Read Termanu NINITAK 12 Bible Online

NINITAK 12 - Termanu bible

NINITAK 12

¹Boema hata matabeu matuaina esa da'di nai lalai. Inak esa pake le'do da'dileo bua papake na, bei napadeik nai bulak lain. Nai langa na, hapu bulamolik esa ala taon neme nduuk sanahulu dua mai.

²Inak ndia bei kailus, ma nanahu fai na losa soaneu ana bongi boema ana nggasi nahohe'dis.

³ Boema hata matabeuk esa seluk da'di nai lalai. Hapu naga pilas esa matuaina nanseli, fo nanuu langak hitu, ma susulak sanahulu. Langan esa soona, ana pake bulamolik esa.

⁴ Nduuk manai lalai la ba'en neu telu soona, ana lele'a-loloso baba'ek esa ninik iko na fo ana tapas leo daebafa ka mai. Naga ndia napadeik nai inak fo ana sanga bongi ndia mata na fo sue ka nde, metema inak ndia bongi soona, ana ko'do na ana na.

⁵ Boema inak ndia bongi na ni'iana touanak esa, fo neukose ana paleta basa hataholi manai daebafa ka ninik aitete'e besik. Tehu ana loso na ni'iana ndia neme inak ndia mai, boema non leo Manetualain ma leo kandela mane na matan neu.

⁶Boema inak ndia nalai leo mo maloa neu, leo mamanak fo Manetualain sadia basan ba'eneun. Inak ndia nananakaboboik faik lifun esa natun dua nehulu dale na nai mamanak ndia.

⁷ Boema natee-nata'ti ka da'di nai nusa so'da ka. Mikhael no ata nusa so'da nala latee-lata'ti laban naga ndia. Ma naga ndia ana manatunga nala boeo tulu-falin de ala laban Mikhael.

⁸Tehu naga ndia ana kala de nalosa ala usiheni naga ndia no ana manatunga nala leme nusa so'da ka mai.

⁹ Ala tapa naga matuaina ndia leo deak neu! Naga ndia nde menge lasik fo nana'de Nitu do Dula Dale Mangalauk fo manake'dindiu basa daebafa ka lala'ena. Ala tapan no ana manatunga nala leo daebafa ka.

¹⁰ Boema au amanene hala ka nahala napane'e nai nusa so'da ka nae, “Besak ia fai na losa, Manetualain soi-tefa hataholi kamahehele nala! Besak ia Manetualain natu'du koasa na da'dileo Manek! Besak ia Mane Mana Fe so'dak fo nanaheluk ndia boeo natu'du koasa na! Nana manakalaak ita tolanoo nala lele'do le'odaen nai Manetualain mata na, nanakalua-henik neme nusa so'da ka mai so.

¹¹Ita tolanoo nala ala sengin ninik Bi'ilopo Ana ndia daa na so, ma ninik hala ndoos maneme Manetualain fo ala tui-benga ka. Ala nau lanseli tunu-hotu so'da nala losa mate.

¹²Hu ndia de ela leo bee na nusa so'da ka no basa hata fo manaleo nai dale ka, lamahoko-setelee! Tehu soe ba'eneu daebafa ka ma tasi a, nana Nitu kona neu emi ninik nasa-melu matuaina na, nanahu ana bubuluk basa, fai na ela ka'da faa anak so.”

¹³Nai lelek naga ndia name'da nae, ndia nanatapa basak leo daebafa ka neu boema, neu usi inak fo manabongi ni'iana touanak ndia.

¹⁴ Tehu ala fe inak ndia manupui kaka'ka li'da matuainan dua, fo ela ana laa leo mamana na nai mo maloa. Mamanak fo nai bee lakaboboin teuk telu seselik, fo daenga naga ndia boso boe tao nahe'di bain.

¹⁵Boema naga ndia nasapula oe makadotok nanseli neme bafan dale leo inak ndia neu fo nakabobolok henin.

¹⁶Tehu daebafa ka tulu-fali inak ndia; daebafa ka napook bafa na de ana ko'do heni oe fo manakalua neme naga ndia bafa na mai.

¹⁷Naga ndia namanasa nanseli neu inak ndia, nalosa neu sapu na inak ndia tititi-nonosi fe'e nala, fo nde basa hataholi manatunga Manetualain paleta nala, ma manafe sakasii la'eneu Yesus ma koasa na.

¹⁸Basa ndia boema naga ndia napadeik nai tasi su'u na.