga enok, soaneu ana taonahi sala na, tehu failoak soaneu dede'ak ndia, ta hapun so'ok.

¹⁸ Tolano-tolanoo kala ta masasale matak mo hata esa, sama leo leoina Israe la makahulu na lasasale matak lo nana. Ala lasasale matak lo hata esa, fo bisa nafaloen, fo nde Lete Sinai no ha'i mana pila lo'a-lo'a na; ala lasasale matak lo makahatu ka, makahatu nggeoina ma ani sangu a;

¹⁹ala lasasale matak lo pupuu lii kala, ma hala liik matua ina la. Lelek hataholi Israe lala lamanene halak ndia, boema ala loke lanseli, fo ela halak ndia boso kokolak seluk no sila bai.

²⁰ Nana ta lakataka lamanene paleta fo halak ndia nanduku-nalosa kana fa. Nana halak ndia nae, “Basa hataholi fo mana koila'e letek ia, ta afaduli, ade bana-manu ndia, do see ndia boe, muse pian ninik batu losa maten.”

²¹ Hata fo hataholi Israe lala litak ndia mangalau nanseli, losa Musa nae, “Au bii-amata'u ma au dele ngge'be-ngge'be!”

²²Nasafali na, emi mai leo Pupuku Sio na mai, ma Manetualain kotan fo maso'da ka, fo nde Yerusalem manai nusa so'da ka no ata nusa so'da lifu-lifu nala.

²³Emi tunga natotongok esa, fo henuk no hika-setelee ka, fo nde natotongo Manetualain ana ulu nala, fo na'de nala nanasulak nai nusa so'da ka dalek. Emi mai masasale matak mo Manetualain, fo mana Maketu-Mala'di basa hataholi daebafa ka lala'ena. Emi masasale matak mo hataholi kamahehele kala dula dale nala, fo ala da'di matetu-mandaak so.

²⁴ Emi mai masasale matak mo Yesus, fo Lelete soaneu hehelu-balataa beuk ndia. Emi masasale matak mo daa nanapisi ka, fo malole na lenaheni Habel daa na.

²⁵ Hu ndia de, masanene'dak fo boso nalosak emi ta nau mamanene Ndia fo mana kokolak neu emi a. Sila fo ta nau lamanene Ndia fo mana maik leo daebafa ka mai, ma nanduku-nalosak halak maneme Manetualai na mai, ana ta bisa nalai fa. Mu'da hata no ita ia fo mana mamanene Ndia fo mana kokolak neme nusa so'da ka mai a. Metema ita ta nau tamanene fan soona, hapu nai bee ita bisa taladeak!

²⁶ Nai lelek ndia, hala na tao nanggengek daebafa ka. Tehu besak ia Ana helu nae, “La'iesa seluk soona, neukose Au tao anggenge kana, ta ka'da daebafa ka mesa kana fa, tehu lalai a boe.”

²⁷Dede'a ka nae, “la'iesa seluk” natu'du nae, neukose basa daebafak fo nakadada'di kana, neukose Ana fae nanggenggengo kana ma Ana kekoheo kana, fo daenga ela ka'da hata manggengo ta kala.

²⁸Hu ndia de ela leo bee na, ita toke makasi neu Manetualain, nanahu Ana fe ita nusak esa ta nanggengo fa. Ela leo bee na, ita toke makasi ma sene-do'ok neu Manetualain no ha'da-holomata ma bibii-namata'uk, tunga enok fo mesa kana nahii kana.

²⁹ Nana ita Manetualain ndia, sama leo ha'i fo manahotu naputu ka.