Read Termanu IBRANI 4 Bible Online

IBRANI 4 - Termanu bible

IBRANI 4

¹Naa, Manetualain hala-hehelu na bei paken, de neukose ita nanafe mamana hahae aok fo Ana helu ka. Da'di ela leo bee na ita tanea, fo ela boso hapu hataholi esa boen nai emi dalek, ana ta hapu masok leo mamana hahae aok fo nanahelu basak ndia dalek neu fa.

²Nanahu Hala Malole ndia nanatui-benga basak neu ita, sama na leo neu sila boe. Tehu halak ndia sosoa-ndandaan ta ba'eneu sila. Nana, lelek lamanene halak ndia, ala ta nau lamahele fa.

³ Tehu ita fo tamahele, neukose masok leo mamana hahae aok fo Manetualain heluk ndia. Ita hapu mamana hahae aok fo Manetualain helun ndia. Dede'ak ndia, nandaa no Manetualain hala nafa'da na, nae leo ia, “Au amanasa, ma Au soo-supa, ‘Neukose ala ta masok leo mamana hahae ao ka, sama-sama lo Au fa.’ ” Manetualain kokolak nae leondia, leomae tatao-nono'in basan ndek Ana nakadada'dik daebafak ia so.

⁴ Nana la'eneu fai kahitu a, hapun nanasulak nai Susula Malalaok dale nae leo ia, “Nai fai kahitu a, Manetualain hahae ao na neme basa tatao-nono'in lala'ena mai.”

⁵ La'eneu dede'ak ndia, nanasulak seluk nae leo ia, “Neukose ala ta masok leo nusak ndia dalek leu, soaneu ala hahae ao nala sama-sama lo Au fa.”

⁶Da'di sila nde lamanene makasososa halak la'eneu Hala Malole ndia, neukose ta masok leo mamana hahae aok ndia fa, nana ala ta lamahele fa. Metema leondiak soona, dede'a na mangale'dok so, nae hapu hataholi fe'e kala nde bole masok mamana hahae aok ndia.

⁷ Nanahu Manetualain nafa'da basa fai hehelik esa, fo nanaseseik lae, “Faik Ia”. Teu-teu maneu kala, Manetualain kokolak la'eneu dede'ak ndia, tunga Dauk, nai na'ka sa ala kokolak lalane ka dalek, nae leo ia, “Metema nai faik ia, emi mamanene Manetualain hala na soona, emi boso malanga batu.”

⁸ Metema leo uni ka Yosua fe basa hataholi sila la mamana hahae aok, fo Manetualain helu ka, soona neukose Manetualain ta kokolak seluk la'eneu fai fe'ek esa seluk so'on.

⁹Da'di ba'eneu Manetualain hataholi kamahehele nala soona, bei hapu hala-heheluk soaneu ala hahae ao nala, sama leo Manetualain hahae ao na, nai faik kahitu ndia.

¹⁰ Nanahu hataholi fo ana masok leo mamana hahae aok, fo Manetualain helu neun ndia soona, neukose ana hahae ao na, neme basa tatao-nono'in lala'ena mai, sama na leo Manetualain boe.

¹¹Hu ndia de, mai leona, fo ata sanga enok te'e-te'e, soaneu ita masok leo mamana hahae aok fo Manetualain heluk ndia. Boso nalosak hataholi esa boen neme ita mai a, ana ta da'di masok leo mamana hahae aok ndia, sama leo sila fo makahulu na, nana ta lamahele neu Manetualain fa.

¹²Manetualain hala-kokolan nde bee na, hala-kokolak fo maso'dak, ma mabe'i-balakaik; tane na lenaheni tafaina tane kadua ka. Hala kokolak ndia, ana tola losa leo samane ka ma dula dale ka dae too na; ana tola losa leo bu'u-bu'u kala, ma dodole dui ka dae too na, nalosa ana bubuluk besa-besa no hataholi daebafa ka dale-aafin, ma dale tutu'u na.

¹³Ta hapu mahahaek esa boen, fo nanafunik neme Manetualain mata memete na mai fa. Basan lala'ena makaholak ma nanabukak nai mata na. Hu ndia de, ita muse fe natataak neun.

¹⁴Hu ndia de, ita muse ho'u tahehele neu ita manaku namahele ka. Nanahu ita tanuu Imam Matua ina esa, ba'u na seli, fo Ana masok basa losa leo Manetualain mata na neu so. Ndia nde Yesus, fo Manetualain Ana na.

¹⁵Ita Imam Matua inan ndia, ta nde imam fo ta hapu name'da nita ita tapandoe nala fa. Nasafali na, nanaso'ba-su'di basak, nai basa dede'ak lala'ena dalek, sama leo ita boe, ka'da Ana ta tao sala-singok fa!

¹⁶Hu ndia de mai leona, fo no tene henuk, ata teu tataa Manetualain, fo Ana paleta no dale malole ndia. Neukose Manetualain sue-lai ita, ma Ana ba'e-pala ita, fo ela ita hapu tutulu-fafalik nandaa neu fai na.