Read Termanu HAKIM-HAKIM 14 Bible Online

HAKIM-HAKIM 14 - Termanu bible

HAKIM-HAKIM 14

¹Faik esa boema, Simson neu leo Timna neu, de nita anafe'oana Filistin esa nai naa.

²Boema, ana fali ma'in, de nafa'da ina-aman nae, “Au daleng-nga tu'da neu anafe'oana Filistin esa nai Timna. Au dokodoe neu ama no ina, fo meu a'du fen leo au mai.”

³Tehu ina-aman lae, “Tao le'e de, muse teu leo hataholi Filistin-na teu, ka'da soaneu hapu saoinak, te se'kona, MANETUALAIN anan ta sila fa? Ade, ta hapu anafe'oanak fo nandaa, nai ita leo-ingu, do nai basa ita leoinan-na lala'en-na dalek fa do?” Boema Simson nataa aman nae, “Tehu, au hiik-kande, anafe'oana Filistin ndia dei. De au amahena, ama nau neu a'du fen leo au mai.”

⁴Simson ina-aman ta bubuluk, lae MANETUALAIN nde tao-na Simson tao dede'ak ndia fa. Nana MANETUALAIN bei sanga fai loak, fo nata'ti no hataholi Filistin-nala. Nai lelek ndia, hataholi Filistin-nala koasa hataholi Israel-la.

⁵Boema, Simson no ina-aman leu sama-sama leo Timna leu. Lelek ala la'ok la'di osi angol esa boema, Simson natongo no singa molisoluk esa. Singa ndia nangao,

⁶boema no kaiboboianak, Simson da'di hataholi mabe'i-balakaik neme MANETUALAIN koasan-na mai. Boema ana sii-sii lulu'i singa ndia nenik liman-na, nono'kabai, bana ndia, ka'da sama leo bi'ihiik esa mesan. Ta nafa'da dede'ak ndia, neu ina-aman fa.

⁷Basa boema, Simson neu donge-dama anafe'oanak ndia, de kola-kola non, boema Simson hiin.

⁸Basa faik de'ubee dalen-na, boema Simson neu seluk, fo ana ka'bing no anafe'oanak ndia. Nai leleo-lala'on-na dalek, ana heo neu mete singa fo ana taonisak ndia, popolan-na. Lelek ana losa mamanak ndia boema, nita fani makadotok nanseli, nai singa ndia popolan dale, ma hapu fanioe boe.

⁹Ana la'u-na fanioe ndia, neu liman dale, boema ana la'ok nakandoo, ma ninu fanioe ndia. Basa boema, neu leo ina-aman neu, de ana fes fanioe ndia seli boe, de linu. Tehu Simson ta nafa'da, nae ana ho'i fanioe ndia neme singa popolan dale mai fa.

¹⁰Lelek, Simson aman neu leo anafe'oanak ndia uman neu te, Simson tao feta nai naa, nanahu hataholi muli-soluk-kala, biasan-na leondiak.

¹¹Lelek, hataholi Filistin-nala litan boema, ala hele-la, ta'eanak 30, fo leu tao tia-laik lon.

¹²Boema, Simson nafa'das nae, “Au neneung esa nai ia. Metema, emi hapu neuk-malan soona, neukose au fe emi esan-na, ba'du tema abalutu biak esa, ma bua-lo'as manahiik, pasan esa. Nai lelek feta ka'bing ia beita basa fan, au fe emi loak faik hitu dalen-na dodoo, fo neuk-kana.

¹³Tehu, metema emi ta hapu neuk-mala fan soona, emi nde, esan-na muse fe au tema abalutu biak esa, ma bua-lo'as manahiik, pasan esa.” Boema hataholi Filistin sila-la lae, “Bole! Besak ia, mafa'da neneuk ndia leona.”

¹⁴Boema, Simson nafa'da nae, “Neme hata fo nana'ak, kalua hata fo na'an; neme hata fo mabe'i-balakai, kalua hata fo makeek.” Basa faik telu so, te ala beita hapu neuk-la, neneuk ndia boen.

¹⁵Da'di, neu fai ka haan-na boema, lafa'da Simson saoinan-na lae, “O muse kokoe o saom-ma, fo ela ana nau nafa'da ami, neneuk ndia sosoa-ndandaan. Metema ta soona, neukose ami hotu heni o, ma o amam uma isin-nala. Fafa'kama, o ka'i ami leo o fetam-ma mai, fo ami makababasak ami hata-hetom!”

¹⁶Hu ndia de, Simson saoinan-na neu leo Simson neu, boema ana kii ma nae, “Au bubuluk, o ta sue-lai au fa. Tao le'e de, o fe au tia-laing-ngala neuk nene'uk ndia, tehu o ta mafa'da sosoa-ndandaan neu au fa? Tao leo bee-o, o ta mahiik au fa!” Boema Simson nae, “Mahani dei! Te au ta afa'dan neu au ina-amang boen, tao le'e de, au muse nafa'dan neu o?”

¹⁷Simson saoinan-na, ana kii nakandoo nai feta ndia, faik hitu dalen-na. De hu kande, ana nggenggele nakandoo, de neu fai ka hitun-na boema, Simson nafa'dan, neneuk ndia sosoa-ndandaan. Boema, Simson saoinan ndia, nafa'dan neu hataholi Filistin-nala.

¹⁸Da'di, neu fai ka hitun-na, le'do beita tenak fa te, hataholi manai kota ndia, lafa'da Simson lae, “Beek kande, makeen-na lena heni fanioe-a? Ma boeo, beek kande, balakain-na lena heni singa?” Simson nataa nae, “Metema, au saoinang-nga, ta nafa'da emi fa soona, neukose emi ta hapu neuk-ma, neneuk ndia fa!”

¹⁹No kaiboik, Simson da'di mabe'i-balakaik, hu kande MANETUALAIN koasan-na, boema neu leo Askelon neu. Nai naa, ana taonisa touk manapake bua-lo'as manahiik 30. Ana ho'i-na hataholi sila bua-lo'an-nala, de ana fen leo hataholi ka teluhulu fo mananeuk neneun-na. Basa ndia boema, ana fali ne'un leo uman neu, no nasasale dale.

²⁰Boema Simson aliaman-na, fe Simson saoinan ndia, leo hataholi manatunga Simson, nai lelek ana ka'bing-nga.