Read Termanu 1 YOHANIS 3 Bible Online

1 YOHANIS 3 - Termanu bible

1 YOHANIS 3

¹ Mete mitak Manetualain sue-lai na ita ba'u na seli de, nalosak ita nanaseseik lae, Manetualai nana nala. Ma memak ita nde bee na, Manetualai nana nala. Hu ndia de daebafa mangalauk ia, ana ta nau nalelak ita fa nana, ta nalelak Manetualain fa.

²Tolano susue-lalai ngala lemin! Besak ia, Manetualai nanan ita so, tehu ita heo-hilun beita nandaa fa. Tehu ita bubuluk basan, metema Kristus mai soona, neukose ita da'di sama leo Kristus, nana ita titan nai heo-hilu isi-isi na dalek.

³Hataholi fo ana tao namahehena na neu ka'da Kristu sa, muse nanea ao ina na fo ela te'e-te'e malalaok ma balisi neme sala-singo ka mai, sama leo Kristus boeo malalaok.

⁴Hataholi mana tao sala-singo ka, ana la'o lena Manetualain hoholo-lalanen; nana sala-singo ka nde been-na, la'o lenak esa soaneu Manetualain hoholo-lalanen.

⁵ Emi bubuluk basan, Kristus mai soaneu Ana koka heni hataholi daebafa ka sala-singon, boema emi bubuluk boeo, Kristus sala-singon ta.

⁶Basa hataholi fo laso'da lo Kristu sa, ala ta bole tao sala-singok lakandondoo henin fa. Nana hataholi mana tao sala-singo lakandondoo heni kala, beita lita do lalelak Kristus fa.

⁷Ana ngala lemin! Emi boso nau su'di see a, hela namopo emi. Nana metema see tunga Manetualain hihii-nanaun soona, Manetualai nanan hataholi ndia, sama na leo Kristus boeo, Manetualain Anan.

⁸Tehu hataholi mana tao sala-singok nakandondoo heni na, Nitu anan hataholi ndia, nana Nitu a tao sala-singok neme makasososan eli mai so. Hu ndia de Manetualain Ana na mai fo daenga Ana tao nakalulutuk Nitu a tatao-nono'i mangalaun sila la.

⁹Metema Manetualai nanan see soona, hataholi ndia ta bole tao sala-singok nakandondoo henin fa, nana Manetualain ha'da-tataon nai hataholi ndia dalen dale. Boema hu ka nde hataholi ndia aman nde Manetualain, de ana boso boe tao sala-singok nakandondoo henin bai.

¹⁰Manetualai nana nala ma Nitu ana nala ta'du tanan leo iak: see ta tunga Manetualain hihii-nanaun do ana ta sue-lai tolano na fa soona, Manetualai nanan ta ndia fa.

¹¹ Neme makasososan mai a, lafa'da basa halak ndia neu emi nae: Ita muse tasue-talai ao.

¹² Ita boso sama leo Kaen fo ana da'di Nitu a anan de, ana taonisa tolano na. Hu beek de Kaen taonisa tolano na? Hu ka nde ana tao ka'da tatao-nono'i masala kala, tehu tolano na soona, ana tao ka'da tatao-nono'i ndo sa.

¹³Hu ndia, tolano ngala lemin! Metema hataholi daebafa ka nakamuu-nakadau emi soona, emi boso nggenge.

¹⁴ Ita bubuluk basan, ita kalua teme mamates dale mai de ita lali leo maso'dak dale teu so. Ita bubuluk dede'ak ndia, nana ita sue-lai ita tolano nala. Metema see dale susue-lalain ta soona, hataholi ndia bei nai mamate sa koasan dale.

¹⁵Boema metema see bei nakamuu-nakadau tolano nala soona, hataholi ndia, hataholi kanisak, de emi bubuluk basan, hataholi kanisa ka, ana ta hapu so'da matetu ka ma mana ketu basa ta ka fa.

¹⁶No enok ndia de, besak ia ita bubuluk eno nasue-nalai ao ka nde: Kristus fe heni so'da na soaneu ita. Hu ndia de, ita muse fe heni ita so'da na soaneu ita tolano nala boe.

¹⁷Metema hataholi manahapu-manadaik esa nita tolano na toto'a-tataan, tehu ana ta taoafik neu tolanon ndia fa soona, tao leo bee de hataholi ndia nafa'da nae, ndia sue-lai Manetualain?

¹⁸Ana ngala lemin! Ita boso sue-lai hataholi, ninik ka'da ita bafa lou na, do ninik ka'da hala-kokolak mesa kana. Te ela leo been-na, ita sue-lai tinik susue-lalai matetu ka, fo ita tatu'dun nai ita tatao-nono'in dalek.

¹⁹No enok ndia, besa ka ita bubuluk, Manetualai nana ndoon ita, de ita dale na tesa-tama nai Manetualain matan.

²⁰Metema ita tame'da nana, hata fo ita taon ndia salan soona, mafandendelek te Manetualain malela na ba'u lena ita malela na, hu ka nde Ndia nde bubuluk basa hata lala'ena.

²¹Lena-lenak tolano ngala lemin! Metema ita tame'da nana ita sala-singon ta soona, ita tapalani tasasale matak to Manetualain.

²²Boema ita token beek soona ita hapun, nana ita tunga paleta na ma ita tatao-nono'in nandaa no dale na.

²³ Ana paleta ita tao dede'a ka nde ia: Ita muse tamahele Anan, fo Yesus Kristus, ma ita muse tasue-talai ao sama na leo Kristus paleta basan neu ita so.

²⁴Basa hataholi mana tao tunga Manetualain paleta nala, laso'da lo Manetualain ma Manetualain naso'da nos. Ita bubuluk Manetualain naso'da no ita, nana Ana fe Dula Dale na neu ita so.