Read Termanu YAKOBIS 2 Bible Online

YAKOBIS 2 - Termanu bible

YAKOBIS 2

¹Tolano-tolanoo ngala lemin! Da'dileo hataholi fo namahele Lamatuak Yesus Kristus, Lamatuak fo Mandela masa'ak ndia, emi boso bibinga-baba'e hataholi a, tunga ao paa ka.

²Nana metema hataholi kamasu'ik esa ana pake ndeli lilo pilas ma bua-lo'a neulauk, ana mai leo emi nakabuam esa, boema hataholi nuu tak esa, ana pake si'da sae, ala mai leo emi nakabuam ndia mai boe,

³soona, emi fe makahuluk ha'da-holomata neu hataholi mana pake bua-lo'a neu lauk ndia mae, “Tuan, mangatuuk muu kandela neulauk ia lain.” Tehu emi mafa'da hataholi nuu tak ndia mae, “Mapadeik muu eli, do mangatuuk muu dae lain.”

⁴No emi tatao-nono'im leondia ka, emi bibinga-baba'e emi nonoo hataholi ma, boema emi mete hataholi a, tunga emi dudu'a-aafi mangalau ma.

⁵Mafandendelek tolano-tolanoo susue-lalai ngala lemein! Manetualain hele basa hataholi nuu taa-hata tak manai daebafak ia la, ala da'di hataholi kamasu'ik nai namahehele ka dalek. Neukose hataholi sila la, nde da'di Manetualain hataholi kamahehelen, sama leo Manetualain helu basan neu hataholi mana sue-lai nana.

⁶Tehu emi sosona, makamumulu-makamamaek hataholi nuu taa kala, te see ko na hataholi kamasu'i kala ala tuni-ndeni emi, ma ala lele'a-loloso emi leo mana maketu-mala'di ka meu!

⁷Sila nde lakamumulu-lakamamaek emi na'de malolem fo, Manetualain fen neu emi a!

⁸ Emi tao-no'i tatao-nono'im malole, metema emi tao tunga hoholo-lalanek fo nanasulak nai Susula Malalaok dale nae leo ia, “Sue-lai o nonoo hataholi ma, sama na leo o sue-lai ao ina ma.”

⁹Tehu metema emi bibinga-baba'e hataholi a tunga ao paa ka soona, emi tao sala-singok ndia so, de Manetualain hoholo-lalanen naketu nae, emi nde bee na, hataholi mana la'o lena hoholo-lalanek.

¹⁰Metema hataholi a la'o lena Manetualain hoholo-lalanen esa soona, ana la'o lena la'i esak hoholo-lalanek sila lala'ena.

¹¹ Nana ndia fo mana mafa'dak nae, “Boso hohonge,” ndia boeo nde nafa'da nae, “Boso manisa.” Da'di metema emi ta hohonge fa, tehu emi manisa soona, emi hataholi mana la'o lena hoholo-lalanek boe.

¹²Kokolak ma tao-no'i sama leo hataholi fo, neukose nananaketu-nala'dik tunga Manetualain hoholo-lalanen fo mana soi-po'i hataholi daebafa ka.

¹³Nana neukose Manetualain ta natu'du susue-lalain neu hataholi fo, ta nalelak susue-lalai ka fa. Tehu susue-lalai ka, neulau na ba'u lena hoholo-lalane ka.

¹⁴Tolano-tolanoo ngala lemin! Sosoak hata, hataholi a kokolak nae, “Au hataholi kamahehelek”, tehu ta natu'dun nai tatao-nono'in dalek fa? Ade no namahehele matak leondia ka, hataholi ndia hapu so'dak do?

¹⁵Leo uni ka touk esa do inak esa, paluu bua papakek do nana'a-nininuk.

¹⁶Sosoak hata emi mafa'dan mae, “Pake jeket ma mu'a-minu fo mu'u ma leona!” — tehu emi ta fen hata fo ana paluun nai so'da na dalek fa?

¹⁷Leondiak boe namahehele ka. Metema namahehelek ndia, ta natu'dun nai tatao-nono'in dalek fa soona, namahehelek ndia sosoa-ndandaan ta.

¹⁸Fafakama nggelok lafa'da lae, “Hapu hataholi nggelok lamahena neu namahehele na, ma nggelok lamahena neu tatao-nono'in”. Soona, neukose au ataa ae, “Matu'du au, tao leo bee fo hataholi a nanuu namahelek, tehu tatao-nono'in fe'ek, boema au atu'dun nai au tatao-nono'ing dalek ae, au anuu namahehelek.”

¹⁹Emi mamahele Manetualain ka'da esa hetu? Na, dula dale mangalau kala lamahele dede'ak ndia boe, de ala dele bengge'be lo bibii ka!

²⁰Emi nggoa ma seli! Ade paluu natu'du fe emi buti, la'eneu namahehele ka ta no tatao-nono'i ka fa soona, sosoa-ndandaan ta do?

²¹ Mete ka'da ita ba'ikain, “Abraham Manetualain sipo kana no malole, nana tatao-nono'in ndek: lelek fo, ana tunu-hotu anan Isak nai mei tutunu-hohotuk lain neu Manetualain.”

²²Ita titan no mangale'dok, nai dede'ak ia dalek nae, namahehele ka muse no tatao-nono'i ka soona, besa ka natetu-nandaa.

²³ Dede'ak ndia nandaa no Susula Malalao ka lalanen esa nde ia nae, “Abraham namahele Manetualain, ma hu ka nde namahehelen ndia de, Manetualain sipo kana, da'dileo hataholi mana tao tunga Manetualain hihii-nanaun.” Hu ndia de loke Abraham lae, “Manetualain tia-lain.”

²⁴Besak ia, dede'a ka mangale'dok nae; Manetualain sipok hataholi a no malole, nana hataholi ndia tatao-nono'in boe, te ta ka'da namahehele na mesa kana fa.

²⁵ Boema mete mitak Rahab fo ina mana sosoa-piaok ndia. Manetualain sipo kana no malole, nana tatao-nono'in ndek lelek fo, nafuni hataholi Israe la mata-mata nala neme uman dale, boema ana tulu-falis, de ana fes lalai fali tunga eno fe'ek.

²⁶Sama na leo ao paa ka. Metema ao paa ka, samanen ta soona, ao paak ndia maten. Leondiak boe, metema namahehele ka ta no tatao-nono'i ka fa soona, namahehelek ndia maten.