Read Termanu IBRANI 2 Bible Online

IBRANI 2 - Termanu bible

IBRANI 2

¹Hu ndia de, ita muse ho'u tahele nanolik fo ita tamanene basa kala, fo ela ita boso la'oela ita namahehele na.

²Ata nusa so'da kala lafa'da ita bei-ba'i kai nala hala hehelu ka, memak tete'e ka la'en, ma hataholi fo ana ta tunga do nakalala'o kana fa soona, neukose ana sipo huhukuk nandaa no tatao-nono'in.

³Muda hata no so'dak-molek matua ina, fo nanananduku-nalosak tunga hala heheluk ndia bai! Metema ita ta taoafik neu so'da-molek ndia fa soona, tao leo bee o, neukose ita ta tatapo'i teme huhukuk ndia mai fa. Nanahu Lamatua ka mesa kana nde makasososa po'a-benga so'da-molek ndia, ma hataholi fo lamanene makasososa nana, ala fe basa buti ndo na neu ita so.

⁴Fe'ek neme ndia mai, Manetualain boetai tao natetea-nahehele hataholi sila tutui-bebengan, ninik Ana tao manda'di beu matak-mata kala, ma dede'a matua ina la, boema Ana baba'e fee-feek maneme Dula Dale ka, tunga hihii-nanau mesa na.

⁵Ata nusa so'da kala ta hapu koasa neme Manetualain soaneu ala paleta daebafa beuk fo neukose ana mai, fo nde daebafak fo besa ka ita kokola kana ia.

⁶ Nasafali na, nanasulak nai Susula Malalao ka baba'en esa dalek nae leo ia, “Hataholi daebafa ka, beek ndia, ou Manetualain, nalosa O nau mafandelen! Hataholi daebafa ka ka'da hataholi daebafak mesan, tehu O taoafik neun!

⁷Soaneu fai keke'uanak esa mesa kana, O makadada'di kana nai ata nusa so'da ka dae faa anak. O fen nangatutuu mandela-masa'ak, ma maha'da-holomatak,

⁸boema O makadadada'di kana da'di mana koasa neu basa hata lala'ena.” Naa, metema nananafa'dak nae Manetualain nakadada'dik hataholi daebafa ka, “da'di mana koasa neu basa hata lala'ena soona”, ndia sosoa na nae ta hapu hata esa boen ta nai hataholi daebafa ka koasan dae fa. Leomae leondiak boe, besak ia ita ta tita hataholi daebafa ka koasa basa hata lala'ena fa.

⁹Tehu ita tita basa Yesus koasa so! Ndia nananakadada'dik nai ata nusa so'da kala dae faa anak, soaneu fai keke'u anak esa mesa kana, fo ela no Manetualain dale malole na, fo Ana hapu mate soaneu basa hataholi daebafa ka lala'ena. Besak ia, ita tita Manetualain fen nangatutuu mandela-masa'ak, ma nanafe ha'da-holomata, nanahu Ana doidoso basa losa maten.

¹⁰Memak nandaa Manetualain fo mana makadada'dik basa hata lala'ena soaneu dale dudu'a na mesa kana, Ana tao Yesus manasoi-tefa fo matetu-mandaak, tunga doi-doson. No enok ndia, fo Manetualain nalo hataholi ba'u ka, soaneu ala tunga nananamatutua-namadedemak sama-sama lo Yesus. Nanahu Ndia nde manasoi enok ba'eneu sila soaneu bisa nanasoi-tefak.

¹¹Yesus safe balisi hataholi daebafa ka leme sala-singo nala mai; ma Ndia nde tao balisi, boema sila fo nanatao balisak ndia, sama-sama lanuu Amak esa. Hu ndia de, Yesus ta mae manaku hataholi sila, da'dileo tolanoo nala fa.

¹² Yesus nafa'da Manetualain nae, “Neukose Au tui-benga neu Au tolanoo ngala, la'eneu O. Neukose Au koa-kio O nai sila natotongo na dalek.”

¹³ Yesus boeo nafa'da nae, “Neukose Au tao Au namahehena nga neu Manetualain.” Ma nafa'da boe nae, “Au nde ia, sama-sama o ni'iana-ni'iana fo O fe basan neu Au a so.”

¹⁴Hu ndia de, basa hataholi fo noken nae anak ndia, nde bee na mahahae hataholi daebafak fo hapu maten, soona Yesus mesa kana sama hataholi sila, ma leo naso'da nai ha'da-tatao hataholi daebafa ka dalek. Ana tao leondiak, fo ela no mamate na, Ana hapu tao nakalulutuk Nitu fo mana koasa mamate sa.

¹⁵No enok ndia, fo Ana soi-po'i hataholi fo ana taon da'di ata nai maso'da na dalek, nanahu ala bii neu mamate sa.

¹⁶Dede'a mangale'do na, nae Ana ta tulu-fali ata nusa so'da kala fa, tehu Abraham tititi-nonosi nala.

¹⁷Ia sosoa na, nae Ana muse da'di sama no tolanoo nala nai basa dede'ak lala'ena dalek. Ma no enok ndia, Ana hapu da'di Imam matua ina fo mana lilinekak ma madale susue-lalaik. No lau-onon ndia, de hataholi daebafa ka sala-singo nala, hapu do'o do ampon.

¹⁸Ma hu ka nde mesa kana doidoso hai, ma nanaso'ba-su'dik, de Ana hapu tulu-fali hataholi fo mana la'e soso'ba-susu'di ka, nana Ndia boeo nanaso'ba-su'dik haik ma mana doidosok.