Read Termanu 2 YOHANIS 1 Bible Online

2 YOHANIS 1 - Termanu bible

2 YOHANIS 1

¹Susulak ia neme au, fo mauli-malanga salanik. Au fe susulak ia neu Inak fo Manetualain hele ka, ma Ina ana nala. Au sue-lai emi te'e-te'e. Ta ka'da au mesa nga sue-lai emi fa, te basa hataholi mana malelak Manetualain fo ndo sa, ala sue-lai emi boe.

²Nanahu Manetualain leo nai ita dalen dale, ma no nahele ita losa dodoo na.

³Ela leo bee na, Amak Manetualain, ma Yesus Kristus, fo Ama ka Anan ndia, fe ita baba'e-papalak, susue-lalaik ma mole-dame. Ela leo bee na, basa sila la ita tanuus no dale ndoos ma susue-lalaik.

⁴Au amahoko anseli, nai lelek fo au amanene lae, Ina anan nggelok laso'da tunga Manetualain nanoli nala, sama leo Amak Manetualain paletan neu ita.

⁵ Hu ndia de, au oke anseli neu Ina, fo daenga ita basa-basa tala, tasue-talai ao. Au ta afa'da paleta beuk ia la fa; lafa'da basa paleta ia la neu ita, ndek ita tamahele makasososa na so.

⁶Tasue-talai ao soona, sosoa na nae, emi maso'da tunga Manetualain paleta nala. Paleta sila la, emi mamanenes ndek makasososa na nae, emi muse maso'da nai nasue-nalai ao ka dalek.

⁷Hataholi mana ke'dindiuk ba'u ka, ala tapasasala leo basa daebafa ka lala'ena leu so. Hataholi sila la nde ta nau sipok Yesus Kristus mai hai neme daebafa ka, boema ta lamahele, Ana da'di hataholi daebafak fa. Hataholi matak leo sila kala, hataholi mana ke'dindiuk, fo Kristus Musu No nala nde hataholi sila la.

⁸Hu ndia de manea matalolole, fo boso nalosak emi mamopo hata fo, ami tao-no'i basan neu emi ndia. Sanga enok, fo ela emi hapu sipo la'iesak emi ngga'di ma neme Manetualain mai.

⁹Hataholi fo, ana ta ho'u nahele Kristus nanoli nala, te ana tao fe'ek neme Kristus fen nanoli kala mai soona, hataholi ndia, Manetualain ta. Hataholi fo naso'da nahele nai Kristus nanoli nala dale ka, hataholi ndia nanuu Amak Manetualain no Anan Yesus boe.

¹⁰Hu ndia de, metema hapu hataholi mai fo, ana ta tui-benga Kristus nanoli nala neu emi fa soona, boso mate'an ma boso sipok hataholi ndia leo emi umam neu.

¹¹Nana, see nate'a hataholi matak leondia ka soona, ana tunga hataholi ndia, fo duas tu'da leo tatao-nono'i mangalauk ndia dalek leu.

¹²Au bei paluu afa'da emi, dede'a ba'u nanseli, tehu au dodoo basan ae, malole lenak au boso afa'dan tunga susula liik. Au amahena, au hapu loak fo au ne'i donge-dama emi soona, besa ka au kokolak matang o emi, fo ela ita basa-basa tala tamahoko te'e-te'e.

¹³Ina ka tolano inan fo Manetualain hele ka, ana nala haitua fe Ina, nate'ak boe.