Read Termanu HAKIM-HAKIM 8 Bible Online

HAKIM-HAKIM 8 - Termanu bible

HAKIM-HAKIM 8

¹Hataholi Efraim-mala lafa'da Gideon lae, “Tao le'e de, o ta leleko ami, nai lelek o muu matee-mata'ti moo hataholi Midian-nala fa? Tao le'e de, o tao ami leondiak?” Lakamuu-muu Gideon lae leo ndia.

²Tehu Gideon nataa nae, “Hata fo au taon-na, sosoa-ndandaan ta ba'u bee esa boen, metema nakasasamak-kana no hata fo emi taon so. Leomae emi taok-ka, ka'da faa anak mesan, tehu faa anak ndia, belin-na ba'ulena neme basa hata, fo au leo-ingug-nga solda'dun-nala lala'en-na taok-ka.

³ Emi nde hapu koasa neme Manetualain mai, nalosa emi hapu taomisa Oreb ma Zeeb, fo Midian lasi nggolon ka duak sila-la! Metema nakasasamak-kana no dede'ak ndia soona, ade au tatao-nono'i maloleng-nga nde bee?” Lelek Gideon nae leondia boema, ta lamanasa so'on.

⁴Nai hatematak ndia, Gideon no solda'du natu ka telun-nala losa Lee Yarden-na selik. Ala sota lanseli, tehu ala bei usi lahele musu-a.

⁵Basa boema, ala losa Sukot. Nai ndia, Gideon nafa'da laun manai kota ndia nae, “Sue-na, fe au solda'dung-ngala nana'ak faa dei. Ala sota lanseli, te natek-ka ami bei usi Zebah ma Salmuna, fo Midian manen sila-la.”

⁶Tehu mauli-malangan manai Sukot ndia lataa nae, “Ah, emi beita ho'u-ma, Zebah ma Salmuna fa, te emi moke nana'ak so! Sosoak hata, fe o solda'dum-mala la'a?”

⁷Boema Gideon nae, “Hei! Mahani te, metema MANETUALAIN, fe au sengi Zebah ma Salmuna soona, neukose au filuk emi nenik dila-nggauk maneme moo solokaek-ka mai!”

⁸Basa boema, Gideon la'ok nakandoo, de ala losa Pnuel. Nai naa, noke fe solda'dun-nala nana'ak boe. Tehu hataholi Pnuel-lala natataan-na, sama no hataholi Sukot-tala natataan-na boe.

⁹Hu ndia de, Gideon nafa'das nae, “Mahani te, neukose au fali no so'dak. Ma nai hatematak ndia, neukose au tao atu'u kota ia uma puni mademan-na!”

¹⁰Ndia te, Zebah ma Salmuna no solda'dun-nala lala'en-na, lai Karkor. Neme basa solda'du, fo hataholi moo solokaek-kala lala'en-na, mate ela ka'da fafa'kama hataholi lifun sanahulu lima; mate solda'dun 120.000 so.

¹¹Gideon la'ok ndolo-ndolo tunga moo solokaek-ka dae toon manai Nobah ma Yogbeha boboan dulu, boema no kaiboik, ala sapu-la musu-a.

¹²Zebah ma Salmuna, fo Midian mane ka duan sila-la, lalai, tehu Gideon usi tungas, de ana ho'un-nalas, nalosa solda'dun-nala lala'en-na, lapangamak.

¹³Basa boema, nai leleo-lala'ok fo ala fali leme musu dale mai-a dalek, Gideon tunga eno ndanda'ek Heres-sa.

¹⁴Nai ndia, ana ho'un-na ta'eanak esa, neme Sukot mai, boema natane hataholi ndia, la'eneu basa mauli-malangan manai Sukot-tala, na'den-nala. Boema, hataholi ndia, sulak fe Gideon na'dek sila-la, basa-basas hapu hataholi hituhulu hitu.

¹⁵Basa ndia boema, Gideon neu natongo no lasi nggolok manai kota ndia, boema nae, “Tao leo bee-o, emi bei mafandendelek, mae emi tipa hai au so, nalosa emi ta nau tulu-fali au fa, nanahu au beita ho'u-a, Zebah ma Salmuna fa hetu? Emi ta nau fe au solda'dung-ngala nana'ak fa; te se'kona, ala sota lanseli nai lelek ndia. Mitak, Zebah ma Salmuna nde ia.”

¹⁶Basa ndia boema, Gideon ho'i-na dila-nggauk maneme moo solokaek-ka mai, de ana filuk-kana neu basa kota Sukot-ta, lasi nggolon sila-la.

¹⁷Nai Pnuel boeo, ana tao natu'u uma puni madema ma ana taonisa la'iesak basa touk manai kota ndia.

¹⁸Basa ndia boema, natane Zebah ma Salmuna nae, “Emi taomisa hataholi-la nai Tabor ndia, lupan-nala leo beek?” Zebah ma Salmuna lataa lae, “Hataholi sila-la basa-basas mata-panan, lahope loo o mata-panam, sama leo tititi-nonosi manefetoana.”

¹⁹Boema, Gideon nae, “Au tolanoong sila — au inang, anan sila. Leounik-ka, emi ta tao misa fas soona, au soo, au ta taoisa emi boen.”

²⁰Boema Gideon nafa'da Yeter, fo ana ulun-na nae, “Taomisas leona!” Tehu, Yeter bei muli-soluk. Da'di, ana bii, nalosa ana ta fe'a tafainan-na, fo nanisa fa.

²¹Zebah ma Salmuna lafa'da Gideon lae, “Ayo, touk o soona, taomisa ami leona!” Boema, Gideon taonisas, de ana ho'i-na basa lilopilas-poemata manai ontan-nala botoliin-na.

²²Basa boema, hataholi Israel-la, lafa'da Gideon lae, “O soi-po'i ami neme hataholi Midian-nala koasan-na mai so. Hu ndia de, ela leo been-na, o da'di ami mauli-malangam — o ma o tititi-nonosim.”

²³Boema, Gideon nataa nae, “Ta. Neukose au ta da'di emi mauli-malangam fa; au anang-nga boeo ta. MANETUALAIN nde da'di emi mauli-malangam-ma.”

²⁴Tehu basa boema, Gideon nafa'da seluk nae, “Au nonokeng ka'da esa; ela leo been-na, emi fe la'iesak lolo'ek fo emi matona-malas neme musu-a mai, leo au mai.” (Hataholi Midian-nala biasa pake lolo'e lilopilas; sama-na leo hataholi fe'e-fe'ek fo manaleo nai moo solokaek-ka boe.)

²⁵Boema, lataa lae, “Hei, no dale namahokok, neukose ami fes leo o neu.” Boema, lakapepela temak biak esa, de basa boema, hataholi-la esa-esa mai, fo ana pe'da lolo'ek fo ana kalo nenin neme musu-a mai, neu temak ndia lain.

²⁶Basa lolo'e lilopilas fo ala fen leo Gideon nai lelek ndia, belan-na, hihii nae kilo duahulu, te beita leke lilo-henu, tema pilabalanggeok fo mane-manek Midian-nala biasa paken, ma lilo-henu manai sila ontan-nala botoliin-na fa.

²⁷Neme lilopilas sila-la mai, de Gideon tao-na dodoki-dudula sosongok esa, de napadedeik-kana nai nggolon-na, fo nai Ofra. Basa hataholi Israel-la leu leo naa leu, fo ala sene-do'ok neu dodoki-dudulak sosongok ndia, nalosa ala ta taoafik neu Manetualain so'on. De dede'ak ndia, ana da'di, sama leo hihi'ik esa, ba'eneu Gideon ma teidalen-nala.

²⁸Hataholi Midian-nala, ta hapu botik langan-nala so'on; hataholi Israel-la sengis so. Nai lelek Gideon bei naso'da, nusak ndia tetu-temak, teuk haahulu dalen-na.

²⁹Basa natee-natatik ndia boema, Gideon fali ne'un leo nggolo-ta'dun neu, de ana leo neme naa.

³⁰Ana toun hituhulu, nana saoinan makadotok.

³¹Boeo, hapu saoina makahatun nai Sikhem boe; ana hapu ana touk esa neme saoina makahatun ia mai, de ana foin na'de Abimelekh.

³²Lelek, Gideon, fo Yoas anan ndia, namalasi nanseli, besak-ka maten. Latoin nai aman Yoas mamana laten-na. Lates ndia nai Ofra, fo nde Abiezer fanilin-na, kotan-na.

³³Mate basa Gideon boema, hataholi Israel-la, ta lilineka neu Manetualain so'on. Ala sene-do'ok neu lamatua daebafak Baal-la, ma ala tao Baal-Berit da'di sila-lamatua daebafan-na.

³⁴Ala ta sene-do'ok seluk neu Manetualain, fo sila MANETUALAIN, fo manasoi-po'is neme basa musu manai boboa-kaisun-nala, koasan-na mai.

³⁵Boeo, ala ta balas dale malole neu Gideon teidalen-nala, ma neu basa Gideon tatao-nono'i malolen neu hataholi Israel-la fa.