Read Termanu HAKIM-HAKIM 9 Bible Online

HAKIM-HAKIM 9 - Termanu bible

HAKIM-HAKIM 9

¹Faik esa boema, Abimelekh, fo Gideon anan-na, neu leo kota Sikhem fo inan teidalen-nala nggolo-ta'dun. Ana losa naa boema, ana kokolak nos nae,

²“So'ba, matane laun Sikhem-ma lala'en-na, beek-ka nde malole: Gideon ana ka hituhulun-nala paleta no'u-no'u, do ka'da esa mesak-kana? Mafa'das fo lafandendelek boe, mae au bei daak esa o sila.”

³Boema Abimelekh inan teidalen sila, leu leo hataholi Sikhem-mala leu, de landuku-lalosak Abimelekh hala hehelun ndia neus. Boema laun Sikhem-mala ho'i nakeketuk, fo ala tunga Abimelekh, nana tunga sila soona, memak ndia bei daak esa no sila.

⁴Basa boema, ala ho'i-la doi fulak hituhulu, neme uma sosongok Baal-Berit-ta mai, de ala fen leo Abimelekh neu. Boema, Abimelekh se'ba hataholi malela ha'da tak bubuak esa, nenik doik sila, fo daenga lakabubua lon,

⁵boema, leu leo aman nggolo-ta'dun nai Ofra. Ala losa naa boema, ana taonisa tolanoo ka hituhulun sila-la, nai batu esa lain. Tehu, ana ta taonisa Yotam, fo Gideon ana mate'a teisu'un-na fa, nanahu nalai neu ke'ke.

⁶Boema, basa laun Sikhem-mala, ma laun Bet-Milo-la lala'en-na, lakabubua de leu leo luluu aifula manituk-ka, nai Sikhem. Ala losa naa boema, ala so'u Abimelekh da'di manek.

⁷Lelek, Yotam namanene dede'ak ndia boema, neu napadeik neu Letek Gerizim-ma poin-na, de ana eki nasale leo hataholi sila-la, ma nae, “Mamanene au, hai hataholi Sikhem-mala lemin, fo ela Manetualain boeo namanene emi!

⁸Nai manada'dik esa, ai-la lakabubua, fo ala hele sila manen-na. Boema lafa'da ai setun-na lae, ‘O da'di ami manem-ma.’

⁹Tehu ai setun-na nataa nae, ‘Ah, au ta nau fa. Nana metema au da'di emi manem-ma soona, au muse hahae fe mina setun, fo ala paken soaneu fe ha'da-holomata neu lamatua daebafak-kala, ma hataholi daebafak-ka.’

¹⁰Boema, ai-la lafa'da ai kaak-ka lae, ‘O nde da'di ami manem-ma.’

¹¹Tehu ai kaak-ka nataa nae, ‘Au ta nau fa, nana metema, au da'di emi manem-ma soona, au hahae fe kaa boak makee-makeek.’

¹²Basa ndia boema, ai-la lafa'da ai angol-la lae, ‘Nah, o nde da'di ami manem-ma.’

¹³Tehu, ai angol-la nataa nae, ‘Hapu nai bee, au muse hahae fe angol fo tao tesa-tama lamatua daebafak-kala, ma hataholi daebafak-ka dalen-na, ka'da soaneu da'di emi manem-ma!’

¹⁴Hu ndia de, basa ai-la lafa'da makatema dila-nggauk lae, ‘Ka'da o nde da'di ami manem-ma.’

¹⁵Boema makatema dila-nggauk ndia nataa nae, ‘Metema, te'e-te'e emi nau tao au da'di emi manem soona, mai masulu-mahapa nai au sa'ong dale. Metema, emi ta nau fa soona, neme au ndanang fo manggauk ia, neukose ana kalua ha'i, fo ana hotu heni basa ai aras manai Libanon-nala.’ ”

¹⁶“Nah,” Yotam kokolak nakandoo nae, “Ade, no emi ndo ei Abimelekh da'di manek, de emi taon no dale ndoos ma matetuk so do ta? Ade emi tao basa hata, fo nandaa, soaneu au amang Gideon, ma teidalen-nala so do? Ade emi balas basa au amang tatao-nono'i malolen,

¹⁷fo ana puselaipana soaneu emi so do? Mafandendelek, te napalani pasak mamates, soaneu soi-po'i emi neme hataholi Midian-nala koasan-na mai.

¹⁸Tehu besak ia, emi ke'di-ndiu au amang teidalen-nala. Emi taomisa ana ka hituhulun-nala la'iesa, nai batu esa lain. Abimelekh ia nde been-na, au amang sungu no atan-na, de bongi Abimelekh. Tehu emi ndo ein da'di mane Sikhem-ma, ka'da hu kande bei daak esa no emi.

¹⁹Metema, emi tatao-nono'im faik ia, no dale ndoos ma matetuk soaneu au amang soona, emi bole mamahoko-setelee moo Abimelekh, ma nemen-na, fo ana namahoko-setelee no emi.

²⁰Tehu metema, dede'an-na ta leondiak fa soona, sa'di leo been-na, ha'i-a kalua neme Abimelekh mai, fo ana hotunisa la'iesak laun Sikhem-mala, boema laun Bet-Milo lala'en-na. Ma sa'di leo been-na, ha'i-a kalua neme laun Sikhem-mala, boema neme Bet-Milo mai boeo, fo ana hotunisa Abimelekh.”

²¹Basa ndia boema, Yotam nalai, de ana leo neme Beer, nanahu ana bii Abimelekh, fo tolanoon ndia.

²²Abimelekh paleta Israel, teuk telu dalen-na.

²³Boema, Manetualain nakadada'dik musu-a, fo ela Abimelekh musu no hataholi Sikhem-mala, nalosa ala la'ban Abimelekh.

²⁴Dede'ak ndia ana da'di, fo ela balas Abimelekh tatao-nono'i mangalaun-na, ma hataholi Sikhem-mala dudungu-papaun, fo ana taonisa Gideon ana ka hituhulun-nala.

²⁵Hataholi Sikhem sila-la, pe'da hataholi manamahanik-kala lai letek-kala poin-na, fo ala ho'u Abimelekh. Hataholi see tunga ndia soona, hataholi manamahanik sila-la ho'u-lan, fo loso-la bua-lo'an. Boema lafa'da dede'ak ndia neu Abimelekh.

²⁶Nai lelek ndia, Gaal, fo Ebed anan-na, ana mai sama-sama no tolanoon-nala, fo ala leo lai Sikhem so; de hataholi Sikhem-mala lamahelen.

²⁷Leu seu angol nai osi angol-la, boema ala nasu angol, fo ala tao feta. La'a-linu nai sila lamatua daebafan-na, mamana sosongon-na, boema ala soo-supa Abimelekh lae,

²⁸“Ita ia see, nalosa ita muse takatele neu Abimelekh?” Boema Gaal nae, “Tunga ndoon-na, see ndia? Ade, ndia ta nde Gideon anan-na, fo no limaboakonan Zebul ndia, da'di ata neu Hemor, fo Sikhem aman, fo ita bei-ba'i kain-na!”

²⁹“Leounik-ka, au nde auli-alanga hataholi Sikhem ia-la soona, tao leo bee-o, basa Abimelekh ndia tutuin-na! See au afa'dan ae, ‘Ayo, tutulumatak! Fo'a basa o solda'dum-mala, fo kalua mai matee-matati!’ ”

³⁰Lelek Zebul, fo manakoasa kota Sikhem-ma, namanene Gaal hala-kokolan ndia boema, namanasa.

³¹Nadenu hataholi neu leo Abimelekh nai Aruma neu, fo nanduku-nalosak hala heheluk ia nae, “Gaal, fo Ebed anan-na, sama-sama no tolanoon-nala mai lai Sikhem so, de ala dudungu-papau laun-na, fo sue kande ala la'ban o.

³²Hu ndia de, ela leo been-na, le'odae soona, o moo o hataholim-mala meu ke'ke nai tina.

³³Balahaa fafaik, metema le'do tii soona, sapu-ma kota ndia no kaiboik. Ma metema, Gaal no hataholin-nala kalua, fo ala la'ban o soona, o fai loam-ma nde ndia, soaneu sapu-man!”

³⁴Lelek le'odae boema, Abimelekh no basa ana paletan-nala la'o. Ala tapasasala da'di bubuak 4, boema leu ke'ke nai kota Sikhem-ma boboa-kaisun.

³⁵No lai-laik, lelek Abimelekh ma ana paletan-nala lita Gaal kalua, de napadeik nai kota lelesuinan-na boema, basa-basas kalua leme mamana nafunin-nala mai.

³⁶Gaal nitas, boema nafa'da Zebul nae, “Mitak! Hataholi-la kona leme letek-kala poin-na, leo ia mai!” Zebul nataa nae, “Ah, hataholi ta sila fa. Ndia ka'da salaok-kala nai letek-ka.”

³⁷Boema, Gaal nafa'da seluk nae, “Tete'ek-ka! Hataholi kona neme pupukuk-ka huun-na mai, ma bubuak esa seluk neme luluu aifula manituk-ka, leo ia mai!”

³⁸Zebul nafa'da Gaal nae, “Nah, besak ia, o bafa maloam ndia nai bee? Makahulun-na, o mafa'da mae, sosoak hata, ita muse takatele neu Abimelekh ndia? O makamumulu-makamamaek hataholi-la, nde ia-la. Ayo, besak ia tutulumatak, fo sapu-malas leona!”

³⁹Boema, Gaal kalua no hataholi Sikhem-mala, de ala la'ban Abimelekh.

⁴⁰Tehu Abimelekh sapu-nan, de nalai. Hataholi mates-sala beselee, losa kota lelesuinan-na matan-na.

⁴¹Basa boema, Abimelekh fali ne'un leo Aruma neu, de nahele neme naa. Zebul usi heni Gaal no tolanoon-nala, kalua leme Sikhem mai, nalosa ta lai naa so'on.

⁴²Balahaa boema, hataholi Sikhem-mala mulai la'oela kota, fo sanga leu leo tina leu, boema lafa'da dede'ak ndia neu Abimelekh.

⁴³Boema, Abimelekh naloo nakabubua hataholin-nala, de ana ba'es neu baba'ek 3, de leu ke'ke lai tina-la dalek. Lelek nita kota ndia laun-na leu leo tina leu boema, ana kalua neme mamana nafunin-na mai, de ana taonisas.

⁴⁴Lelek Abimelekh bei no solda'dun-nala no lai-laik, ala tutulumatak, fo sapu-la kota lelesuinan-na, te solda'du bubua ka duak fe'ek-kala usi, de taolisa hataholi manamalaik leo tina-la leu.

⁴⁵Abimelekh natee-nata'ti nakandoo, fai katemak esa, de nangatuu-na kota ndia; ana taonisa laun-na, boema ana tao nakalulutuk kotan-na, basa boema ana nggali masik neun.

⁴⁶Lelek hataholi manai Sikhem kota musun-na dalek, lamanene dede'ak ndia boema, leu leo bolok manai uma sosongo El-Berit-ta dalek leu, fo lasulu-lahapa aon-nala.

⁴⁷Boema, hataholi nafa'da Abimelekh nae, hataholi manai Sikhem kota musun ndia dalek-ka, lakabubu nai naa so.

⁴⁸Hu ndia de, Abimelekh no hataholin-nala leu leo Lete Zalmon-na leu. Nai naa, ana ta'ti ai ndanak nenik taka, de ana lu'a neni ai ndanak sila-la, basa boema, nadenu hataholin-nala boe, fo ala tao lai-lai sama leo ndia taok-ka so.

⁴⁹Boema sila esa-esak ta'ti ai ndanak, de ala la'ok tunga Abimelekh. Launu basa ai ndanak sila, neu bolo sosongok ndia bafan-na, boema ala tao ha'i neu, ndia te, hataholi Sikhem-mala bei lai bolok dale. Hu ndia de, mate la'iesak laun Sikhem sila, ina-touk fafa'kama hataholi lifun esa.

⁵⁰Basa ndia boema, Abimelekh neu leo Tebes neu. Nakahapi-na kota ndia, de nangatuu-nan.

⁵¹Uma puni madema esa, tean-na seli, nai kota ndia tala'da heon. Boema, basa kota ndia laun-na lala'en-na, lalai leo naa leu. Leu leo uma puni madema ndia dalek leu, de ala nggoelisa lelesun-na, boema ala kae leo lain leu.

⁵²Basa boema, Abimelekh neu leondia neu, fo ana sapu-na uma puni madema ndia. Lelek ana losa uma puni madema ndia lelesun-na bafan-na, de ana sanga hotu henin boema,

⁵³ inak esa tu'u batu tututu pelak esa neu langan-na, nalosa langaso'en-na natandala.

⁵⁴Abimelekh lai-lai neu naloo ta'eanak manalu'a tafa-sisilon-na, de nafa'dan nae, “Fe'a-ma, o tafainam-ma, fo do'domisa au; au ta nau hataholi nafa'da nae inak esa nde taonisa au fa.” Boema ta'eanak ndia, paun losa maten.

⁵⁵Lelek hataholi Israel-la bubuluk, lae Abimelekh maten so, boema basa-basas fali le'us.

⁵⁶Manetualain balas Abimelekh tatao-nono'i mangalaun, fo ana taon soaneu aman, nai lelek ana taonisa tolanoo ka hituhulun-nala, enon-na leondiak.

⁵⁷Ma Manetualain boeo, huku hataholi Sikhem-mala, nanahu sila tatao-nono'i mangalaun-nala. Dede'ak ndia la'en, sama leo Gideon anan Yotam nafa'dan la'eneu hataholi sila, nai lelek ana soo-supa fes.