Read Termanu HAKIM-HAKIM 19 Bible Online

HAKIM-HAKIM 19 - Termanu bible

HAKIM-HAKIM 19

¹Nai lelek hataholi Israel-la manen beita, hapu hataholi Lewi esa, ana leo nai nggolo leten-na nai letelepak Efraim-ma. Ana hii inak esa neme Betlehem Yehuda mai, da'di saoina makahatun-na.

²Tehu basa boema, inak ndia namanasa, nalosa ana fali ne'un leo aman uman neu, nai Betlehem. Inak ndia leo bulak 4 dalen-na nai naa, boema

³hataholi Lewi ndia, neu tungan, de ana kokoen, fo ana fali ne'un. No ata esa, ma keledei 2. Lelek ana losa naa boema, inak ndia non leo aman neu. Lelek inak ndia aman nitan boema, ana sipok-kana no namahokok,

⁴ma nakasetin, fo ana boso fali. Hu ndia de, ana leo faik telu dalen-na neme ndia, ma na'a-ninu, boema ana sungu no sao makahatun ndia.

⁵Neu fai ka haan-na, ala fo'a fafaianak nanseli, boema laheheleaon, fo ala la'o. Tehu inak ndia aman nafa'da hataholi Lewi ndia nae, “Mu'a dei, fo ela o balakai. Basa soona, emi bole la'o.”

⁶Boema, hataholi Lewi ndia nangatuuk, de na'a-ninu sama-sama no inak ndia aman. Tehu, lelek ana fo'a napadeik, fo sanga la'o boema, inak ndia aman kokoen, fo daenga ana boso la'o. Nae, “Dalem-ma boso susa, fo sungu meme ia.” Boema, hataholi Lewi ndia, sungu neme ndia, le'odaek esa seluk.

⁸Nai faik-ka 5-na, fo bei fafaianak nanseli, nai lelek ana sanga la'o boema, inak ndia aman nafa'da seluk nae, “Ayo, mu'a dei; fo ba'ihanak soona, besak-ka la'o.” Boema duas la'a sama-sama, ma la'a koe-koe losa le'do mulai tenak.

⁹Basa boema, lelek hataholi Lewi ndia no sao makahatun-na, ma atan-na sanga la'o boema, amak ndia nae, “Sanga makahatu ia so, ba'ihanak seluk faa bai te, makahatuk-ka so. Malole lenak, ka'da sungu meme ia, fo dalem-ma boso susa. Balahaa soona, emi bole fo'a fafaik, fo fali me'um-ma.”

¹⁰Tehu hataholi Lewi ndia, ta nau sungu seluk nai ndia fa. De ndia ma saon-na, la'o sama-sama loo atan-na, ma keledei ka duan, fo bela basa ne'an-nala so. Lelek sanga nae le'odae boema, ala losa mamanak-ka deka no Yebus (fo nde Yerusalem). Boema, ata ndia nafa'da tuan-na nae, “Tuan, mai fo ata tuli, fo malole lenak, ata sungu nai hataholi Yebus ia kotan-na.”

¹²Tehu tuan-na nataa nae, “Ta! Ita ta hahae nai mamanak fo, laun-na ta hataholi Israel fa. Mai fo ata la'ok takandoo seluk faa, fo mahani te, ita sungu nai Gibea do Rama.”

¹⁴Hu ndia de, ala la'ok lakandoo de ala ta hahae nai Yebus fa. Lelek ala losa Gibea, fo nai leo Benyamin-na, nusan-na, te le'do tenak so.

¹⁵De ala tuli naa, fo ala sungu, boema ala masok leo kota dale leu, de leu langatuuk leu uma manek-ka so'dan-na. Tehu, ta hapu hataholi esa boen, nokes leu sungu nai uman fa.

¹⁶Lelek bei langatuuk nai kota moo maselon-na, te toulasik esa mai, besak-ka ana fali ma'in neme tina mai. Tunga ndoon-na, toulasik ndia da'di neme letelepak Efraim-ma mai, tehu besak ia, ana leo nai Gibea. (Laun fe'e-fe'ek manai Gibea-la nde been-na, Benyamin hataholin sila.)

¹⁷Lelek toulasik ndia, nita hataholi Lewi sila langatuuk nai masadokek-ka boema, natane nae, “Tolanook-ka meme bee mai, ma sanga leo bee muu?”

¹⁸Hataholi Lewi ndia nataa nae, “Besak-ka, ami meme Betlehem nai Yehuda, ma ami bei nai ami leleo-lala'om-ma dalek, fali leo uma meu nai letelepak Efraim-ma. Au da'di eme naa mai. Ta hapu kota ia laun esa boen, nau sipok ami sungu nai uman fa.

¹⁹Ami ta paluu hata fe'ek fa, nana, ami tua-lepam dai. Ami manuu ha'deaik ma nana'ak soaneu ami keledeim-ma; ma ami manuu loti ma angol, soaneu au o au saong ia, ma au atang-nga.”

²⁰Boema toulasik ndia nae, “Boso bii, mahani te, neukose au fali emi. Boso sungu nai masadokek ia.”

²¹Basa boema, nos leo ndia uman neu, de ana hani keledein-nala. Ma ndia fuin sila-la safe basa ein-nala boema, la'a linu.

²² Lelek, ala bei hika-latadale te, no kaiboik, hataholi dale mangalauk manai kota ndia, lakahapi-la uma ndia. Ala fafaek lelesu-a, ma lafa'da toulasik ndia lae, “Fe ami, o moo touk leo o umam mai. Ami nau paken!”

²³Toulasik ndia leo deak neu, de nafa'das nae, “Bosok tolanoong-ngala lemin! Au dokodoe, fo boso tao dede'a mangalauk, ma ta kandaak leondiak-ka fa, nana au fuing ndia.

²⁴Mahani te, neukose au fe touk ndia sao makahatun-na, ma au anafe'ong-nga leo emi neu. Emi bole tao su'di bebe'ik-ka neus. Tehu, boso tao hata mangalauk soaneu au fuing ndia!”

²⁵Tehu, hu kande hataholi dale mangalauk sila-la latea lahele, boema hataholi Lewi ndia, soli saon ndia leo deak neu, fo ana fen leo hataholi sila neu. Boema, ala ta hahae tao tatao mangalauk loo inak ndia, losa fafaik.

²⁶Nai lelek dulufula boema, inak ndia fali ma'in, de ana sapala'o neme saotoun-na sungu nai toulasik ndia uman-na, lelesun-na bafan-na. Le'do-a tii so, te bei nahele nai ndia.

²⁷Fafaik ndia, lelek saotoun-na fo'a, de ana soi lelesu-a, fo ala la'o, te nita sao makahatun-na, lee-lee nai uma ndia so'dan-na, liman-na ho'u lelesu-a.

²⁸Boema, nafa'dan nae, “Fo'a leona, mai fo ata la'o.” Tehu inak ndia ta nataa fa, nanahu maten so. Boema ana ko'o-na inak ndia, de ana taon neu keledein lain, de basa boema ana la'o, fo ana fali ne'un leo uman neu.

²⁹ Ana losa uma boema, ana leo dalek neu, fo neu ho'i dope, basa boema, ana kee-kee sao makahatun ndia popolan-na, da'di bibiak 12. Basa ndia boema, ana haitua bibiak sila-la neu leoina Israel-la, leo ka 12n-nala, esan-na, biak esa.

³⁰Basa hataholi mananita manada'dik ndia, lafa'da lae, “Manada'dik matak leo iak-ka, beita da'di nita fa, mulai neme hataholi Israel-la kalua leme Masir mai, losa besak ia. Ita ta bole denge-denge fa. Ita muse takokolaok, fo ho'i nakeketuk!”