Read Termanu HAKIM-HAKIM 7 Bible Online

HAKIM-HAKIM 7 - Termanu bible

HAKIM-HAKIM 7

¹Faik esa boema, Gideon no ana paletan-nala fo'a fafaianak nanseli. Ala la'o, de ala ofu nai deka no oemata Harod-ta. Hataholi Midian-nala, ofu nai sila boboan kii, nai bafak manadeka no Pupukuk More.

²Boema, MANETUALAIN nafa'da Gideon nae, “O solda'dum-mala makadotok nanseli. De Au ta nau fes ala sengi hataholi Midian-nala fa, nana mahani te, neukose ala dodoo lae, sila sengi nanahu sila be'i-balakain mesan-nala, nalosa ala ta koa-kio Au fa.

³ Da'di, po'a-benga neu o ana paletam-mala mae, ‘See name'da-nana ana bii soona, muse no lai-laik, ana la'oela Letek Gilead ia, fo ana fali ne'un leo uman neu.’ ” Boema, hapu hataholi lifun duahulu dua fali le'us; de ela ka'da hataholi lifun sanahulu.

⁴Boema MANETUALAIN nafa'da seluk Gideon nae, “O ana paletam-mala bei makadotok nanseli. De moos leo lee dale leu. Nai naa, neukose Au se'es soaneu o. Metema, Au afa'da o ae, ‘Hataholi ia, muse neu,’ soona, muse neu. Tehu, metema Au afa'da ae, ‘Hataholi ia, ta bole neu fa,’ soona, ta bole neu fa.”

⁵Boema Gideon noo hataholi sila-la leu leo lee dale leu, de MANETUALAIN nafa'da Gideon nae, “Hataholi fo nalamei oe-a, sama leo busa, muse o tao fe'en neme hataholi, fo ana senek besak-ka ninu.”

⁶Boema, hapu hataholi natun telu lalamei oe-a neme liman dale mai; basa fe'ek sila-la soona, ala senek besak-ka linu.

⁷Basa boema, MANETUALAIN nafa'da Gideon nae, “Neukose Au soi-po'i emi ma Au fe emi sengi hataholi Midian-nala, nenik ka'da hataholi ka natun telu, fo lalamei oe-a neme liman dale mai sila. Madenu fe'ek-kala, fo ala fali le'us leona.”

⁸Hu ndia de, Gideon nadenu hataholi Israel fe'ek sila-la fali le'us, ela ka'da hataholi natu ka teluk sila-la. Ala ho'i falik tua-lepa ma pupuuk-kala, leme hataholi manafali le'us sila-la mai. Hataholi Midian-nala lai bafak manai hataholi Israel-la mamana ofun-na, boboan dae.

⁹Le'odaek ndia, MANETUALAIN nafa'da Gideon nae, “Fo'a leon Gideon! Fo muu sapu-ma hataholi Midian-nala ofun-na leona. Te Au fe o sengis.

¹⁰Tehu metema o bii soona, leleko moo, o atam Pura, fo ana la'o sama-sama no o, leo musu-a ofun-na meu.

¹¹Mahani te, neukose o mamanene hata, fo musu-a kokolak-kana, soona dede'ak ndia, ana tao-na o mapalani sapu-malas.” Boema Gideon no Pura leu leo dae too no musu-a.

¹²Nai bafak ndia dalek, hataholi Midian, Amalek ma hataholi fe'ek-kala leme moo solokaek-ka mai, lakapepela su'di lai mamanak lala'en-na. Metes soona, sama leo lamak-kala lakamomotu. Sila ontan-nala makadotok nanseli, sama leo solokaek manai tasi su'uk-ka.

¹³Lelek Gideon losa naa boema, namanene hataholi esa, ana tui me'in-na neu nonoon-na. Hataholi ndia nae leo ia, “Au alame'i, loti esa nalolik leo ita ofun dale mai, boema ana lena seli lalaa temak esa. Lalaa temak ndia, ana tu'u neu, de nakabebelak no dae-a.”

¹⁴Boema, nonoon ndia nataa nae, “Wah, loti ndia, tao leo bee-o, Gideon, fo Yoas hataholi Israel ndia, anan-na, tafainan-na. Sosoan-na nae, Manetualain fen ana sengi hataholi Midian-nala, ma basa ita solda'dun-nala lala'en-na so!”

¹⁵Lelek, Gideon namanene hataholi ndia me'in-na sosoa-ndandaan boema, ana sene-do'ok Manetualain. Basa boema, ana fali ne'un leo Israel ofun-na neu de nafa'da nae, “Maheheleaom leona! Te MANETUALAIN fe emi sengi solda'du Midian-nala!”

¹⁶Boema Gideon ba'e solda'du natu ka telun sila-la, neu bubuak telu. Ana fe esan-na, pupuuk esa, ma mamana oe esa, obor nai dalek.

¹⁷Gideon nafa'das nae, “Metema, au losa dae too no hataholi Midian-nala ofun-na soona, taoafik matalolole au, ma au tao beek nai ndia.

¹⁸Metema, au ma au solda'dung-ngala puu pupuuk-ka soona, emi muse puu emi pupuum-ma boe. Boema, emi muse eki nai ofu ndia boboa-kaisun, ‘Soaneu MANETUALAIN ma soaneu Gideon!’ ”

¹⁹Sanga deka fatila'da boema, Gideon no solda'dun-nala losa dae too no musu ofun-na. Nai lelek ndia, hataholi manamanea ofu ndia, besak-ka nggati manamanea. Boema Gideon ma solda'dun-nala puu pupuuk-kala, ma ala fepa ba'e sila mamana oen-nala.

²⁰Solda'du bubua ka duak fe'ek-kala, tao leondiak boe. Boema, basa-basas so'uk sila obor-na nenik lima kiin-nala, ma ala puu pupuuk fo manai lima konan-na. Ala eki lae, “Tafaina soaneu MANETUALAIN ma soaneu Gideon!”

²¹Sila basa-basas lapadeik lahele nai esa-esak mamanan-na, nai ofu ndia boboa-kaisun. Boema, musu-a solda'dun-nala lala'en-na, lalai tu'u-fo'a ma ala nggasi beau.

²²Lelek Gideon ma hataholin-nala puu pupuun-nala, Manetualain fe solda'du musu-a, esa sapu-na esa nenik tafaina. Lalai lasale leo Zesera leu, losa Bet-Sita ma kota Abel-Mehola, fo deka no Tabat.

²³Boema laloo, leo Naftali, Asyer, ma leo Manasye, nau manai Lee Yarden-na boboan dulu, do manai boboan muli boe, de ala usi tunga solda'du Midian-nala.

²⁴Boeo, Gideon haitua hala nalolook ia, leo basa letelepak Efraim-ma lala'en-na neu nae, “Kona mai, fo matee-mata'ti mo hataholi Midian-nala. Manea mahele Lee Yarden-na, ma basa lee anak-kala, losa leo Bet-Bara neu. Boso po'ilotak hataholi Midian esa boen, lena leme naa leo ia mai.” Ma ala fo'a la'iesak hataholi Efraim-mala boe, de lanea lahele Lee Yarden-na ma basa lee anak-kala, losa leo Bet-Bara neu.

²⁵Ala ho'u-la, leoina Midian-na, lasi nggolon dua, fo nde Oreb ma Zeeb. Ala taolisa Oreb nai Batu Oreb-pa, ma Zeeb nai Zeeb mamana kaka'bi angol-la. Hataholi Efraim sila-la, usi lahele hataholi Midian-nala, boema leni Oreb ma Zeeb langan-nala leo Gideon nai Yarden selik dulu.